Roma 2

Msderux Pnsgao Utux Baro

1Maanu so kiya de, yamu seediq nii smnetur seediq, ani namu ima uka nngiyan namu mesa ini ku kela. Smnetur su mnmaanu seediq we ani nak qnnaqah noda su ani maanu. Ado seediq so smnetur we qneepah su nanak we mntena seediq kiya duri. 2Klaun ta ka seediq so qmneepah nii we Utux Baro ge, pdaun na pstena psgao ka heya. 3Isu seediq nii, smnetur su seediq qmneepah so nii, qneepah su nanak we mntena qneepah daha. Yasu maha qduriq psgao Utux Baro ho? 4Uxe uri we sbciqun su ka kneegu huwe na, knpruwan lhebun na ma knrmenan na. Ini su klai kiya ka mpdudul sunan ka huwe na peni? 5Kiya de pniqun hiya knkrayan ini kmpriyux lhebun su ma psseli su nanak seang su! Meeniq ali seang ciida, msderux pnsgao Utux Baro we maha meyah ptuura nii. 6Utux Baro we mpuyu na qneepah seediq cmiyuk txtaxa heyi. 7Kana ka mooda knremun qmeepah malu, migin knledax, kmmalu ngayan ma migin uxe kksburo we niqan uka psteqan knuudus ka cnyukan na. 8Kmsaanak lhebun na ma ini thei quri bale ba ma sgpuyu nnaqah qneepah ka seediq we tperuq seang ka cyukan na. 9Heya we bege na kana seediq qmeepah naqah ka mqraqil ma naqah bale kuxul. Prading han we seediq Yudaya ma bobo na de seediq Hellenis. 10Kana seediq qmeepah malu we sbege na dheya ka knledax, knmalu ngayan ma msbale lhebun. Prading han we seediq Yudaya ma bobo na de seediq Hellenis. 11Ini psaanak qmita seediq ka Utux Baro.

12Kana seediq ga meniq uka gaya ma wada moda qnuuqu noda we maha pkuuka meniq uka gaya. Kana niqan gaya ma wada noda qnquwan noda we mooda gaya psgao. 13Ado berah Utux Baro we uxe ka mbahang gaya kesun uka qnquwan noda. Wano muyu gaya ka kesun uka qnquwan noda. 14Uka gaya ka seediq icil qnlhangan ge, nasi oda knlegan daha nanak muyu ooda gaya qmeepah we ani kesun uka gaya ka dheya we ririh gaya ka dheya nanak. 15Ado ptuura beyax gaya we gaga spatis lhebun daha. Msuupu pgkela so nii ka lhebun daha. Duma mtgdiyal ka lhebun daha, mseang heya nanak. Duma we dmayo rmengo heya nanak 16Ali ciida, Utux Baro we mooda Kiristo Yesu ma kari gnrangan mu psgao noda gaga mgleing lhebun seediq.

Seediq Yudaya ma Gaya

17Kiya de isu nanak tmngayan mesa seediq ku Yudaya ka yaku. Smtama su gaya ma Utux Baro ka stndahu su. 18Klaun su ka lnglungan Utux Baro, speeyah su gaya wada su mangal tnugsaan ma dehuk su mkela malu ma naqah. 19Snhiyun su bale isu we mpdudul su seediq mbudu, ledax su seediq gaga meeniq mnkuung, 20mpdudul su seediq mngataq, mptgesa su lqlaqi ma wada ma hnyegan ba knkela ma bale ba ckceka gaya. 21Nasi so nii de mptgesa su seediq ka isu de, ma su ini tgesa isu nanak ho? Iya geeguy mesa ka rnengo su we ma su ka gmeeguy ka isu nana? 22Iya mmhemuc msuupu mesa ka rnengo su we, ma su mmhemuc msuupu ka isu nanak dungal? Tmraqil su tikung ka isu we ma su mosa gmeeguy qyqeya ckceka sapah tikung ho? 23Tndahu su gaya ka isu we, isu ka smeeliq gaya ma pqsiqa Utux Baro! 24Wada namu smeeliq ngayan Utux Baro meniq seediq icil qnlhangan ka yamu, so mntena pnatis Patis.

25Nasi su muyu gaya we niqan rrihan na ka ndaan su ptgaya psalak. Kiya de nasi su smeeliq gaya we ririh su uxe mnoda ptgaya psalak. 26Maanu so kiya de nasi bale ba muyu gaya ka seediq ini ooda ptgaya psalak ge, ani ini ooda ptgaya psalak we uxe ririh mnoda ptgaya psalak da peni? 27So ka uxe mnoda ptgaya psalak we nasi mttuku bale muyu na gaya, uxe gisu psgao nii namu smeeliq gaya ka yamu nii niqan pntgaya oda ma, gaya psalak na peni? 28Ado lipax ka seediq Yudaya we uxe bale ba seediq Yudaya. Kiya uri ma wano mpqita ptgaya psalak lipax we uxe bale ba psalak uri. 29Wano pneyah truma lhebun na ka seediq Yudaya we kika bale ba seediq Yudaya. Pneyah lhebun ka pntgaya psalak we kika bale ba psalak. Kiya uri we mooda Bgihur Utux ma ini ooda ptgaya ooda. So nii ka seediq we uxe pneyah seediq ka tmdahu heya, pneyah Utux Baro.

Currently Selected:

Roma 2: Stgdaya

Highlight

Copy