Roma 12

Bgurah Kndesan Ckceka Kiristo

1Mtswai, maanu so kiya de huwe Utux Baro ka ddudul mu yamu. Kiya de ngali muudus mrtaso snapuh ka heyi namu de bqani Utux Baro. Nii we mrtaso ma qrasun Utux Baro. Asi ka so nii ka qnpahan namu. 2Iya puyu bobo dxeral nii. Ppryuxi ma psbgrahi ka lhebun namu. So namu maha giimun maanu ka malu, mttuku ma qrasun bale lnglungan Utux Baro.

3Ado mnoda ku huwe bnege na kenan ma mprengo ku txtaxa yamu: Iya pgkala mita yamu nanak. Pyugi snhiyan namu bnege Utux Baro lmngelung, teta kenu ka maha pnlengu na. 4Mntena so 1 heyi ta we niqan knkingal cida. Knkingal cida we uxe mntena qpahun kana. 5So kiya de meeniq ta ckceka Kiristo de 1 ba heyi ta ma txtaxa ta we ida ta cida mggaluk hiya ka ita hbaro seediq. 6Mnoda ta huwe bnege na we ida ini pntena ka huwe bnege na. Duma na we rmengo kari pgeela, spooda ta snhiyan ta rmengo ta pgeela rmengo. 7Mqeepah na we pskingal qmeepah. Mptgeesa na we pskingal tmgesa. 8Uxe uri we mdudul we pskingal dmudul. Mpbege na we bale ba ooda. Mpqlahang na we kdrumuc qmlahang. Gmalu seediq na we tqqaras gmaalu.

Gaya Ooda Kndesan Seediq Kmtama

9Gnaalu we iya pnnangi gmaalu. Naqah we qnqihi ka naqah. Malu we sai smdaling. 10Gmalu namu mtswai we pggaalu bale. Psparu namu mita seediq we pttgeela msparu. 11Kdrumuc, iya kbserux. Ktilux lhebun ma qpahi Bukung klaali. 12Qqaras ckceka sntangan namu. Knremun ckceka mqraqil namu. Druni klaali. 13Ini doi ka mtswai we biqi. Sbleqi psteme sapah namu ka seediq mtnooda. 14Sbliqi ka seediq tmraqil yamu. Sbliqi ma iya syusi. 15Theyaq mqaras seediq ga mqaras. Theyaq lmingis seediq ga lmingis. 16Pntena lhebun namu. Iya psparu ka lhebun namu. Psbiciq ma iya kesa paru tunux mu ka yamu. 17Naqah we iya cyuki naqah. Malu mesa ka kana seediq we nduwa ba qmeepah. 18Nasi mtduwa daun de peeyah beyax su ma nduwa su msbleyaq theyaq kana seediq. 19Kana ita mtswai, iya knciyuk. Hdqani seang Utux Baro. Ado ga spatis Patis: “Rmengo ka Bukung: ‘Mciyuk na we yaku. Ida ku mciyuk.’” 20Uxe wano so kiya, “Nasi muure ka pais su de biqi uqun. Nasi mhqeni de pmahi. Ado noda su nii de, gisu su gmutu tahuc tunux na ka bagah puniq.” 21Maanu so kiya de iya pdgyali ka naqah, tmgiyal naqah ka malu.

Currently Selected:

Roma 12: Stgdaya

Highlight

Copy