Roma 11
11
Mnsngari Seediq Israel
1So kiya de mpsiling ku. Utux Baro we wada na sqada ka seediq na da peni? Ida uxe so kiya! Ado seediq ku Israel ka yaku uri. Lqlaqi mslutuc ku Abraham ma pneyah ku lutuc Binyamin. 2Utux Baro we ini na qdaani ka seediq na pnuglaan na mkela. Ini namu klai wada huwa mesa rmengo ka Eliyah gaga spatis Patis hiya peni? Wada huwa mesa mege qnquwan seediq Israel meeniq berah Utux Baro ka Eliyah, rmengo: 3“Bukung! Wada daha phqilun ka dmpgeela kari su, saan daha hmurah ka spuhan daha sunan. Wano yaku ka msngari. Knuudus mu we mkmngalun daha uri.” 4Kiya de Utux Baro we maanu ka cniyuk na heya ho? “Pnsngari mu kenan we 70'00 seediq. Dheya we ini thmuku Baal na.”: 5So nii saya uri. Mnoda huwe gneegan niqan ka seediq mtngari na. 6Nasi mnoda huwe we ida uxe mnoda malu qneepah. So kiya de uxe kesun huwe ka kiya da. 7Huwa ta kesun rmengo ho? Mnigin seediq Israel we, ini daha sndali. Kiya de seediq gnao ka wada mangal, kana mnsngari we mkere riyung. 8Mntena so pnatis Patis:
“Utux Baro we sbege na dheya ka mkuung lhebun.
Ini qita ka doriq,
ini qbahang ka birac,
betaq saya.”
9Rmengo ka Dawid:
“Uqun daha we pryuxi tlenga ma pryuxi durang,
pryuxi btunux skrbutan, cniyuk dheya!
10Tai so pqmani ka doriq daha, iya pqtai.
Braho su so maha pkrkerang ka hwinuk daha.”
Pkduusun ka Seediq Icil Qlhangan
11So kiya de mpsiling ku. Skripuc ka dheya we betaq mtakur ho? Uxe so kiya. Ado qnquwan daha wada mosa seediq icil qlhangan ka huwe pkuudus. So maha snhuur ka lhebun daha. 12Nasi qnquwan daha wada mbleyaq bale bobo dxeral ka dheya. Ini pttuku daha we wada pbleyaq seediq icil qlhangan. So kiya de pkuudus ka dheya ciida we ppeyah khenu qnbleyaq ho?
13Kiya de yamu seediq icil qnlhangan ka rngagan mu. Ado ngalun ku na snkgulan quri seediq icil qnlhangan ka yaku ma spruun mu ka qpahun mu, 14kiya we eeyux mu psnhuur ka klegan mu seediq Yudaya so maha pkdusun ka duma daha. 15Nasi sqada ka dheya de maha psbleyaq Utux Baro ka bobo dxeral. Wada ngngalun ka dheya we uxe ririh muudus peeyah hnqilan peni? 16Kiya de nasi mrtaso ka pang bgurah de maha mrtaso kana ka pang da. Nasi mrtaso ka gamil de maha mrtaso ka cida uri.
17Nasi wada gremun ka duma cida, isu curung bbuyu nii we wada pltudun hiya de maha msuupu maangal beyuq pneyah pusu curung. 18Maanu so kiya de iya psquri cmucac cida psparu ka quwaq su. Nasi psparu ka quwaq su de nasi su klaun uxe isu ka gaga lmekoh pusu. Pusu ka gaga lmekoh isu. 19Ida su mprengo: “Wada gremun ka cida we yaku ka pplutuc hiya.” 20Bale ba kiya. Ado ini snhii ka dheya, kiya de wada gremun. Ado snhii su ka isu ma kiya ka msdehu su mheyu. Iya psparu, kiicu. 21Ado Utux Baro ge, nasi na ini krwahi ka ncida we krwahun su na ka isu peni? 22Maanu so kiya de Utux Baro we mhuwe lhebun na ma uka mhmetan uri. Wada na uka mhmetan ka seediq mntakur. Mhuwe lhebun na we mquri yamu. Kiya de asi namu ka bsiyaq meeniq ckceka mhuwe lhebun na. Nasi namu ini so kiya de sqetun namu na uri. 23Maanu so kiya we nasi uxe bsiyaq ini snhii ka dheya we ida pltudun. Ado Utux Baro ka mtduwa plutuc dheya dungal. 24Yamu we snqetan pneyah curung bbuyu ida hmneru. Nasi namu na wada splutuc malu curung pnhuma de so ida ncida we uxe maha mgkala msleexan pplutuc na pusu daha nanak peni?
Maha Pkduusun Kana ka Seediq Israel
25Mtswai! Ini ku sruwa ini namu klai lneing nii. So namu uxe kmkela bale. Lneing nii we kiya ka duma seediq Israel we maha mtkere ka lhebun daha. Asi ka betaq stenge spegan ka seediq icil qnlhangan. 26So kiya de ppkdusun ka kana Israel. Mntena so ga spatis Patis,
“Mpeyah Sion ka bukung mpkuudus,
plaxun na peeyah sapah Yakobu ka kana ini thmuku Utux Baro:”
27“Nii we kiya ka pnsdhegan mu yaku ma dheya,
ciida de pkngalun mu ka qnquwan noda daha.”
28Squri malu kari we ado yamu wada mpais ka dheya. Squri ta gneegan we ado rudan daha cbeyo wada sgaalu ka dheya. 29Ado uka kmpryuxan ka pndungus ma pnlawa Utux Baro. 30Ini namu thei Utux Baro cuuxal han, saya de ado ini thei ka dheya de wada namu na sgaalu ka yamu da. 31Mntena so nii uri dheya saya we ini thei uri, kiya de so ka mnoda huwe skhuwe na yamu kkhwayun na ka dheya saya uri. 32Ado Utux Baro ge, khwayun na ka seediq we ga na qlangun ckceka ini snhii hiya ka hbaro seediq.
33Ah! Teyal kntruma ka knstenge, kkela ma knkela na!
Teyal ba uka qlingan smeung ka sneengan na!
Teyal ba uka klaan migin ka dapil ndaan na!
34Ima ka mkela lhebun Bukung ho?
Ima ka dmnayo pgkela heya ho?
35Ima ka wada plaale mege heya,
bobo na de cmiyuk ka heya ho?
36Ado kana ani maanu we pneyah heya,
sntama heya, mpnheya kana.
Tai so nheya ka knledax betaq ana knuwan. Ameng.
Currently Selected:
Roma 11: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
