Pntuura 16
16
Pngerah Seang Utux Baro
1Mnbahang ku paru hrenang mcriyu pneeyah Sapah Mrtaso Thmkuwan, ga mquri 7 snkgulan rmengo: “Osa, sai mopux maux bobo dxeral ka 7 pngerah ga stngayan seang paru Utux Baro.”
2Wada ka tgkingal snkgulan baro, mosa maux bobo dxeral. Kiya de dseediq niqan ngayan pnskraya ma thmuku tikung camac na we, hmeru luqah skenux ma melux ka heyi daha.
3Wada ka tg2 snkgulan baro, mosa mopux pngerah ckceka rcilung. Kiya de so dara seediq mnhuqil ka rcilung. Kana mnuudus ckceka rcilung we mhuqil kana da.
4Wada ka tg3 snkgulan baro, mosa mopux pngerah ckceka yayung ma pusu hrean qsiya. Kiya de wada asi so dara ka qsiya. 5Mnbahang ka snkgulan baro ga dmoi beyax mpqlahang we ga rmengo:
“Mrtaso ncbeyo ma nsaya,
pnseegan su we msderux noda.
6Ado wada pqluli dara dseediq snhii Utux Baro ma dmpgeela kari ka dheya,
say de gisu su pmahan dara uri.
Asi daha ka ngalun ka nii.”
7Qbhangan mu dungal ka hrenang pneeyah ckceka spuhan, ga rmengo:
“Bale ba, Bukung, Utux Baro Pusu Beyax,
pnseegan su we bale ba ma msderux noda!”
8Wada ka tg4 snkgulan baro, mosa mopux pngerah bobo hido. Kiya de mtduwa muduh seediq kntlexan na ka hido. 9Gisu thdagun kntlexan hido ka seediq, kiya de smngayan ngayan Utux Baro kiya ka ga dmoi pusu beyax qmlahang pqnaqah nii. Ini kmpriyux lnglungan ka dheya, ini daha biqi Utux Baro ka knledax uri.
10Wada ka tg5 snkgulan baro, mosa mopux pngerah tluungan camac. Wada asi kkuung ka qlhangan camac. Seediq we ado mnarux de ga qmiyuc hema daha. 11Ado knnarux daha ma, luqah heyi daha de, asi sngayan Utux Baro ga karac baro ka dheya. So ndaan daha we ini kmpriyux lnglungan daha uri.
12Wada ka tg6 snkgulan baro, mosa mopux pngerah bobo Euhrates paru yayung. Kiya de asi kdengu ka yayung. Kiya de gisu psramal elu qbsuran paru mmeeyah pneeyah nklaan hido. 13Taan mu dungal 3 bgihur mrutiq. Mntena qpatur cmnriyu pneeyah quwaq quyu ubung, pneeyah quwaq camac ma, pneeyah quwaq mnnangi mpgeela kari. 14Dheya we bgihur dbgihur naqah ma qmeepah pnskraya. Mosa dqbsuran paru bobo dxeral hiya, mosa psseli dheya mptgdiyal paru ali nuUtux Baro Mdoi Kana Beyax. 15Tai! Yaku we maha ku mntena so mpgeeguy meyah. So ka miiyo ma, mnlukus lukus na we niqan mbleyaq. Uxe mbberas mkkesa, uxe mpqita ka seediq qnsiqa na. 16So kiya de, 3 bgihur mrutiq nii we, psliun na Harmagedon kesun kari Hiburu ka dqbsuran paru.
17Wada ka tg7 snkgulan baro, mosa mopux pngerah karac. Kiya de niqan hrenang pneeyah tluungan ga meniq ckceka Sapah Mrtaso Thmkuwan, ga rmengo: “Mttuku da!” 18Kiya de niqan tqwilaq, hmrenang, mbruwa ma, paru ba runu. Pneeyah meniq bobo dxeral ka seediq we uka ka bale ka so nii knparu ma mnhemuc knpruwan ka runu. 19Wada mcelaq 3 ka paru alang. Kana alang qnlhangan we maha mtakur kana uri. Mkela Babirun alang paru nii ka Utux Baro, sbege na heya ka psaan sino ga stngayan seang paru na. 20Wada qduriq ka kana dxeral ckceka rcilung. Kana dgiyaq we ini qtai uri da. 21Niqan uri ka paru bale quyux huda mtuting heyi seediq pneeyah baro. Knchdilan na we yaa ba 1 tarantu. Ado pqqraqil pneeyah quyux huda nii de smngayan Utux Baro ka seediq, Ado paru riyung ka pnqraqil kiya.
Currently Selected:
Pntuura 16: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
