Pntuura 17
17
Paru Mqedil Kkbrexun ma Camac
1Ckceka ga dmoi 7 psan ka 7 snkgulan baro we, niqan 1 ka meyah rmengo yaku: “Aguh, pqtaun su mu pkdraun ka paru mqedil kkbrexun ga tleung bobo qsiya. 2Dqbsuran paru bobo dxeral we wada msuupu heya kmmhemuc msuupu. Dseediq meniq bobo dxeral we wada pbskanun sino hnmetan na msuupu uri.” 3Pdaun ku Bgihur Utux, desun ku na tadus brenux ka snkgulan baro. Taan mu ka 1 mqedil ga paapa bobo camac tqwilaq mtanah hiya. Camac kiya we niqan 7 tunux ma 10 urung. Kana heyi na we ga stngayan ngayan snngayan. 4Mqedil kiya we ga mlukus mtgdiyuc ma tqwilaq mtanah. Pdeping king, btunux qrari ma, mtumun bhege. Baga na we ga dmoi pngerah mahan snmalu king ga stenge qyqeya psaneq ma mrutiq hnmetan na msuupu. 5Kduruk na we ga spatis ngayan lneing, rmengo: “Babirun paru, bubu dmqedil kkbrexun bobo dxeral ma bubu kana qyqeya psaneq.” 6Taan mu dungal, mqedil kiya we, bsukan mnimah dara seediq mrtaso ma dara dseediq pgkela Yesu.
Mkluwi ku bale mita heya. 7Rmengo kenan ka snkgulan baro: “Hmuwa, ma su mskluwi ho? Srengo mu isu ka mqedil nii ma lneing camac 7 tunux ma 10 urung ga mapa heya. 8Camac qntaan su we, niqan ka cuxal, uka ka saya. Nexal de mpcriyu peeyah rangah uka pusu ma mpuuka. Kana mneniq bobo dxeral, ngayan daha we ini ptsani patis knuudus pneeyah snlmean we, maha mkluwi bale. Ado heya we niqan ka cuxal, uka ka saya ma, bobo na de ida mpniqan dungal. 9Quri nii we asi ka niqan knkela lmngelung ka lhebun ta, 7 tunux nii we, kiya ka dgiyaq ga tluungan mqedil. Kiya ka 7 qbsuran paru. 10Wada mtakur ka 5 da. Ga hiya ka 1 na. 1 we ini eyah na. Maha tnnais meyah ka heya. 11Ga niqan cuxal, ga uka saya de, kiya ka mg8 nii, heya we ga msuupu 7 nii uri, mquri mpuuka. 1210 urung qntaan su kiya we, kiya ka 10 qbsuran paru. Ini aangal qlhangan ka dheya na. Kiya de, dheya we maha mntena camac kiya maangal pusu beyax mpqbsuran paru 1 tuki. 13Dheya we ms1 lhebun daha sbege daha camac kiya ka pusu beyax daha. 14Dheya we mptgdiyal wawa miric. Maha mbeyax ka wawa miric. Ado wawa miric we bukung kana bukung, qbsuran paru kana qbsuran paru. Ga msuupu wawa miric we, kiya ka dseediq pnlawa, gneegan ma, malu stmaan.”
15Rmengo kenan dungal ka snkgulan baro: “Mqedil kkbrexun qntaan su we ga tlengun bobo qsiya. Kiya ka kana seediq, kana klegan seediq, kana qnlhangan ma, kana klegan kari. 1610 urung ma camac qntaan su we maha tmraqil riyung mqedil kkbrexun nii. Maha daha pbrasun ma so heya nanak, uqun daha ka heyi na ma qhdeun daha psqama puniq ka heyi na. 17Ado Utux Baro we, mdayo pskingal lhebun dqbsuran paru mooda lnglungan Utux Baro. Sbege daha camac kiya ka qnlhangan daha nanak. Betaq mtuura ka kari Utux Baro 18Mqedil qntaan su kiya we, kiya ka mpqlahang paru alang dqbsuran paru.”
Currently Selected:
Pntuura 17: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
