Matay 5
5
Malu Kari Tnugesa Dgiyaq
1Mita so nii hbaro ba seediq ka Yesu de, mosa bobo dgiyaq. Bobo tleung ka dheya, meyah heya ka tnugsaan na. 2Kiya de rmaguh quwaq na tmgesa dheya, rmengo:
Rmengo Qqbleyaq
(Ruk 6:20-23)
3“Mbleyaq ka seediq qrinuc lhebun!
Ado ndheya ka qnlhangan baro.
4Mbleyaq ka seediq naqah kuxul!
Ado psbyaxun ka dheya.
5Mbleyaq ka seediq mhenuk lnglungan!
Ado mpndheya ka dxeral.
6Mbleyaq ka seediq mhqeni ba migin psbale!
Ado ptngiun ka dheya.
7Mbleyaq ka seediq gmaalu seediq!
Ado sgaalu ka dheya.
8Mbleyaq ka seediq ini qnaqah lhebun!
Ado mqita Utux Baro ka dheya.
9Mbleyaq ka seediq mpsbale seediq!
Ado mplaqi Utux Baro ka dheya.
10Mbleyaq ka seediq ado ptbale gaga trqilan!
Ado ndheya ka Qnlhangan Baro.”
11“Ririh yaku, tmsiiyax rmengo yamu ka seediq, tmraqil yamu, smngayan rmengo ani maanu naqah kari yamu de mbleyaq ka yamu! 12Thhulis pqqaras, ado cniyuk ngngalun namu peeyah karac baro we msngari ba. Mpgeela yamu ka dmpgeela kari we wada daha kesun haya tmraqil uri.”
Timu ma Ledax
(Mrk 9:50. Ruk 14:34-35)
13“Timu namu bobo dxeral ka yamu. Nasi wada uka knrmenan na ka timu de huwa kesun pkremun dungal ho? Wano sqada nganguc ma qqahun seediq, uka ggrihan na. 14Ledax namu bobo dxeral ka yamu. Gaga spheyu bobo dgiyaq ka alang we ini tduwa liingun. 15Mcamo ka seediq we ini posa toma kulu seengan. Psaun na bobo pcmagan ma pkledax kana seediq tnsapah. 16Mntena so nii, ledax namu pldaxi berah seediq, so daha qqtaan ka malu ndaan namu. Kiya de maha tndahu mqaras Tama namu gaga baro.”
Rmengo Gaya
17“Meyah ku qmada gaya ma tnugesa dmpgeela kari, iya so kiya lmngelung. Uxe ku meyah qmada, meyah ku pttuku. 18Bale ba rngage maku, ana betaq mpkuuka ka karac ma dxeral ciida we, uxe sliqun ani tikuh ka gaya. Asi ka betaq mttuku kana. 19Maanu so kiya de, smeeliq 1 ani so tgbiciq bale nkari gaya pndakar hiya ma sttgesa na seediq dungal. Heya we tgbiciq bale meniq Qnlhangan Baro. Nasi so muyu gaya nii ka seediq ani ima ma sttgesa na seediq dungal. Heya we tgparu bale meniq Qnlhangan Baro. 20Kiya de rngage maku, nasi namu ini pgkala dmptpatis ma seediq Parisay ka knsdrexan namu, uxe namu mpteme Qnlhangan Baro.”
Rmengo Mseang
21“Wada namu bhangan ka kari rnengo na seediq cbeyo: ‘Iya phuqil seediq, ani ima phuqil seediq we ida daun psgao.’ 22Kiya de, yaku we mprengo ku yamu: So mseang quri mtswai na we ida pkdraun. Smngayan mtswai na ‘Uka dungus’ we bege prngagan pkdira. Smngayan mtswai na ‘mpunu’ we maha mangal puniq tuxan pkdraan. 23Kiya de, mege namu bbege bobo spuhan hiya ciida, nasi namu lmngelung qnriqu na sunan ka mtswai namu de, 24asi htii posa berah spuhan ka bbege ma osa plaale psbleyaq mtswai su. Kiya de yahi mege ka bbege su. 25Mkleelu namu ciida ka mbege qnnaqah sunan seediq we psbleyaq nhari heya han. Bbege su na seediq mpsgao, mpsgao de sbege su mpqlahang. Maha su lebun sapah kuung da. 26Bale ba rngage maku, betaq su ini qhedu pririh ka nhdean bale ani 1 pila we ida su uxe mplatac peeyah hiya.”
Rmengo Smhemuc Msuupu
27“Wada namu mbahang ka kari so nii: ‘Iya mmhemuc msuupu.’ 28Kiya de mprengo ku yamu: Ani ima qmnita lmngelung kmtheyaq mqedil, seediq nii we ida wada mmhemuc msuupu heya ka lhebun na da. 29Nasi pskripuc sunan ka narac doriq su, qrquri maangal ma qdaani. Ani su sqada ka 1 cida heyi su, nuuqu kika malu sqada su daha tuxan pkdraun ka kana heyi. 30Nasi skripuc sunan ka narac baga su we slapi ma qdaani. Ani su pkngalun ka 1 cida heyi su, nuuqu kika malu sqada su daha tuxan pkdraun ka kana heyi.”
Rmengo Mlaalix Mqedil
(Mat 19:9. Mrk 10:11-12. Ruk 16:18)
31“Niqan dungal ka kari so nii: ‘Ani ima maalix mqedil, asi ka spatis na patis mlaalix mqedil ka heya’. 32Kiya de rngage maku: So ka malix mqedil we nasi so bale ba mhemuc ka noda na, maha so wada biqan noda mmhemuc msuupu di. Ani ima wada mangal mqedil nlixan nii we mtena so mnoda mmhemuc msuupu duri.”
Rmengo Pnsdhegan
33“Wada namu bhangan ka kari rnengo seediq cbeyo: ‘Iya qberiq smdehu. Pnsdhegan namu quri Bukung we dai bale.’ 34Kiya de mprengo ku yamu ka yaku: Iya bale psdehu. Iya tiyu karac baro smdehu, ado karac baro we tluungan Utux Baro. 35Iya tiyu dxeral smdehu, ado dxeral we tspilan papak Utux Baro. Iya tiyu Yerusalem smdehu, ado alang nqbsuran paru ka kiya. 36Iya tiyu tunux su nanak smdehu uri, ado ini su dehuk pkbhege ma pkqalux ani 1 snuunux su ka isu. 37Kari namu we kiya de ida kiya. Uxe de uxe. Prabang namu rmengo de pneyah naqah kiya di.”
Rmengo Knciyuk
(Ruk 6:29-30)
38“Wada namu mbahang ka kari so nii: ‘Asi ka doriq ka mpririh doriq. Asi ka rupun ka mpririh rupun.’ 39Kiya de mprengo ku yamu ka yaku: Iya pcciyuk seediq naqah. Niqan seediq tmapaq narac dqeras su we, bqani heya ptpaqi ka iril dqeras su uri. 40Niqan ka seediq migin kari sunan, mkmaangal lukus su pstrmaun, bqani heya ka lukus su taro uri. 41Niqan ka seediq pkeyux ppkesa 1 miriong kksaun, suupu heya mkkesa 2 miriong ka isu. 42Niqan ka mesa ani maanu sunan, biqi heya. Niqan ka kmbarux sunan, iya hteri.”
Rmengo Gmaalu Pais
(Ruk 6:27-28, 32-36)
43“Wada namu mnbahang ka kari so nii: ‘Glaani ka ssiyo su, qnqihi ka pais su.’ 44Kiya de mprengo ku yamu ka yaku: Glaani ka pais namu, drnani ka seediq tmraqil yamu. 45Kiya de tduwa namu mlaqi Tama Baro ka yamu. Ado Heya we pthdagun na ka malu seediq, pthdagun na ka naqah seediq uri. Pqyexun na ka msderux ooda seediq, pqyexun na ka ini ksderux lnglungan seediq uri. 46Nasi wano ba seediq gmaalu yamu ka sgaalu namu, maanu ka snadu na ho? Uxe so kiya meepah ka dseediq maangal pila uri peni? 47Nasi wano ba mtswai namu ka thmkuwan namu, maanu ka mgkala qneepah namu ho? Uxe so kiya meepah ka dseediq icil uri peni? 48Kiya de, asi ka mttuku bale ka yamu. Mntena Tama namu gaga baro mttuku bale.”
Currently Selected:
Matay 5: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
