Matay 6
6
Rmengo Quri Mege
1“Qlahang ka yamu, iya mnnangi pqita knsttuxan namu berah seediq. Nasi so kiya de, uxe namu maangal snadu pneeyah Tama Baro.
2Maanu so kiya de, gmaalu namu mege seediq ciida, iya lawa seediq miyuk rapa berah su. Mntena so seediq mnnangi malu qneepah daha meeniq ckceka pssliyan ma ckceka elu ddaun alang. Mnnangi mangal pptndahu seediq ka dheya. Bale ba rngage maku, wada tena mangal snadu daha ka dheya da. 3Gmalu namu mege ciida, iya pklai iril baga su ka qneepah narac baga su. 4So su maha gmruus qmeepah gmaalu mege seediq. Kiya de Tama su gaga gmruus qmita, biqun su na snadu.”
Rmengo Ddurun
5“Dmurun namu ciida, iya pntena so seediq mnnangi malu. Smkuxul mheyu dmurun sapah pssliyan ma pstrengan elu paru ka dheya, ado ppqita daha seediq. Bale ba rngage maku, wada maangal snadu daha ka dheya da. 6Dmurun su ciida, osa tqiyan su, lebi rhengun druni tama su gnruus ini tai. Mqita ckceka gnruus ka Tama su ma bbiqun su na snadu. 7Dmurun namu ciida, iya pntena so seediq icil qnlhangan uka brihan ma pbberih kari daha. Egu ka kari de kiya ka qbhangun Utux Baro, mesa ka lnglungan daha. 8Iya puyu dheya, ado dmurun namu tgberah na ciida, tena mkela maanu ka pgsaun namu ka Tama namu.”
Dmurun Tnugesa Bukung
(Ruk 11:2-4)
9“Maanu so kiya de keso nii ka dmurun namu:
‘Tama nami gaga baro:
Tai so spruun kana seediq ka mrtaso ngayan su.
10Tai so meyah ka tlangan su.
Tai so mttuku bobo dxeral ka lnglungan su,
pntnaani so gaga baro.
11Braho su uqun nami klaali we biqi nami hiya ali saya.
12Srwai nami haya ka kusa nami,
mntena so smruwa miyan kusa seediq.
13Iya nami pstrngaani pnseengan.
Pltadi nami pkuudus peeyah bgihur naqah.
Ado qnlhangan, beyax ma, knledax we ida nisu,
betaq ani knuwan. Ameng!’”
14“Nasi namu smruwa qnquwan seediq, mpsruwa yamu ka Tama namu baro uri. 15Nasi namu ini sruwa qnquwan seediq, uxe mpsruwa qnquwan namu ka Tama namu baro uri.”
Rmengo Ptgaya Ini Ekan
16“Ptgaya namu ini ekan ciida, iya pntena seediq nnnangi malu so msurung taan ka dqeras daha. Ado mnseung pksurung taan dqeras daha, ppkela seediq gisu ptgaya ini ekan ka dheya. Bale ba rngage maku, wada daha ngalun ka snadu da. 17Ptgaya su ini ekan ciida, rcuhi abura ka tunux su ma trmai dqeras su uri. 18Iya pklai seediq ka gisu su ptgaya ini ekan. Wano pqtani Tama su ga meniq gnruus. Qmita ckceka gnruus ka Tama su we mbege snadu sunan.”
Rmengo Pila Ga Baro
(Ruk 12:33-34)
19“Iya wano rrihun namu nanak ka sgutu namu dnoi bobo dxeral. Niqan kuyi mekan, niqan sgrangan. Niqan ka mpgeeguy na mpgleing kmremux meyah gmeeguy. 20Rrihun namu nanak we gtaani baro ka dnoi namu. Hiya we ini uqi kuyi ma ini sgrangi. Uka ka mpgeeguy na gnbeling kmremux meyah gmeeguy. 21Ado gaga inu ka dnoi namu we ga hiya ka lhebun namu uri.”
Camo Heyi ka Doriq
(Ruk 11:34-36)
22“Camo heyi we doriq. Maanu so kiya de nasi mledax ka doriq su we mpttuku ledax ka kana heyi su. 23Nasi msurung ka doriq su we mnkuung bale ka kana heyi su. Kiya de nasi mnkuung ka ledax su ckceka de maha khenu knparu ka kkuung kiya di!”
Rmengo Utux Baro ma Pusu Ddoi
(Ruk 16:13)
24“Qmeepah 2 tnpusu sapah ka seediq we ini tduwa. Ado pqnqihun na ka 1 ma maha na sgaalu ka 1. Uxe uri we spruun na ka 1 ma sbciqun na ka 1. Qmeepah namu Utux Baro uri we, ini namu tduwa qmeepah Mamon uri.”
Iya Pslhebun
(Ruk 12:22-31)
25“Maanu so kiya de rngage maku, iya pslhebun knuudus namu meekan ta maanu miimah ta maanu duri we mplukus maanu ka heyi namu. Uxe mgkala uqun ka knuudus peni? Uxe mgkala lukus ka heyi peni? 26Qtai ka qbheni nii. Ini tukuy, ini qburung gaga skiya baro, ini gutu uqun repun uri. Ani so kiya we ida ga tbugan Tama namu ga baro ka dheya! Uxe namu mgkala qbheni gaga karac baro ka yamu peni? 27Ima namu ka mtduwa pooda pnslhbenan namu mumal pbbaro tikuh knuudus namu ho? 28Ma namu pslhebun quri lukus? Tlleus bale mita, huwa mesa mdakil ka boxi gaga bbuyu. Ini qbqerus ma ini salu ware uri. 29Kiya de rngage maku, quri knledax nniqan na Selomoh ciida we so ka pnlukus na ini pnkala 1 phepah nii na! 30Ah! Yamu nii seediq biciq ba snhiyan! Nii muudus saya ma qada psqmaan so kusun ka speriq bbuyu we ida plkusan Utux Baro. Nasi so kiya de maha so maanu ka pndpingan na yamu ho? 31Maanu so kiya de, iya pslhebun rmengo: ‘Meekan ta maanu? Miimah ta maanu?’ ‘Mpplukus ta maanu?’ 32Ado nii we pgsaun bale seediq icil qnlhangan. Kana ngngalun namu so nii we mkela ka Tama namu ga baro. 33Pllai mesa ka qnlhangan Tama ma knsderux na han. Kiya de umal namu na mege yamu ka kana so nii. 34Maanu so kiya de, iya pslhebun quri kusun. Kusun we ida niqan nanak pslhbenun kusun. Mqriqu daan 1 ali we baka nanak 1 ali kiya di.”
Currently Selected:
Matay 6: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
