Matay 4
4
Pspeengan Quri Naqah ka Yesu
(Mrk 1:12-13. Ruk 4:1-13)
1Ciida, ddudul Bgihur Utux mosa tadus brenux ka Yesu, pseung bgihur naqah. 2Bobo ptgaya ini ekan 40 ali ma 40 rabi de muure ka Yesu. 3Meyah ka mpsseung na rmengo heya: “Nasi su bale su laqi Utux Baro ka isu we rngagi btunux nii so maha mupang.” 4Cmiyuk rmengo ka Yesu: “Ga spatis ka Patis:
‘Uxe wano pang nanak ka skuudus seediq,
wano ba smtama kana kari pneeyah quwaq Utux Baro.’”
5Bobo na, Qbsuran Bgihur Naqah we desun na alang mrtaso ka Yesu, phyegun na ludux rusuq Sapah Thmkuwan, 6rmengo heya: “Nasi su laqi Utux Baro ka isu we pstaril toma peeyah hini! Ado ga spatis Patis:
‘Ririh isu, Bukung we mpskagul snkgulan na,
mdoi baga na gmnama sunan,
so uxe mptebuk btunux ka papak su.’”
7Rmengo heya ka Yesu: “Ga spatis Patis hiya uri: ‘Iya psseung Bukung, Utux Baro su.’” 8Desun na pngepung ba dgiyaq ka Yesu dungal Qbsuran Bgihur Naqah, spqita na heya ka kana qnlhangan ma knledax bobo dxeral. 9Kiya de rmengo heya: “Nasi su tmbqelic thmuku kenan de bege mu sunan kana ka nii.” 10Rmengo heya ka Yesu: “Satang, osa! Ado ga spatis Patis:
‘Asi su ka thmuku Bukung, Utux Baro su,
wano heya ka qqpahun su.’”
11Kiya de smwaye Yesu ka Qbsuran Bgihur Naqah. Tai, niqan ka snkgulan baro meyah smbleyaq heya.
Gmarang Kari Galil
(Mrk 1:14-15. Ruk 4:14-15)
12Yesu we mbahang wada qrapun ka Yohane, kiya de meyah Galil. 13Bobo na, mlatac peeyah Najare, mosa Kaparnaom meeniq hiya. Ga ssiyo rcilung Kaparnaom quri dxeral Jebulon ma Naptaliy. 14So nii we kika mmaha pbale kari rnengo Isaya mpgeela kari:
15“Dxeral Jebulon ma dxeral Naptaliy,
elu ssiyo rcilung, sipo nklaan hido yayung Yarden,
Galil ga niqan seediq icil qnlhangan,
16dseediq ga tleung ckceka kuung,
qmnita paru ledax.
Dseediq ga tleung ckceka dxeral mhuqil,
mpniqan ledax mpledax dheya.”
17Peeyah ciida, prading gmarang kari ka Yesu, rmengo: “Pryuxi lnglungan namu! Ado smdaling ka Qnlhangan Baro da!”
Mlawa 4 Mptqcurux
(Mrk 1:16-20. Ruk 5:1-11)
18Mkleelu mkkeesa ssiyo rcilung Galil ka Yesu, taan na 2 heyi mtswai. Kiya ka Petros kesun ka Simon ma mtswai na Andreas. Gisu pkadi qcurux rcilung ka dheya. Dheya we mptqcurux. 19Rmengo dheya ka Yesu: “Eyah smnegul kenan! Ngalun maku mpkadi maangal seediq ka yamu.” 20Asi daha laxi ka kadi daha ma smnegul Yesu. 21Mosa peeyah hiya mquri berah mkkesa ka Yesu, taan na ka 2 mtswai dungal. Kiya we Yakobu laqi Cebeday ma mtswai na Yohane. Gisu meeniq truma asu msuupu tama na Cebeday cmapang kadi. Mlawa dheya ka Yesu. 22Kiya de asi daha htii malix hiya ka asu ma tama daha ma smnegul Yesu.
Gmarang Kari
(Ruk 6:17-19)
23Mooda mtqiri kana dxeral Galil ka Yesu. Meeniq knkingal sapah pssliyan hiya tmgesa seediq. Ani inu mooda tmgesa malu kari, pklmeun na ka lmlamu mnarux ma lmlamu sknarux daha hbaro seediq. 24Mkgarang kana Suria ka ngayan na. Desun daha heya ka kana mnarux, kiya we ga hlidun lmlamu narux ma mqraqil, ga qrapun bgihur naqah, mrunge ma ini pklgelu heyi. Wada pklmeun Yesu kana ka dheya. 25Maanu so kiya de meyah smnegul Yesu ka ani kana knhbaro bale seediq pneyah Galil, Dekapolis, Yerusalem, Yudaya ma thngali yayung Yarden.
Currently Selected:
Matay 4: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
