Matay 27
27
Sbege Daha Pilatos ka Yesu
(Mrk 15:1. Ruk 23:1-2. Yoh 18:28-32)
1Dehuk mgrebu caman, kana dpusu msapuh ma rdrudan qmlahang Yudaya we mpprengo pphuqil Yesu. 2Bkean daha ka Yesu ma saan daha mege Pilatos mpdudul.
Mhuqil ka Yehudah
(Qne 1:18-19)
3Ciida, qtaan wada ngalan niqan qnquwan seediq ka Yesu de Yehudah bnaruy Yesu mnberih ka lnglungan na. Kiya de saan na pbrinah mege 30 kretan pila ka dpusu msapuh ma rdrudan, 4rmengo: “Niqan qnquwan mu ka yaku da, wada ku phuqil dara seediq uka qnnaqah!” Rmengo ka dheya: “Uka pnugluban nami ka nii da. Tai nanak isu kiya da!” 5Yehudah we sqada na truma Sapah Thmkuwan ka pila, kiya de wada mosa cghuur. 6Dpusu msapuh we ngalun daha ka pila ma rmengo: “Pila dara ka nii, ini tduwa psaun skuwan pila Sapah Thmkuwan.” 7Kiya de mpprengo ka dheya ma pila nii we sbaruy daha qnpahan mpsmalu habung. Dxeral nii we ngalan daha habung seediq mtnooda. 8Maanu so kiya de betaq saya ida daha kesun ‘qnpahan dara’ ka qnpahan nii na. 9Nii we gisu mpbale kari rnengo Yirmeyah mpgeela kari: “Maangal 30 kretan pila ka dheya. Pila nii we sneengan dseediq Israel bbaruy daha heya. 10Maruy qnpahan mpsmalu pngerah. So nii we kika pnuyu mu kari dnurun Bukung.”
Psiling Berah Pilatos
(Mrk 15:2-5. Ruk 23:3-5. Yoh 18:33-38)
11Mheyu berah qbsuran mdudul ka Yesu ma smiling heya ka qbsuran mdudul: “Isu we qbsuran su paru seediq Yudaya ho?” Rmengo ka Yesu: “Rnengo su nanak.” 12Pgkela qnnaqah ka dpusu msapuh ma rdrudan mpqlahang we ini ciyuk ani 1 kari ka heya. 13Kiya de rmengo heya ka Pilatos: “So nii egu ba pnugkela qnnaqah rnengo daha ndaan su we ini su bhangi ho?” 14Ani 1 kari ini ciyuk ka Yesu. Kiya de mskluwi ka Pilatos.
Ngalan Mndungus Phqilun
(Mrk 15:6-15. Ruk 23:13-25. Yoh 18:39-19:16)
15Knkingal smseman hrnasan ciida, Pilatos we spooda na pnesa seediq rraguh na ka 1 seediq ga shetur ma sbege na dheya. 16Ciida, niqan 1 ka seediq niqan ba ngayan ga shetur hiya, ngayan na we Barabbas. 17Maanu so kiya de msseli ka hbaro seediq ciida, smiling dheya ka Pilatos: “Ima ka kuxul namu rraguh mu yamu ho? Ye Barabbas ho? Uxe uri we Kiristo Yesu ho?” 18Mkela ka Pilatos, dheya we mnoda qnriqu daha kiya de sbege daha ka Yesu. 19Tleung tluungan psgeegan ciida ka Pilatos, smkagul seediq rmengo heya ka mqedil na: “Iya dayak ani maanu quri msderux seediq nii. Ado yaku we wada ku sddema heya ckceka sepi mu skeeman.” 20Ado dpusu msapuh ma rdrudan mpqlahang we dmudul hbaro seediq mesa Barabbas ma pphuqil Yesu. 21Rmengo dheya ka qbsuran mdudul: “2 seediq nii we tgiinu ka kuxul namu rraguh mu yamu ho?” Cmiyuk rmengo ka dheya: “Barabbas!” 22Rmengo dheya ka Pilatos: “So kiya de Yesu kesun Kiristo we huwa mu kesun da ho?” Rmengo ka kana: “Pttei jyujika ka heya!” 23Rmengo ka Pilatos: “Hmuwa, maanu bale ka naqah qneepah na ho?” Kiya de krrinah mdiras ka dheya: “Pttei jyujika ka heya!” 24Uka bbrahan ka nii, ani asi rengo ka Pilatos krinah mbrebur ka seediq. Kiya de mangal qsiya trima baga berah hbaro seediq, rmengo: “Qnnaqah pqluli dara seediq nii we uxe yaku. Yamu nanak!” 25Cmiyuk rmengo ka kana knhbaro seediq: “Ppaani yami ma lqlaqi miyan ka hnqilan na!” 26Kiya de sraguh na dheya ka Barabbas. Yesu de, bobo wada na sbetun de sbege na seediq ptteun jyujika.
Tmsiyax Yesu ka Supi
(Mrk 15:16-20. Yoh 19:2-3)
27Ciida supi qbsuran mdudul hiya we desun daha sapah qbsuran mdudul hiya ka Yesu. Psseli daha mlawa mtqiri ssiyo na ka kana rahul supi. 28Ngali daha hiya ka lukus na ma hlawan daha pala rila mtanah. 29Dungal we pkbnuhan daha bunuh knadi daha pako ma narac baga na we pdooyan daha brhengil. Tmbqelic berah na tsyaxan daha rmengo: “Tai so mpkuudus ani betaq knuwan! Qbsuran paru seediq Yudaya!” 30Dungal we truqan daha ma mangal brhengil ma ssebuc daha tunux na. 31Mhedu tsyaxan daha de lhelah daha ka pala rila ma plkusan daha ida nlukus na, desun daha ma saun spteetu jyujika.
Spteetu Jyujika ka Yesu
(Mrk 15:21-32. Ruk 23:26-43. Yoh 19:17-27)
32Mlatac ka dheya ciida sterung 1 seediq Kurenaios Simon. Pskyexi daha ppheal jyujika Yesu. 33Dehuk Golgota, kiya we dxeral rngerang qrari tunux kesun ka dheya de, 34Sbege daha Yesu ka sino pnugmaxan mngihur. Wada tmunguh ma ini sruwa mimah. 35Wada daha ptteun jyujika ka Yesu. Bobo na de pooda pnsnakan qreti ma pssugun daha ka lukus na. 36Kiya de tleung hiya ka dheya ma qmlahang Yesu. 37Psaun daha bobo tunux na ka patis pnkela qnnaqah na. So nii ka pnatis: “Nii we Yesu, qbsuran paru seediq Yudaya.” 38Ciida, niqan ka daha seediq mpgeeluk gmeeguy msupu Yesu spteetu daha jyujika meniq narac 1 ma iril na ka 1. 39Moda mkkesa hiya ka seediq we tmsiiyax heya. Mkuwak tunux daha, rmengo: 40“Mphurah Sapah Thmkuwan ma phyegun su mk3 ali dungal we pkdusi ka isu nanak han! Nasi su bale laqi Utux Baro we ktuting peeyah jyujika!” 41Tghulis rmengo so nii uri ka dpusu msapuh msuupu dmptpatis ma rdrudan mpqlahang: 42“Ma na dhekan pkuudus ka seediq ma ini na dheki pkuudus ka heya nanak! Heya we qbsuran paru Israel, nasi su mtuting peeyah jyujika saya de mpsnhii nami ka yami da! 43Smtama Utux Baro ka heya. Nasi smkuxul heya ka Utux Baro we pkdusun na saya! Ado rmnengo ka heya: ‘Laqi ku Utux Baro.’” 44Msuupu heya pteetu jyujika ka seediq mpgeeluk gmeeguy we mntena so nii tmsiiyax heya uri.
Mhuqil ka Yesu
(Mrk 15:33-41. Ruk 23:44-49. Yoh 19:28-30)
45Peeyah ceka naali mnkuung ka kana bobo dxeral yaa ba betaq 3 cenga toke. 46Dehuk 3 toke de paru ba quwaq na mdiras mlawa ka Yesu: “Eriy! Eriy! Rama sabakutani?” Kiya de: “Utux Baro, Utux Baro, hmuwa, ma saku laxan?” 47Mbahang so nii ka duma ga mheyu hiya ka seediq de rmengo: “Seediq nii we ga mlawa Eliyah!” 48Kiya de asi ttalang mosa ka 1 seediq ckceka daha, mangal wata mhenuk pttkui na rmebu sino tgbasi ma psaun na ludux brhengil kmpmahun na Yesu. 49Kiya de rmengo ka duma daha: “Iya han, qtae ta yaa uxe meeyah pkuudus heya ka Eliyah ho?” 50Kiya de texal dungal paru ba quwaq na mdiras ka Yesu ma msetuq hengak na da. 51Tai, mtg2 msgaliq peeyah baro betaq truma ka pala pntaayus ckceka Sapah Thmkuwan, mrunu ma mkceyax ka tasil. 52Mtraguh ka habung uri ma hbaro ba wada mhuqil ka dseediq Utux Baro we wada pkdusun. 53Bobo mnuudus peeyah hnqilan ka Yesu de mlatac peeyah habung ka dheya ma mremux mrtaso alang mtqita hbaro ba seediq. 54Qbsuran 1'00 supi ma msuupu heya qmlahang Yesu ka supi we qmita runu ma ani maanu ndaan so nii miicu bale ma rmengo: “Seediq nii we bale ba laqi Utux Baro!” 55Qmita peeyah theya ka hbaro mqedil ga meniq hiya. Dheya nii we snbleyaq Yesu smnegul pneyah Galil. 56Ckceka dheya hiya we Maria seediq Magdalene, Maria bubu Yakobu ma Yosehu. Dungal we bubu laqi Cebeday.
Smeku Heyi Yesu
(Mrk 15:42-47. Ruk 23:50-56. Yoh 19:38-42)
57Gbiyan de meyah ka Yosehu kesun mbleyaq seediq pneeyah Yalimatay. Tnugsaan Yesu ka heya uri. 58Mosa berah Pilatos ka heya ma mesa heyi Yesu wada mhuqil. Kiya de, bqani mesa ka Pilatos. 59Yosehu we ngalun na ka heyi Yesu ma lbuun na galiq bhege malu ba ware keguy. 60Skuun na bgurah habung na, habung nii we gnqeran tasil. Tdroyun na ka 1 paru ba tasil gmeemuk rhengun habung. Kiya de wada da. 61Maria seediq Magdalene ma taxa na hiya dungal ka Maria we mege berah habung tleung hiya ciida.
Qlhangan ma Pgdehu Btunux
62So kusun, kiya ka bobo ali psrmalan, msseli Pilatos hiya ka dpusu msapuh ma seediq Parisay, 63rmengo: “Qbsuran, muudus ciida ka mpsridil seediq gaga we rmnengo: ‘Bobo mk3 ali de mpkuudus ku dungal.’ 64Maanu so kiya de braho su ba skguli seediq betaq mk3 ali pgdehu ba qmlahang bqerus. Maha yahun gmeeguy tnugsaan na ka heyi duma, kiya de mprengo seediq sa: ‘Wada muudus peeyah hnqilan ka heya da.’ Kari so nii we mpgkala pnlaale maha krinah ba psridil seediq!” 65Rmengo dheya ka Pilatos: “Yamu we niqan namu supi mpqlahang. Skguli ma pdai beyax namu pgdehu ba qmlahang!” 66Mosa ka dheya de, qhdei daha gmemuk ka btunux habung. Kiya uri we madis mpqlahang na meyah pgdehu ba qmlahang.
Currently Selected:
Matay 27: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
