Matay 26
26
Migin Phqilan Yesu
(Mrk 14:1-2. Ruk 22:1-2. Yoh 11:45-53)
1Mnhedu rmengo kana kari nii ka Yesu de rngagan na ka tnugsaan na,: 2“Ida namu klaun bobo mk2 ali de smseman hrnasan da. Laqi seediq we bbrigun daha ptteun bobo jyujika.” 3Msseli nganguc sapah Kayapas kesun pusu msapuh ciida ka dparu msapuh ma rdrudan mpqlahang. 4Mpprengo huwa ta kesun qmerac ka Yesu ma phuqil heya. 5Kiya de rmengo ka dheya: “Pkelu smseman we ini tduwa. Maha mrrudu mbrebur ka ckceka seediq di?”
Rcuhan Abura Meeniq Betania
(Mrk 14:3-9. Yoh 12:1-8)
6Yesu we meniq Betania sapah Simon mnnarux msburo heyi ciida, 7Meyah hiya ka 1 mqedil madis rusuq ga psaan mkere ba brigan ricuh malu sknexan. Mekan hnpure ciida ka Yesu we sheruy na tunux na ka ricuh malu sknexan. 8Kiya de mita so nii ka tnugsaan na de mseang rmengo: “Maanu ba ka snhaya su smeeliq nii ho? 9Tduwa brigun egu ba pila ka malu sknexan nii ma ddayo ta seediq qrinuc!” 10Klaun Yesu ka nii de rmengo dheya: “Hmuwa, ma namu pqnqihun kuxul ka mqedil nii ho? Malu ba 1 qneepah na gaga heyi mu. 11Ida msuupu yamu klaali ka seediq qrinuc. Kiya de ini namu hari psuupu kenan ka yamu. 12Hmeruy ricuh malu skenux heyi mu ka mqedil nii we gisu psramal sseku kenan. 13Bale ba rngage maku, ani inu grangan malu kari meeniq bobo dxeral, ida namu asi ka srengo bale ka qneepah na, so uxe daha cchungi ka heya.”
Maruy Yesu ka Yehudah
(Mrk 14:10-11. Ruk 22:3-6)
14Ciida 12 heyi 1 na hiya ka Yehudah seediq Iskariot kesun we mosa dpusu msapuh, 15rmengo: “Nasi mu brigun yamu ka Yesu we piya ka bege namu kenan ho?” Kiya de biqan daha 30 kretan pila. 16Peeyah ciida ka Yehudah we migin ba ali bbege na dheya ka Yesu.
Mtheyaq Tnugsaan Smseman Hrnasan
(Mrk 14:12-21. Ruk 22:7-14, 21-23. Yoh 13:21-30)
17Prading ali smseman pang ini psai tgeda we meyah smiling Yesu ka tnugsaan na, rmengo: “Maha inu ka ssaun nami psramal uuqan su smseman hrnasan ho?” 18Rmengo ka Yesu: “Osa alang ma osa 1 seediq hiya, rngagi ka heya: ‘Rmengo ka mptgesa: Daling ka ali mu da. Yaku we mpsuupu ku tnugsaan mu mekan smseman hrnasan sapah su hiya.’” 19Muyu rnengo Yesu ka dheya wada mchaya ka tnugsaan na ma mhedu psramal smseman hrnasan. 20Gbiyan de msuupu 12 tnugsaan na tleung uqan ka Yesu. 21Gisu msuupu mekan ciida, rmengo ka Yesu: “Bale ba rngage maku. Ckceka namu niqan 1 ka mbaruy kenan.” 22Kiya de naqah ba kuxul ka tnugsaan na duma mssunegul smiling heya: “Bukung, ya uxe yaku ho?” 23Cmiyuk rmengo ka Yesu: “Mnsuupu kenan rmebu baga pngerah sara we kika mbaruy kenan. 24Ani kesun mphuqil ka Laqi seediq, mntena so quri ga spatis Patis ka heya. Kiya de smtali ba bale ka seediq gaga mbaruy Laqi seediq! Quri so heya we nuuqu malu ini tuting ka heya!” 25Rmengo ka Yehudah mbaruy Yesu: “Mptgesa, yaku ho?” Cmiyuk rmengo heya ka Yesu: “Ida so kari su.”
Pheyu Uqun Gbiyan nBukung
(Mrk 14:22-26. Ruk 22:15-20. 1 Kor 11:23-25)
26Mekan ka dheya ciida, mangal pang ka Yesu. Mhedu mqaras Utux Baro de gbingun na ma sbege na tnugsaan na. Rmengo: “Aangal, nii ge heyi mu.” 27Dungal we mangal pngerah mahan ka Yesu. Mhedu mege mqaras Utux Baro de sbege na dheya ma rmengo: “Kana namu we mahi ka pngerah mahan nii. 28Ado Nii we dara mu pnsdhegan. Ririh hbaro ba seediq ssruwa qnquwan ka qluli dara mu. 29Kiya de rngage maku. Betaq ku ali mpsuupu yamu mimah bgurah sino meniq ku qnlhangan Tama mu ciida, peeyah saya uxe ku miimah pnughei lipas sino nii.”
30Mnuuyas uyas ka dheya, kiya de mlatac mosa Dgiyaq Curung.
Pgeela Dmeqo kari ka Petros
(Mrk 14:27-31. Ruk 22:31-34. Yoh 13:36-38)
31Ciida, rmengo dheya ka Yesu: “Keeman kiya ge ririh yaku mptakur namu kana ka yamu. Ado so nii ka ga spatis Patis:
‘Sbetun mu ka mtabu,
pggalang ka rahul miric da.’
32Ani so kiya, bobo ku muudus peeyah hnqilan, maha ku mplaale yamu mosa Galil.” 33Cmiyuk rmengo heya ka Petros: “Ani mtakur sunan ka kana we ida ku uxe mptakur ka yaku!” 34Rmengo heya ka Yesu: “Bale ba rngage su mu. Berah qnqugu rodux keeman kiya de mpn3 su dmeqo kenan.” 35Rmengo ka Petros: “Asi ku ka msuupu sunan mhuqil we uxe ku ba mdeqo sunan!” So nii rnengo kana ka tnugsaan.
Dmurun Meeniq Kesamani
(Mrk 14:32-42. Ruk 22:39-46)
36Msuupu tnugsaan na mosa Kesamani kesun ka Yesu, rmengo tnugsaan na: “Tleung hini ka yamu. Maha ku dmurun thngali hiya.” 37Kiya de desun na msuupu hiya ka Petros ma 2 laqi Cebeday. Kiya de prading naqah kuxul na mngihur bale lnglungan na. 38Kiya de rmengo dheya: “So ku nii mphuqil ba qnnaqah ka kuxul mu. Tara hini ma suupu kenan miiyo!” 39Kiya de mosa tikuh thngali ma tgtemaq dmurun: “Tama mu, nasi mtduwa ge phrinas peeyah kenan ka pngerah mahan nii! Kiya de iya puyu lnglungan mu. Puyu nanak lnglungan su.” 40Kiya de meyah berah tnugsaan na hiya ka Yesu, taan na gisu mtaqi ka dheya da. Kiya de rngagan na ka Petros: “Ini namu tduwa msuupu kenan miiyo ani tnnais ho? 41Kiiyo ma druni so uxe ptuting pnsrdilan. Ani nak mbeyax ka lnglungan namu, muuwic ka heyi namu.” 42Wada dungal ka Yesu, dmurun rmengo: “Ah! Tama mu, nasi ini tduwa mlatac peeyah kenan ma asi mu ka mahun ka mahan nii de seung nanak lnglungan su!” 43Kiya de meyah mbrinah dungal ka Yesu, taan na nii mtaqi ka dheya na. Ado mchedil ka doriq daha. 44Kiya de asi na laxi hiya ka dheya ma mn3 na hiya mosa dmurun dungal ma ida mntena ka rnengo na. 45Maanu so kiya de meyah brinah berah tnugsaan na ma rmengo: “Ye namu mpqtaqi ma mpsange namu na ho? Tai, smdaling ka ali da. Laqi seediq we bbrigun baga seediq niqan qnquwan. 46Tutuy, nita da! Tai, gisu meyah hini ka seediq mbaruy kenan da!”
Qrapun ka Yesu
(Mrk 14:43-50. Ruk 22:47-53. Yoh 18:3-12)
47Ida kiya rmengo ka Yesu na we meyah ka Yehudah 1 seediq ckceka daha 12 tnugsaan. Msuupu heya ka dmoi hlmadac ma qhuni ani kana knhbragan ka seediq snkgulan dpusu msapuh ma rdrudan mpqlahang. 48Tena mprengo pnugkela daha ka seediq mbaruy. Rmengo: “Ima ka tnuguhun mu quwaq we kika heya. Yamu de qerac ka heya.” 49Yehudah de asi osa berah Yesu, rmengo: “Mptgesa, mbeyax su ho?” Kiya de tnguhan na quwaq ka heya. 50Rmengo heya ka Yesu: “Dangi, qmqpahun su ge dai nhari!” Ciida meyah ka dseediq ma posa baga daha qmerac heya. 51Tai, ga msuupu Yesu ka taxa seediq. Tai, hmkero baga hmgeluq hlmadac ka heya ma smipaq 1 tnqliyan paru msapuh ma slapi na hiya ka icil birac na. 52Rmengo heya ka Yesu: “Hlmadac su we yqani rudu na. Ado dmoi hlmadac we ida phqilun hlmadac uri. 53Lnglungan namu, ye ku ini tduwa mesa tama mu smkagul knssaya kenan hini ka mgkala 12 rahul snkgulan baro ho? 54Nasi so kiya de maha huwa mesa mpbale ka kari ga spatis Patis da ho? Asi ka mooda so nii.” 55Rmengo hbaro ba seediq ciida ka Yesu: “Maadis namu hlmadac ma qhuni meyah qmerac kenan. Mntena namu so hari nii mqerak mpgeeluk gmeeguy seediq ka yamu ho? Mnsuupu ku yamu klaali meniq Sapah Thmkuwan tmgesa seediq. Ini namu qerac kenan han. 56Kana wada so nii we maha pbale ba kari dmpgeela kari.” Ciida, wada malix Yesu qduriq kana ka tnugsaan na da.
Psiling Berah Prngagan Ka Yesu
(Mrk 14:53-65. Ruk 22:54-55, 63-71. Yoh 18:13-14, 19-24)
57Seediq qmnerac Yesu we desun daha Kayapas paru msapuh hiya ka Yesu. Tena ga msseli hiya ka dmptpatis ma rdrudan mpqlahang. 58Smtheya smnegul Yesu ka Petros betaq nganguc sapah paru msapuh. Kiya de mremux ckceka hiya ma msuupu dmpqlahang tleung qqita na mhuwa mesa. 59Dpusu msapuh ma kana seediq prngagan we migin mberiq pgkela qnnaqah Yesu pphuqil daha heya. 60Ani hbaro ba ka seediq meyah mberiq pgkela we ini sdiyal ani maanu. Kiya de mghiti ba de meyah ka 2 seediq, rmengo, 61“Rmnengo kari so nii ka seediq nii: ‘Tgklaun mu hmurah ka Sapah Thmkuwan nuUtux Baro, kiya we mk3 de pheyu mu smalu dungal.’” 62Mheyu ka paru msapuh ma rmengo Yesu: “Seediq nii pnugkela daha qnquwan su we, uka ka cciyuk su ho?” 63Kiya de mgmelux ka Yesu. Rmengo dungal ka paru msapuh: “Poda mu Utux Baro smdehu, rngagi nami, isu we Kiristo laqi Utux Baro ho?” 64Rmengo ka Yesu: “Ida so kari su. Kiya de rngage maku:
Thiti de mpqita namu Laqi Seediq
tleung narac paru beyax,
paapa plabu karac baro meyah.”
65Kiya de smgaliq lukus na ka paru msapuh, rmengo: “Smeeliq smngayan Utux Baro ka heya! Malux asi ka niqan mpgkeela seediq dungal ho? Qnbhangan namu saya ka kari na smngayan. 66Huwa mesa ka lnglungan namu ho?” Cmiyuk rmengo ka dheya: “Mnuglengu phqilun ka heya!” 67Kiya de dheya we tmuruq dqeras Yesu, tmkemu baga beebu. Duma seediq we smebuc dqeras na uri, 68rmengo: “Kiristo! Pquri yami rmengo kari pgeela! Ima ka bneebu sunan ho?”
Mn3 Dmeqo Kari Yesu ka Petros
(Mrk 14:66-72. Ruk 22:56-62. Yoh 18:15-18, 25-27)
69Tleung nganguc sapah ka Petros ma meyah hiya ka weewa mdayo, rmengo: “Isu uri we mnsuupu su Yesu seediq Galil.” 70Dmeqo berah kana daha hiya ka Petros ma rmengo: “Maanu ka ga su srengo we ini mu klai.” 71Mlatac mosa rhengun mita heya ka 1 weewa mdayo dungal ma rmengo seediq meeniq hiya: “Seediq nii we mnsuupu Yesu seediq Najare.” 72Dmeqo dungal ka Petros ma smdehu rmengo: “Seediq gaga we ini mu klai!” 73Ini qbsiyaq meyah smdaling ka seediq dmheyu hiya ma rmengo Petros: “Bale ba isu we 1 ckceka daha. Ado klaun nami peeyah hrenang kari su.” 74Kiya de cmiyus rmengo ma smdehu ka Petros: “Seediq gaga we ini mu ba klai!” Kiya de asi qqugu ka rodux. 75Lmngelung kari rnengo Yesu ka Petros: “Berah qngqugu rodux we mpn3 su dmeqo kenan.” Mlatac mosa nganguc ka heya ma ani knkana lingis na.
Currently Selected:
Matay 26: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
