Matay 22
22
Pnungalan Kari Uqan Pntriyan
(Ruk 14:15-24)
1Paangal kari rmengo dheya dungal ka Yesu: 2“Qnlhangan Baro we mntena so 1 qbsuran paru pure rayi laqi na. 3Smkagul dtnqliyan na mosa kmberih seediq pnlawa na meeyah mekan pntriyan. Kiya de ini sruwa meyah ka dheya. 4Smkagul duma dtnqliyan na dungal ka qbsuran paru, rmengo: ‘Rngagi ka seediq pnlawa, tai, mhedu ku psramal ka rayi da. Smneeliq ku dapa balas ma mtbeno wawa dapa, mnhedu ba psramal ani maanu da. Kiya de eyah mekan rayi da.’ 5Ini kesa mmaanu ka dheya ma wada da. Mosa qnpahan na ka 1 ma 1 we mosa gmbaruy. 6Duma na dheya we qrapun daha ka dtnqliyan qbsuran paru, tsyaxan daha ma wada daha phqilun da. 7Mseang ba ka qbsuran paru, smkagul supi na phuqil seediq pnhuqil seediq nii ma psqmaun na ka alang daha. 8Kiya de rngagan na ka dtnqliyan na: ‘Mnhedu ba psramal ka uqan pntriyan. Kiya de seediq pnlawa we ini pnuglengu pteme. 9Maanu so kiya de osa elu paru ka yamu, seediq sntrengan namu we adis uqan rayi hini kana.’ 10Kiya de mosa elu paru ka dtnqliyan na, seediq sntrengan daha ani malu ma ani naqah we psliun daha kana. So kiya de stenge seediq tleung uqan rayi da. 11Kiya de meyah ka qbsuran paru tqita seediq, taan na ka 1 seediq ini plukus lukus eekan pntriyan. 12Kiya de rngagan na: ‘Dangi, huwa su mesa, mremux su hini we ini su plukus lukus eekan rayi ho?’ Kiya de asi gseesu uka kari na ka heya. 13Kiya de qbsuran paru we rngagan na ka dtnqliyan na: ‘Bkei ka baga ma papak na, qdaani nganguc ckceka mnkuung hiya. Mplingis ma qnqelic rupun na hiya ka heya.’ 14Ado hbaro ka seediq pnlawa, ini khbaro ka gneegan.”
Pila Bbege
(Mrk 12:13-17. Ruk 20:19-26)
15Ciida, mosa mpprengo huwa kesun ptgdiyal tnraki kari Yesu ka dseediq Parisay. 16Skgulan daha mosa Yesu hiya ka tnugsaan daha ma msuupu qnpruhan Hrodes, rmengo: “Mptgesa, klaun nami. Seediq ini qberiq ka isu, bale ba ka tnugesa su elu Utux Baro. Ini su psaanak mita dqeras seediq ka isu, ini su qita pnqita seediq ka isu. 17Maanu so kiya de, tgsai nami hiya, huwa mesa lnglungan su ho? Mege ta pila Kaisar qbsuran Ruma we mllengu ho?” 18Mkela qnnaqah lnglungan daha ka Yesu, kiya de rmengo: “Seediq mnnangi malu! Hmuwa, ma namu psseung kenan ho? 19Pqtai ku hiya ka pila bbege!” Kiya de sbege daha heya ka 1 hbangan. 20Smiling dheya ka Yesu: “Hnyegan ima ma pnskraya ngayan ima ka nii ho?” 21Rmengo ka dheya: “NKaysaru.” Kiya de rmengo dheya ka Yesu: “NKaysaru we bqani Kaisar. NuUtux Baro de bqani Utux Baro.” 22Mbahang so nii ka dheya de mskluwi ma hmiti malix Yesu ma wada da.
Mprengo Kkuudus Peeyah Hnqilan
(Mrk 12:18-27. Ruk 20:27-40)
23Ali ciida, meyah Yesu hiya ka dseediq Sadokay, dheya ge ida rmengo uka ka kkuudus peeyah hnqilan. Kiya de smiling Yesu: 24“Mptgesa, rmnengo ka Moseh: ‘Nasi uka laqi ma wada mhuqil ka seediq, asi ka ngalun mtswai na ka mqedil tgqbsuran, rmirih qbsuran na lmutuc laqi na.’ 25Cbeyo, niqan ka 7 mtswai ckceka nami. Mangal mqedil ka qbsuran ma wada mhuqil. Ini hiti laqi ma shiti na mtswai ka mqedil na. 26Tg2 ma tg3 uri ma betaq 7 we ida wada so nii kana. 27Mghiti de mhuqil ka mqedil uri da. 28Maanu so kiya de muudus peeyah hnqilan ciida, ckceka 7 heyi nii maha mqedil nnima ka heya di? Ado tnmqedil ndheya kana han.” 29Cmiyuk rmengo dheya ka Yesu: “Qnuuqu namu da. Ado namu ini kela kari Patis Mrtaso. Ini namu klai lmngelung ka beyax Utux Baro uri. 30Muudus peeyah hnqilan ciida, seediq we uxe maangal mqedil ma uxe maha rseno uri. Maha so mntena snkgulan ga baro. 31Quri so kkuudus peeyah hnqilan ge uxe namu snpegan ka rnengo na yamu ka kari Utux Baro peni? Rmengo, 32‘Yaku we Utux Baro nuAbraham, Utux Baro nuYijxaq, Utux Baro nuYakobu.’ Uxe Utux Baro dseediq mhuqil ka Heya, Heya ge Utux Baro dseediq muudus ka Heya.” 33Mbahang nii ka hbaro ba seediq de mskluwi bale tnugesa na.
Tgparu Bale Kari Gaya Pndakar
(Mrk 12:28-34. Ruk 10:25-28)
34Mbahang Yesu we wada meduk quwaq seediq Sadokay ka seediq Parisay de meyah msuupu msseli. 35Kiya de niqan 1 seediq ckceka daha meyah tmraki Yesu, kiya de smiling heya: 36“Mptgesa, ckceka kari gaya pndakar we ga inu ka tgparu bale ho?” 37Rmengo heya ka Yesu: “Asi su ka kana lhebun, kana lnglungan, kana knkela gmaalu Bukung, Utux Baro su. 38Nii we kiya ka tgparu bale kari gaya pndakar, kiya ka plaale ba uri. 39Kiya we tg2 na uri we mntena nii. Asi ka gmaalu su ssiyo pntena gmalu su sunan. 40Kana gaya pndakar ma kari pnugeela kari we smtama 2 kari nii kana.”
Laqi Dawid Ka Kiristo
(Mrk 12:25-37. Ruk 20:41-44)
41Msseli ka dseediq Parisay ciida, smiling dheya ka Yesu: 42“Quri so Kiristo we, hmuwa mesa ka lnglungan namu ho? Lqlaqi mslutuc nima ka heya ho?” Rmengo ka dheya: “Laqi Dawid.” 43Rmengo ka Yesu: “So kiya de mnoda Bgihur Utux ka Dawid, hmuwa ma na kesun Bukung, rmengo:
44‘Rmengo tnpusu sapah mu ka Bukung:
Tleung narac mu ka isu,
betaq mu psaun toma papak su ka pais su.’
45Dawid we Bukung kesun na ka heya, so kiya de ma lux lqlaqi mslutuc Dawid ka Kiristo da ho?” 46Kiya de uka seediq dehuk cmiyuk ani 1 kari heya. Peeyah ali ciida de uka ka seediq mnpahung smiling heya dungal.
Currently Selected:
Matay 22: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
