Matay 21
21
Mremux Yerusalem
(Mrk 11:1-11. Ruk 19:28-38. Yoh 12:12-19)
1Smdaling Yerusalem ka Yesu ma tnugsaan na, meyah Betpage deriq dgiyaq Curung. Smkagul 2 tnugsaan na ka Yesu, 2rmengo dheya: “Osa alang biciq sipo nii. Dehuk namu de mpqita namu 1 dapa roba ga seegul hiya, siyo na niqan 1 wawa dapa roba. Lhlahi ma adis hini. 3Nasi rmengo yamu ka seediq ge rngagi so nii ka yamu: ‘Dooyun Bukung ka nii.’ Maha asi sruwa paadis ka seediq kiya.” 4Ooda so nii ge kiya ka maha mpbale ba kari rnengo mpgeela kari:
5“Sai smneru ka lqlaqi alang Sion:
Qtai! Gaga meyah isu hini ka qbsuran paru su,
mpslebu paapa dapa roba,
paapa biciq dapa roba, wawa dapa roba.”
6Muyu dnurun Yesu mosa qmeepah ka 2 tnugsaan na. 7Desun daha ka dapa roba ma wawa dapa roba. Psaan daha lukus daha ka bobo roba, kiya de taapa hiya ka Yesu. 8Niqan hbaro ba seediq ssapo daha elu ka lukus daha, duma seediq we smeqic cida qhuni ssapo daha elu. 9Mtddiras kana meeniq berah ma meniq bukuy ka hbaro seediq:
“ Hosana! Nlaqi Dawid!
Pooda ngayan Bukung meyah ge tndhuun ta ka kiya!
Hosana! Ga meniq tgpusu baro!”
10Mremux Yerusalem ciida ka Yesu, mbrebur mklui ka kana alang, smiling: “Diima ka seediq nii ho?” 11Rmengo ka hbaro seediq: “Nii we Yesu mpgeela kari pneyah Najare ga Galil.”
PkMrtaso Sapah Thmkuwan
(Mrk 11:15-19. Ruk 19:45-48. Yoh 2:13-22)
12Mremux Sapah Thmkuwan Utux Baro ka Yesu. Pqdriqun na kana ka seediq mbaruy hiya. Poxun na ka ppsaan pryuxan pila ma tluungan mbbaruy byugu. 13Rmengo dheya: “Matis ka Patis:
‘Sapah thmkuwan mu we asi ka kesun sapah thmkuwan dmurun,
ma namu nii ngalan rudu mpgeeluk gmeeguy!’”
14Meyah mita Yesu Sapah Thmkuwan hiya ka duma mbudu ma mrikic, wada pklmeun Yesu. 15Qmnita sklwiun ba qneepah Yesu ka pusu msapuh ma dmptpatis, kiya uri we meeniq Sapah Thmkuwan hiya we taan daha gisu mdiras mlawa: Mseang bale lqlaqi gaga rmengo: “Hosana! Nlaqi Dawid!” 16Kiya de rmengo Yesu: “Diras daha we wada su qbhangan ho?” Rmengo dheya ka Yesu: “Un, qbhangan mu, rmnengo ka Patis: ‘Speeyah su quwaq laqi rabu ma laqi mnunuh mttuku ba tndahu’ we, ini namu spegi peni?” 17Kiya de hmiti malix dheya ka Yesu ma mlatac peeyah alang paru meyah mkrabi Betania.
Smiyus Qhuni Nunuh ka Yesu
(Mrk 11:12-14, 20-24)
18Mgrebu bale, mbrinah meyah alang paru ciida, muure ka Yesu da. 19Taan na niqan 1 qhuni nunuh ga siyo elu. Kiya de mosa hiya. Wano waso nanak ma uka ani maanu ka slayan na. Kiya de rmengo qhuni nii: “Peeyah saya ani betaq knuwan uxe su gheyi da!” Asi kdengu ka qhuni nunuh kiya di. 20Qmita nii ka tnugsaan na de mskluwi ba, rmengo: “Hmuwa, wada asi kdengu ka qhuni nunuh nii da ho?” 21Cmiyuk rmengo dheya ka Yesu: “Bale ba rngage maku, nasi namu niqan snhiyan, ini namu tiiyax we uxe wano ndaan qmeepah quri qhuni nunuh nii ka mtduwa namu daun. Ani su rmengo dgiyaq: Ida mtduwa ka ‘Theruy skrebu rcilung!’ 22Dmurun namu ciida, snhii su de ani maanu ka pnesa namu we ngalun namu.”
Smiling Pusu Beyax Yesu
(Mrk 11:27-33. Ruk 20:1-8)
23Mremux Sapah Thmkuwan, gisu tmgesa seediq ciida ka Yesu, meyah rmengo Yesu ka dpusu msapuh ma rdrudan mpqlahang: “Spooda su pusu beyax maanu qmeepah su so nii ho? Ima ka bnege pusu beyax sunan ho?” 24Cmiyuk rmengo dheya ka Yesu: “Mpsiling ku 1 kari yamu uri. Nasi namu cyukan ka nii, kiya de mprengo ku mnoda ku pusu beyax maanu qmeepah so noda nii. 25Yohane mptgaya smino we pneeyah inu ho? Ye pneyah Utux Baro ho? Uxe uri we ye pneyah seediq ho?” Mpprengo kari ka dheya: “Nasi ta kesun pneyah Utux Baro, maha mprengo ita: ‘Hmuwa, ma namu ini snhii heya?’ 26Nasi ta kesun ‘pneyah seediq,’ kcugun ta ka hbaro seediq. Ado kana seediq we ngalan daha mpgeela kari ka Yohane.” 27Kiya de cmiyuk Yesu ka dheya: “Ini nami kela.” Kiya de rmengo dheya ka Yesu: “Uxe ku mprengo yamu uri, mnoda ku pusu beyax maanu qmeepah ku so nii.”
Pnungalan Kari 2 Laqi
28“Hmuwa mesa ka lnglungan namu ho? Niqan 2 laqi na ka 1 seediq. Mosa tgqbsuran laqi na hiya, rmengo: ‘Laqi, ali saya we osa qmeepah qnpahan lipas.’ 29Cmiyuk ka heya: ‘Uxe ku maha.’ Kiya de hiti de priyux lnglungan na ma wada da. 30Mosa tgswai laqi na hiya, rmengo mntena kari. Cmiyuk ka heya: ‘Tama, maha ku.’ Kiya de ini osa. 312 laqi nii we tgiinu ka muyu lnglungan tama daha ho?” Rmengo ka dheya: “Tgqbsuran laqi na.” Rmengo dheya ka Yesu: “Bale ba rngage maku, mplaale yamu mremux qnlhangan Utux Baro ka dmaangal pila nqbsuran ma mmqedil kbrexun. 32Ado meyah yamu hini ka Yohane, tmgesa elu kksderux lnglungan. Ini namu snhii ka yamu. Nuuqu dmaangal pila nqbsuran ma mmqedil kbrexun ka wada snhii heya. Ani namu qmnita ka yamu, mghiti de ini namu priyux lnglungan snhii heya.
Pnungalan Kari Naqah Mpqeepah Neepah
(Mrk 12:1-12. Ruk 20:9-19)
33Bhangi dungal 1 pnungalan kari: Niqan ka 1 tnsapah kmbgurah neepah lipas. Ssiyo we qlangan na ma kmari qpean lipas ckceka hiya ma smalu paga qlhangan. Kiya de skbarux na dmpqeepah lipas ma mosa qnlhangan icil da. 34Smdaling ka qhdean heyi de skgulan na mpqeepah hiya ka tnqliyan na aangal daha heyi peeyah neepah. 35Dmpqeepah ge qrapun daha ka tnqliyan na, 1 we psruwan daha, 1 we phqilun daha, 1 dungal we phqilun daha btunux. 36Dungal we skgulan na duma ka tnqliyan na mgkala pnlaale hbaro. Wada daha pntnaun pnlaale mchaya ka dheya nii uri. 37Bobo na hiya de skgulan na dheya hiya ka laqi na, rmengo: ‘Ida daha spruun qmita ka laqi mu da.’ 38Kiya de qmita laqi na ka dmpqeepah de mpprengo: ‘Seediq rmirih na ka nii da. Aguh, phqilo ta ka heya, ngalo ta ka dnoi hniti na da!’ 39Kiya de qrapun daha, lwaqun daha mosa nganguc qnpahan lipas ma phqilun daha. 40So kiya de, dehuk ka tnqnpahan lipas de hwaun na kesun ka dmpqeepah nii da ho?” 41Rmengo ka dheya: “Heya we pkdraun na phuqil kana ka naqah seediq nii. Kiya de qnpahan lipas na de spkbarux na dmpqeepah mnduwa ba mege qhdaan heyi na.” 42Rmengo dheya ka Yesu:
“‘Btunux qnada mpsmalu sapah,
wada ma pusu muxi sapah da.
Ndaan qmeepah Bukung ka nii,
peeyah doriq ta mita we ma sklwiun bale.’
Uxe namu smpegan ckceka Patis Mrtaso ka kari nii ho? 43Maanu so kiya de rngage maku, ngngalun peeyah yamu hiya ka qnlhangan Utux Baro, sbege na dseediq mnlengu mghei. 44Mtakur bobo btunux nii ka seediq we mptnemu mgerung. Mtuting bobo ani ima ka btunux nii we maha na ani ima pstmaqun miriq.”
45Qmbahang pnungalan kari nii ka dpusu msapuh ma seediq Parisay de, klaun daha dheya ka gaga na srengo. 46Qmqerac Yesu ka dheya. Kiya de miicu hbaro seediq. Ado hbaro seediq we ngalan daha mpgeela kari ka Yesu.
Currently Selected:
Matay 21: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
