Matay 17
17
Kmpriyux Hnyegan Yesu
(Mrk 9:2-13. Ruk 9:28-36)
1Bobo wada mk6 ali, Yesu we desun na ka Petros, Yakobu ma mtswai Yakobu Yohane, tleus desun na mosa dgiyaq bbaro. 2Kmpriyux hnyegan na meeniq berah daha ka Yesu. Mntena so hido lmedax ka dqeras na, lukus na we mntena ledax bhege. 3Tai, meyah tqita dheya ka Moseh ma Eliyah, msuupu mpprengo Yesu. 4Rmengo Yesu ka Petros: “Bukung! Teyal ba knmalu meeniq ta hini! Nasi su smruwa, smlei ku 3 behing hini. 1 we nnisu. 1 we nMoseh. 1 we nuEliyah.” 5Nii mpprengo na, asi lux mubung dheya ka plabu lmedax. Niqan hrenang peeyah ckceka plabu, rmengo: “Nii ge laqi sgaalu mu, kiya ka kuxul mu. Qbahang heya ka yamu!” 6Mbahang so nii ka tnugsaan na de asi tgtemaq dxeral, miicu bale. 7Mkkesa mosa dheya hiya ka Yesu, tmelung dheya ma rmengo: “Tutuy, iya kiicu!” 8Mtutuy ka tunux daha de wano Yesu nanak, ini tai ka ani ima da.
9Peeyah dgiyaq mtaril ciida, mdakar rmengo dheya ka Yesu: “Berah muudus peeyah hnqilan ka Laqi seediq we iya rngagi ani ima ka ntaan namu.” 10Smiling Yesu ka tnugsaan na: “Manu so kiya de, ma rmengo, asi ka kraman meyah ka Eliyah, mesa ka dmptpatis ho?” 11Cmiyuk rmengo ka heya: “Ida meyah ka Eliyah, pndwaun na dungal ka kana ani maanu. 12Kiya de rngage maku, tena wada meyah ka Eliyah da. Ini kela heya ka seediq ma smeung nanak lnglungan daha wada mchaya heya. Mntena so nii Laqi Seediq uri we pqrqilun daha.” 13Kiya ka hani mkela lmngelung ka tnugsaan na, Yohane mptgaya psino ka nii su srengo Yesu.
Pkmalu Laqi Ga Sdooyan Utux Naqah
(Mrk 9:14-29. Ruk 9:37-43)
14Meyah hbaro seediq hiya ka Yesu ma tnugsaan na. Niqan ka seediq meyah hiya, tmbqelic berah Yesu, 15rmengo: “Bukung! Glaani ku hiya ka laqi mu! Gaga mnalux mrunge ka heya, mqraqil bale ma ncugil mremux mtakur ckceka puniq ma ckceka qsiya. 16Desun mu berah tnugsaan su hiya ma ini daha pkmlei ka heya.” 17Cmiyuk rmengo ka Yesu: “Ah, uka snhiyan ma naqah ba ka mknexal nii wa! Mpbetaq ku knuwan msuupu yamu ho? Mpbetaq ku knuwan knremun yamu ho? Adis yaku hini ka heya!” 18Mseang bgihur naqah kiya ka Yesu. Bgihur naqah de mlatac peeyah laqi. Peeyah ciida, asi kmalu ka laqi da. 19Bobo na de, gmuruus smiling Yesu ka tnugsaan na: “Hmuwa, ma miyan ini tgkeela pqduriq heya ho?” 20Rmengo dheya ka Yesu: “Ado biciq ba ka snhiyan namu. Bale ba rngage maku, nasi mntena 1 demux rehak sama karic ka snhiyan namu, ani namu kesun rmengo ka dgiyaq: ‘Peeyah hini theruy hiya!’ Ida maha mptheruy ka dgiyaq. Kiya de uka ani maanu ka uxe namu tgklaun qmeepah. 21(Nasi ini ooda ptgaya ini ekan ma dmurun de uxe meyah nganguc ka bgihur naqah nii.”)
Mn2 Rmengo Kari Pgeela Hhuqil ma Muudus ka Yesu
(Mrk 9:30-32. Ruk 9:43-45)
22Msseli Galil ciida ka dheya, rmengo tnugsaan na ka Yesu: “Uxe beyo bbege daha seediq ka Laqi seediq. 23Phqilun daha ka heya. Mk3 de pkdusun peeyah hnqilan.” Kiya de naqah bale kuxul daha ka tnugsaan na.
Mege Pila Bbege
24Dehuk Kaparnaom ka dheya. Meyah rmengo Petros ka dmpsseli pila bbege Sapah Thmkuwan: “Mptgesa namu we ini bege pila bbege Sapah Thmkuwan ho?” 25Rmengo ka Petros: “Mbege.” Mremux ckceka sapah ka Petros, plaale rmengo heya ka Yesu: “Simon, huwa mesa ka lnglungan su? Qbsuran paru bobo dxeral ge, maangal peeyah ima ka pila nqbsuran ma pnsumu qbsuran ho? Mpeyah laqi na nanak ho? Uxe uri we peeyah seediq icil ho?” 26Cmiyuk ka Petros: “Peeyah seediq icil!” Kiya de rmengo heya ka Yesu: “So kiya de ani ini bege ka laqi na nanak da. 27Kiya de ado uxe ppskripuc dheya, osa plaling rcilung. Pnllingan plaale ka qcurux we aangal. Kiya de rwahi ka quwaq na de slayun su hiya ka 1 kretan pila. Pila nii we bege dheya, nii we kiya ka bbege na nnisu ma nnaku kiya.”
Currently Selected:
Matay 17: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
