Matay 18
18
Ima ka Paru Ba Ckceka Qnlhangan Baro
(Mrk 9:33-37. Ruk 9:46-48)
1Ciida, meyah smiling Yesu ka tnugsaan na: “Ima ka paru ba ckceka Qnlhangan Baro ho?” 2Mlawa 1 laqi ka Yesu, phyegun na ckceka daha. 3Kiya de rmengo: “Bale ba rngage maku, nasi namu ini pspgeriq kmpriyux mntena so laqi, uxe namu mpteme Qnlhangan Baro ka yamu. 4Kiya de ani ima mntena laqi nii psblebu heya nanak we kiya ka rmabang paru meniq ckceka Qnlhangan Baro. 5Ani ima ado ngayan mu psteme so nii laqi biciq we kiya ka psteme yaku.”
Ddudul Quri Psqnnaqah
(Mrk 9:42-48. Ruk 17:1-2)
6“Ani ima ka pktakur 1 so nii tgbiciq snhii kenan we nuuqu malu seegul nduyung na ka paru ba btunux glangan ma sqada rcilung ka heya. 7Smtali bale ka bobo dxeral nii! Ado ppktakur seediq ka heya. Meeyah ka ppktakur seediq. Kiya we smtali bale ka dppktakur seediq! 8Nasi pskripuc sunan ka icil baga su uxe uri we icil papak su we slapi ma qdaani. Nuqu malu ka uka su kingal baga ma kingal papak mremux su uka psteqan knuudus daha ka niqan baga ma papak mremux uka psteqan puniq. 9Nasi pskripuc sunan ka icil doriq su we pkngali ma qdaani. Nuqu malu kingal ba doriq su mremux uka psteqan knuudus daha ka niqan daha doriq mremux uka psteqan puniq.
Miric Ga Mgeedang
(Ruk 15:3-7)
10Qlahang ka yamu, iya slkahi qmita ka ani 1 tgbiciq nii. Bale ba rngage maku, ga meniq baro ka dsnkgulan baro ndheya ma ini psetuq qmita dqeras Tama mu ga baro. 11Ado Laqi Seediq we seediq ga mgedang ka seeyah na dmoi baga.
12Huwa namu mesa lmngelung ho? Nasi niqan 1'00 miric rudu ka seediq, wada mgeedang ka 1 miric rudu de uxe na pniqun dgiyaq ka 99 ma mosa migin 1 wada mgedang miric nii ho? 13Nasi na slayan de, bale ba rngage maku. 1 nii we spkala na 99 ini kgedang qrasun na bale! 14Mntena so nii, ini skuxul pgedang 1 tgbiciq nii ka Tama namu ga baro uri.
Psqnnaqah Sunan Ka Mtswai
15Nasi pqnaqah sunan ka mtswai su we, osa ma so heya ma isu nanak ciida, rngagi hiya ka qnnaqah na. Nasi mbahang kari su ka heya we wada su ngalun ka mtswai su nii. 16Nasi ini qbahang ka heya, desi 1 uxe uri we 2 seediq msuupu mosa. Ado ani maanu srengo namu qnquwan we asi ka spooda 2 ma 3 pnkela seediq, kiya ka tduwa phyegun kari. 17Nasi ida ini qbahang dheya ka heya de, sai tmgesa pssliyan. Nasi ani kari pssliyan ini na bhangi de pntnaani so icil seediq ma maangal pila nqbsuran ka heya.
18Bale ba rngage maku, ani maanu bkean su bobo dxeral hini we bkeun baro hiya uri. Ani maanu lhlahun su bobo dxeral hini we lhlahun baro hiya uri. 19Bale ba rngage maku dungal, nasi ckceka namu 2 seediq ms1 lnglungan daha ma msuupu dmurun ana manu. Maha mttuku cmiyuk yamu ka Tama mu gaga baro. 20Ado ani inu, niqan ka 2 uxe uri we 3 seediq mooda ngayan mu msseli we meeniq ku ckceka dheya hiya ka yaku.”
Ini Sruwa Seediq ka Tnqliyan Naqah
21Ciida, meyah rmengo Yesu ka Petros: “Bukung! Wada pqnaqah kenan ka mtswai mu. Maha ku mnpiya smruwa heya ho? Pttuku ka 7 da ho?” 22Rmengo heya ka Yesu: “Rngage misu, uxe mn7. Asi ka mn77. 23Ado Qnlhangan Baro we mntena 1 qbsuran paru mpsepu kusa tnqliyan na. 24Prading smepu ka qbsuran paru, nii desun hiya ka 1 seediq ga pkusa 1 mang tarantu heya. 25Seediq kiya we ini na dheki pririh. Kiya de tnpusu sapah we posa kari saan na gmbaruy ka heya ma mqedil na, lqlaqi na ma kana dnoi na yahan na pririh. 26Tnqliyan nii we tmbqelic thmuku heya, rmengo: ‘Tnpusu sapah, braho su, knremun han ho! Ida mu qhdeun pririh isu kana.’ 27Tnpusu sapah tnqliyan nii we ado gmaalu heya ka lnglungan na de sraguh na ma srwaan na hiya ka kusa na. 28Mlatac mosa nganguc ka tnqliyan nii de sterung na ka 1 seediq tnheyaq heya. Seediq kiya we ga kmbarux 1'00 hbangan heya. Qrapi na ka heya ma pcqerun na ka nduyung na, rmengo: ‘Prihi ku hiya ka kusa su da!’ 29Tmbqelic lmingis mesa heya ka seediq tnheyaq heya, rmengo: ‘Braho su, knremun han ho! Qlengun sumu pririh!’ 30Ani so kiya, ida ini sruwa ka heya. Saun na hmetur sapah kuung ka seediq tnheyaq heya. Asi ka betaq pririh kana kusa na. 31Mita so noda nii ka duma seediq tnheyaq heya de, naqah bale kuxul daha. Saan daha smneeru tnpusu sapah kana ka noda so nii. 32Maanu so kiya de tnpusu sapah we splawa na ka tnqliyan na, rmengo heya: ‘Tnqliyan naqah ka isu nii! Lmabu su kenan ma wada misu sruwaun kana ka kusa su. 33Uxe su naka mntena yaku gmaalu sunan, glaanun su ka seediq tnheyaq sunan uri peni?’ 34Kiya de mseang bale ka tnpusu sapah, asi na biqi seediq mqerac. Asi ka betaq na qhdeun pririh kana ka kusa na. 35Maanu so kiya de nasi namu uxe pneeyah lhebun smruwa mtswai namu nanak we maha so nii ooda na yamu ka Tama mu ga baro uri.”
Currently Selected:
Matay 18: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
