Matay 15
15
Mpprengo Gaya Rdrudan Cbeyo
(Mrk 7:1-23)
1Ciida meyah qmita Yesu ka duma seediq Parisay ma dmptpatis pneyah Yerusalem, rmengo: 2“Hmuwa ma smeeliq gaya rdrudan cbeyo ka tnugsaan su ho? Ado ini trima baga mekan hnpure?” 3Cmiyuk rmengo dheya ka Yesu: “Hmuwa, ado ppuyu namu gaya rdrudan cbeyo smeeliq namu kari gaya Utux Baro ho? 4Rmnengo ka Utux Baro: ‘Sprui ka tama ma bubu’. Rmengo dungal: ‘Smiyus tama ma bubu ka seediq we ida asi ka phqilun.’ 5Kiya de rmengo namu ka yamu: ‘Nasi rmengo tama ma bubu na ka seediq: Wada mu sbege Utux Baro ka ddanga mu tama ma bubu, 6heya de ani nak ini sprui ka tama ma bubu na da.’ So nii ka ppuyu namu gaya rdrudan cbeyo ma pkuuka namu kari Utux Baro. 7Seediq mnnangi malu! Malu bale ka kari pgeela rnengo na yamu ka Isaya:
8‘Dmoi quwaq smparu yaku ka seediq nii.
Lhebun daha we smtheya kenan.
9Dheya ge ngalan daha stgesa seediq ka gaya seediq,
kiya de uka ririh na ka tnhmkuwan dha kenan uri.’”
10Yesu we tosun na mlawa ka hbaro seediq, rmengo dheya: “Kana namu qbahang kari mu, klai ba lmngelung uri. 11Ini pqnaqah seediq ka mremux quwaq. Wano pneeyah quwaq ka pqnaqah seediq.” 12Ciida meyah rmengo heya ka tnugsaan na: “Tuqu mbahang kari nii ka seediq Parisay we klaun su ho?” 13Cmiyuk rmengo ka Yesu: “Ani maanu nasi uxe pnhuma Tama mu baro we gbilun kana gamil daha. 14Laxi hiya! Dheya ge mbudu ma mbudu ka gaga mpdudul. Nasi dmudul mbudu ka mbudu de mptuting beling ka 2 heyi.” 15Rmengo ka Petros: “Tgsai ku hiya ka pnungalan kari nii.” 16Rmengo ka Yesu: “Ani yamu ini namu klai lmngelung na ho? 17Ini namu ba klai kana ka mnremux quwaq mooda ckceka nbuyas, mptuting qtiyan dungal peni? 18Cnriyu peeyah quwaq we kika kndalax lhebun. Kiya ka mpqnaqah seediq. 19Ado peeyah lhebun ka ani lnlamu naqah lnglungan, mntena so pphuqil seediq, mmhemuc mssapac, mkmhemuc msuupu, gmeeguy, qqberiq pgkela, smngayan. 20Kika mpqnaqah seediq ka nii. Ini trima baga mekan hnpure we ini pqnaqah seediq kiya.”
Snhiyan Mqedil Pneyah Alang Kenaan
(Mrk 7:24-30)
21Mlatac peeyah hiya ka Yesu, tgkiwax mquri alang Turos ma Cidon. 22Niqan ka 1 mqedil pneeyah alang Kenaan, mdiras mlawa: “Bukung! Laqi Dawid, glaani ku! Ga qrapun bgihur naqah ka laqi mu mqedil ma paru ba mqraqil na!” 23Ini ciyuk ani 1 kari ka Yesu. Meyah mesa rmengo heya ka tnugsaan na: “Braho su, posa ka mqedil nii! Ado tddiras mlawa smnegul bukuy ta ka heya!” 24Cmiyuk rmengo ka Yesu: “Snkgulan na kenan we wano ku mosa miric sapah Israel ga mgedang hiya.” 25Kiya de meyah tmbqelic thmuku Yesu ka mqedil kiya, rmengo: “Bukung! Dyagi ku kiya!” 26Cmiyuk rmengo ka Yesu: “Ini pnuglengu ka mangal pang laqi ma sqada mege huling.” 27Rmengo ka mqedil kiya: “Bukung! Un. Kiya de huling uri we ida mekan nemu pnuqan mntuting peeyah uqan tnpusu sapah uri!” 28Kiya de cmiyuk rmengo heya ka Yesu: “Mqedil, teyal ba snhiyan su! So kmngalun su we keso kiya sunan!” Peeyah ciida, wada pklmeun ka laqi na mqedil.
Pkmalu Mnarux
29Mlatac peeyah hiya ka Yesu, meyah ssiyo rcilung Galil. Mosa dgiyaq ma tleung hiya. 30Niqan ka hbaro ba seediq meyah Yesu hiya. Madis mrikic na, mbudu doriq, mciicil papak, mngangah ma hbaro lmlamu mnarux seediq. Psaun daha berah papak Yesu kana ka dheya. Kiya de wada pklmeun Yesu kana ka dheya da. 31Mita wada rmengo ka mngangah, malu ka mciicil papak, mkkesa ka mrikic, mita ka mbudu de mklui bale ka hbaro seediq. Kiya de mqaras tmdahu Utux Baro nuIsrael ka dheya.
Pktengi 40'00 Seediq
(Mrk 8:1-10)
32Mlawa tnugsaan na ka Yesu, rmengo: “Sgaalu mu bale ka hbaro seediq nii. Ado wada mk3 ali tnhiyan daha kenan, uka ka uqun da. Ini ku sruwa posa ga muure ka dheya, maha uuqun ure klgelu di.” 33Rmengo heya ka tnugsaan na: “Gisu ta meniq dxeral nrao, maha ta migin inu ka pang pktengi pqdiyal so nii hbaro bale seediq ho?” 34Smiling dheya ka Yesu: “Piya pang namu?” Rmengo ka dheya: “7 ma niqan tikuh ka biciq qcurux.” 35Dmurun hbaro ba seediq tleung dxeral ka Yesu. 36Mangal 7 pang ma qcurux ka heya, mqaras dmurun Utux Baro. Kiya de gbingun na sbege na tnugsaan na. Tnugsaan na de saasu daha hbaro seediq dungal. 37Mnekan kana ka dheya ma mtengi di. Pssliun daha ka nngari pang gnebin we stenge 7 rawa. 38Mnekan ka seediq we ini spegi ka mqedil we 40'00 ka rseno. 39Yesu we psaun na ka hbaro ba seediq, kiya de paapa asu mosa dxeral Magadan.
Currently Selected:
Matay 15: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
