Matay 14
14
Hnqilan Yohane Mptgaya Smino
(Mrk 6:14-29. Ruk 9:7-9)
1Ciida, Hrodes qbsuran paru mpdudul Galil we mbahang ngayan Yesu. 2Kiya de rngagan na ka dtnqliyan na: “Nii we Yohane mptgaya smino pnkuudus peeyah hnqilan. Maanu so kiya de niqan so nii paru beyax na gaga meniq ckceka heyi na.” 3Berah ciida, Hrodes we qmnerac Yohane, bkeun na ka heya ma shetur na sapah kuung. Nii we ado Hrodias mqedil Pilipos mtswai na. 4Ado mneegu rmengo Hrodes ka Yohane: “Ini tduwa ka mangal su heya.” 5Kmphuqil Yohane ka Hrodes, kiya ma miicu seediq. Ado ida daha ngalan seediq mpgeela kari ka Yohane. 6Meniq mqaras mekan ali pnttingan Hrodes ciida, meyah kmeeki berah kana seediq ka weewa Hrodes, wada smqaras lhebun Hrodias. 7Kiya de smdehu rmengo ka Hrodes, ani maanu ka pnesa na heya we bbege na. 8Ddulun bubu na, rmengo ka heya: “Braho su, tunux Yohane mptgaya psino we psai psaan ma desi ku hini.” 9Naqah bale kuxul na ka qbsuran paru. Ado wada smndehu bale berah kana seediq tleung hiya ka heya duma smruwa mege heya. 10Kiya de smkagul seediq smipaq tunux Yohane ckceka sapah kuung. 11Psaun na ppsaan sbege na laqi mqedil. Laqi mqedil de saan na mege bubu na. 12Meyah ka tnugsaan Yohane, yahan daha mangal ka heyi Yohane ma reesun daha. Kiya de saan daha smneeru rmengo ka Yesu.
Pktngiun ka 50'00 Seediq
(Mrk 6:30-44. Ruk 9:10-17. Yoh 6:1-14)
13Mbahang nii ka Yesu de paapa asu ma mlatac peeyah hiya, mosa nanak dxeral nrao. Mbahang ka hbaro seediq de peeyah lualang mkkesa mosa smnegul heya. 14Meyah ka Yesu de qmita hbaro bale seediq, sgaalu na bale. Wada na pklmeun ka mnarux seediq ckceka na. 15Gbiyan ciida, meyah Yesu hiya ka tnugsaan na, rmengo: “Breenux nrao ka hini, mskeman hari ka ali saya da. Braho su skguli ka hbaro seediq, so mosa lualang biciq maruy uuqun daha nanak.” 16Rmengo ka Yesu: “Ani ini latac ka dheya. Biqi uqun ka dheya!” 17Rmengo ka tnugsaan na: “Wano 5 pang ma 2 qcurux.” 18Rmengo ka Yesu: “Adis kenan hini.” 19Dmurun hbaro ba seediq tleung daha bobo speriq ka Yesu. Maangal 5 pang ma 2 qcurux ka heya, mita baro mqaras Utux Baro. Kiya de gbingun na ma sbege na tnugsaan na. Kiya de tnugsaan na de saasu daha hbaro seediq. 20Mnekan kana ka seediq duma mtengi uri da. Tnsaan de pssliun daha ka nngari pang gnebin we stenge 12 rawa. 21Ini spegi ka mqedil ma laqi mnekan we wano rseno de yaa ba 50'00 heyi.
Mkkesa Bobo Rcilung ka Yesu
(Mrk 6:45-52. Yoh 6:15-21)
22Ini beyo, Yesu de asi na pstyexi pnkala paapa asu pglaun na pntaril tgsipo ka tnugsaan na. Kiya uri we wada na pswayun ka kana seediq. 23Bobo wada hmiti pswaye hbaro seediq de mosa nanak dgiyaq dmurun ka heya. Keeman ciida, wano heya nanak ka gaga hiya. 24Ciida, tena betaq ckceka rcilung smtheya ka asu. Ado ga sterung bgihur de pqrqilun mlgelu bula rcilung ka asu. 25Daling mpledax ka karac, gisu mkkesa bobo rcilung mquri tnugsaan na ka Yesu. 26Tnugsaan na we taan daha gisu mkkesa bobo rcilung ka Yesu de, mrmari bale ka dheya, rmengo: “Utux kiya wa!” Kiya uri we mdiras mlawa kniicu daha. 27Asi rengo dheya ka Yesu: “Knbeyax! Yaku wa! Iya kiicu!” 28Rmengo ka Petros: “Bukung! Nasi isu, plaani ku hiya mkkesa bobo qsiya mosa isu hiya.” 29Yesu we rmengo: “Un, aguh!” Kiya de Petros we mtuting peeyah asu ma mkkesa bobo qsiya mquri Yesu. 30Kiya de qmita gisu paru ba ka bgihur de miicu da. Prading sqrebu truma ka heya de ttdiras nhari mlawa: “Bukung! Pkdusi ku ha!” 31Asi qerac heya ka baga Yesu ma rmengo: “Seediq biciq ba snhiyan! Hmuwa, ma su tiiyax lmngelung ho?” 32Wada paapa asu ka dheya de mgmelux ka bgihur da. 33Kana seediq meniq ckceka asu hiya we thmuku Yesu, rmengo: “Bale ba laqi Utux Baro ka isu!”
Pkmalu Seediq Meeniq Gennesaret
(Mrk 6:53-56)
34Mntaril rcilung kiya ka dheya de dehuk dxeral Gennesaret. 35Klaan daha Yesu ka dseediq dxeral hiya de smkagul seediq mosa kana mtqiri alang hiya. Desun daha Yesu hiya ka kana mnarux seediq. 36Mesa ssruwa Yesu wano tmelung palic lukus na ka dheya. Ani ima seediq tmnelung we wada malu kana da.
Currently Selected:
Matay 14: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
