Matay 13
13
Pnungalan Kari Mrehak Rehak
(Mrk 4:1-9. Ruk 8:4-8)
1Ali ciida, mlatac peeyah sapah ka Yesu, tleung siyo rcilung. 2Niqan ka hbaro ba seediq meyah msseli ssiyo na. So kiya de mosa taapa asu ma tleung hiya ka Yesu. Mheyu siyo rcilung ka kana knhbaro seediq. 3Paangal kari egu ba ka heya ma srengo na dheya. Rmengo ka heya: “Qtai! Mosa rmehak rehak ka mrehak. 4Rmehak ciida, niqan ka mtuting ssiyo elu ka rehak ma wada uqun qbheni. 5Niqan ka mtuting qhqahur epux ba dxeral bobo btunux ka rehak. Ado ini kknedux ka dxeral ma asi heru. 6Mnkala ka hido de sqmaun kntlexan. Ado ini ptgamil ba ma asi kdengu da. 7Niqan ka rehak we mtuting ckceka pkpako. Mdakil ka pako kbuyun na de ini gheyi. 8Niqan ka rehak we mtuting malu dxeral ma mdakil bale betaq mghei. Msn1'00, msn60, msn30 ka heyi na. 9Niqan birac qqbahang we qbahang!”
Pusu Pnungalan Kari
(Mrk 4:10-12. Ruk 8:9-10)
10Meyah rmengo Yesu ka tnugsaan na: “Hmuwa, ma su spaangal kari rmengo ka dheya ho?” 11Cmiyuk rmengo ka Yesu: “Ado wada mu sbege yamu ka lneing quri Qnlhangan Baro, ini pklai ka dheya ma, yamu ka spkela mu. 12Dmoi ka ani ima we rnahun mu mege ma mpsngari. Ini doi ka ani ima we rnahun mu gmeluk mangal ka dnoi na. 13Hmuwa dmoi ku paangal kari rmengo dheya, ado dheya ge,
ani qmnita de ini qita,
ani mnbahang ge ini qbahang. Ini kela lmngelung uri.
14Wada ma bale ba ka kari pgeela Isaya quri dheya, rmengo:
‘Mbahang namu ma mbahang, ida namu uxe klaun lmngelung.
Qmita namu ka qmita, ida namu uxe tleus qmita.
15Ado mgdema ka lhebun seediq nii da,
spqdiyan ka birac daha,
mqemi ka doriq,
so uxe qmita ka doriq,
mbahang ka birac,
mkkela lmngelung ka lhebun ma ppspgeriq meyah,
kiya de pklmeun mu ka dheya.’
16Kiya de mbleyaq ka doriq namu. Ado dehuk qmita ka doriq namu. Mbleyaq ka birac namu uri. Ado dehuk mbahang ka birac namu. 17Bale ba rngage maku, mqmita bale qnita namu ka hbaro ba mpgeela kari ma seediq msderux oda cbeyo, ini daha qtai. Kmqbahang bale qnbhangan namu ka dheya we, ini daha bhangi.”
Tmgesa Pnungalan Kari
(Mrk 4:13-20. Ruk 8:11-15)
18“Maanu so kiya qbhangi ka pnungalan kari mrehak rehak nii. 19Ani ima mbahang kari quri Qnlhangan Baro ma ini kela lmngelung we meyah ka bgihur naqah ma glekun na maadis ka rehak gaga ckceka lhebun na. Nii kesun srehak ssiyo elu kiya. 20Mntena nii dungal, srehak qhqahur bobo tasil we kiya ka wada mbahang kari ka dheya de asi tqqaras mangal. 21Ani so kiya, ini ba ptgamil lhebun daha ma tnnais ini qbsiyaq. Ririh kari mu ka sooda daha mqraqil ma ptrqilun ciida de asi ktakur. 22Ga srehak ckceka pkpako we kiya ka seediq wada mnbahang ka kari, kiya de niqan ka pnslhebun bobo dxeral ma psridil qnbleyaq de wada na kbuyun ka kari de ini gheyi. 23Wada srehak malu dxeral we kiya ka seediq mnbahang kari ma, mkela lmngelung. Bobo mghiyi msn1'00, msn60, msn30 ka knrana heyi na.”
Pnungalan Kari Yumo
24Rmengo dheya 1 pnungalan kari dungal ka Yeus: “Qnlhangan Baro mntena 1 seediq rmehak malu rehak qnpahan. 25Mtaqi ka seediq ciida, meyah rmehak yumo ckceka mugi ka pais na. Kiya de wada da. 26Hmeru ma mghei ciida ka mugi de mtuura cmriyu ka yumo uri. 27Meyah rmengo heya ka dtnqliyan tnpusu sapah: ‘Tnpusu sapah, uxe su rnehak malu rehak ckceka qnpahan peni? Pneeyah inu ka yumo nii da ho?’ 28Rmengo dheya ka tnpusu sapah: ‘Qneepah pais ka kiya.’ Rmengo ka tnqliyan: ‘So kiya de ye nami saun gmabil ka yumo nii ho?’ 29Rmengo ka tnpusu sapah: ‘Uqu nanak! Gmabil namu yumo ciida de maha namu sptheyaq gmabil ka mugi uri da. 30Pspui pkdakil betaq qbrungun ciida. Ali qbrungan ciida de mprengo ku seediq mpqburung: Pllai gmabil ka yumo ma bkei, saun ta psqama. Mugi we psliyo ta posa ckceka repun.’”
Pnungalan Kari Rehak Sama Karic
(Mrk 4:30-32. Ruk 13:18-21)
31Rengo 1 pnungalan kari dheya dungal ka Yesu, rmengo: “Qnlhangan Baro we mntena so 1 demux sama karic, niqan ka seediq saan na rmehak ckceka qnpahan na nanak. 32Ani kesun tgbiciq bale kana ani maanu rehak, mdakil de rmabang knparu pntnaun ta kana sama, kiya de ma qhuni da. Kiya de ani qbheni meyah tmrudu ciida na.”
33Rengo 1 pnungalan kari dheya dungal ka Yesu: “Qnlhangan Baro ge mntena so tgeda pllabu pang. Kiya de niqan ka 1 mqedil maangal kiya spgimax na ckceka 3 kbegax nemu mugi, betaq pllbuun ka kana nemu.”
Rmengo Pnungalan Kari
(Mrk 4:33-34)
34Nii we spaangal na kari rmnengo seediq ka Yesu, ini poda pnungalan kari de, ini rengo dheya ka Yesu. 35So nii we kiya ka maha pbale ba kari rnengo mpgeela kari:
“Spooda mu pnungalan kari rmaguh quwaq mu,
mprengo ku ooda lneing pneyah snlmean bobo dxeral.”
Tmgesa Pnungalan Kari Yumo
36Ciida, mlatac hbaro ba seediq ka Yesu, mremux sapah truma. Meyah hiya ka tnugsaan na, rmengo: “Tgsai nami hiya ka pnungalan kari yumo ga ckceka qnpahan.” 37Cmiyuk rmengo ka heya: “Rmehak malu rehak we Laqi Seediq. 38Qnpahan we qnlangan nii. Malu rehak we laqi Qnlhangan Baro. Yumo we laqi bgihur naqah. 39Pais rnehak nii we Qbsuran Bgihur Naqah. Qmburung we qnhdean bobo dxeral kiya. Mpqburung we dsnkgulan baro ka kiya. 40Mntena so nii gbilun ka yumo ma psqmaun puniq, maha so kiya ka qnhdean bobo dxeral uri. 41Mpskagul dsnkgulan na baro ka Laqi seediq, kiya ka kana seediq mpskripuc ma qmneepah naqah we geegun na peeyah ckceka qnlhangan na, 42qada na ckceka psqmaan. Mptngedux lmingis hiya ka dheya. 43Ciida, seediq msderux ooda we maha mntena so hido mpkledax meniq qnlhangan Tama daha hiya. Niqan birac we bleyaq ba mbahang!”
Pnungalan Kari Migin Pusu Dnoi
44“Qnlhangan Baro we mntena so pusu dnoi ga liingun ckceka qnpahan. Slayan seediq de htiyan na bleyaq mubung, mqqaras ba mosa qmhedu gmbaruy kana qyqeya na. Kiya de brigun na ka qnpahan nii.
45Dungal we Qnlhangan Baro ge, mntena so mbaruy migin mtumun bhege. 46Smdiyal 1 mkere brigan mtumun bhege ka heya de mosa qmhedu gmbaruy kana qyqeya na. Kiya de brigun na ka mtumun bhege nii.”
Pnungalan Kari Kadi
47“Dungal we Qnlhangan Baro ge, mntena so kadi nii pkadi ckceka rcilung, ptgdiyal lmlamu ba qcurux. 48Stenge ka kadi de, seediq we bbilun daha pnklaun ssiyo rcilung ka kadi. Kiya de tleung ma tgmalu na qcurux we psaun ckceka psaan. Sqada na ka naqah qcurux. 49Maha so kiya ka qnhdean bobo dxeral nii uri. Meeyah ka dsnkgulan baro, psnakun na peeyah ckceka seediq msderux ooda hiya ka naqah seediq, 50qada daha ckceka psqmaan. Mptngedux lmingis hiya ka dheya.”
Snkuwan Bgurah ma Cmucac
51Rmengo ka Yesu: “Klaun namu lmngelung kana ka so nii da ho?” Rmengo ka tnugsaan na: “Klaun nami lmngelung da.” 52Rmengo dheya ka Yesu: “So kiya de, kana so dmptpatis mpsluhe so tnugsaan quri Qnlhangan Baro we, mntena so tnpusu sapah mangal bgurah ma cmucac qyqeya peeyah snkuwan na.”
Qmada Yesu ka Seediq Najare
(Mrk 6:1-6. Ruk 4:16-30)
53Mhedu rmengo paangal kari nii ka Yesu de mlatac hiya. 54Meyah alang na nanak ka Yesu. Tmgesa seediq sapah pssliyan hiya, mskluwi ka seediq duma rmengo: “Pneyah inu ka kkela lmngelung ma beyax seediq nii ho? 55Seediq nii we uxe laqi mpsmalu so qhuni peni? Uxe Maria kesun ka bubu na peni? Uxe Yakobu, Yosehu, Simon ma Yehudah ka mtswai na peni? 56Uxe nii theyaq ita ka mtswai na mqedil peni? Peeyah inu ka kana ndaan na so nii da ho?” 57Kiya de tmraqil malix Yesu ka dheya. Rmengo dheya ka Yesu: “Ini splui wano meniq alang na ma sapah na nanak ka mpgeela kari.” 58Ado ini snhii ka dheya de, ini qeepah egu beyax qneepah hiya ka Yesu.
Currently Selected:
Matay 13: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
