Matay 12
12
Maangal Mugi Ali Sngayan
(Mrk 2:23-28. Ruk 6:1-5)
1Pkelu ali sngayan ciida, moda neepah mugi ka Yesu. Muure ka tnugsaan na. Kiya de mangal mugi ma mekan. 2Mita ka seediq Parisay de rmengo Yesu: “Tai, qmeepah ini pnlengu qqpahun ali sngayan ka tnugsaan su!” 3Rmengo dheya ka Yesu: “Ndaan muure ciida ka Dawid ma seediq smnegul heya ge, uxe namu smpegan ka nii ho? 4Mremux Sapah Thmkuwan nuUtux Baro ka heya. Wada mekan pang snapuh ka dheya. Ini pnlengu mekan pang snapuh nii ka heya ma seediq tnqene heya, wano dmsapuh ka mtduwa mekan. 5Dungal we pkelu ali sngayan ciida, wada smeeliq ali sngayan ckceka Sapah Thmkuwan hiya ka dmsapuh we uka qnnaqah uri. Ckceka gaya hiya we ini namu spegi peni? 6Rngage maku, nii hini ka mgkala Sapah Thmkuwan knparu. 7Nasi namu klaun: ‘Smkuxul ku ba gnaalu ka yaku, ini ku skuxul snapuh.’ Kari nii we naka namu ini ngali niqan qnquwan ka seediq uka qnquwan. 8Ado Bukung ali sngayan ka Laqi seediq.”
Seediq Rqeling Icil Baga
(Mrk 3:1-6. Ruk 6:6-11)
9Mlatac hiya ka Yesu, mremux sapah pssliyan seediq Yudaya. 10Tai, meniq hiya ka 1 seediq rqeling icil baga. Nii satang migin qqberiq daha mege kari, kiya de smiling heya: “Mnuglengu ka pkmalu mnarux ali sngayan ho?” 11Rmengo dheya ka Yesu: “Ima namu ka gaga hini, niqan 1 miric wada mtuting beling ali sngayan ciida, ini namu qrapi ma bbilun namu peeyah hiya ho? 12Seediq we hmrinas niqan rrihan daha miric! Kiya de mllengu ka qmeepah malu ooda meeniq ali sngayan.” 13Kiya de rmengo seediq kiya ka Yesu: “Hkero baga!” Hkragun na ka baga na de wada malu ka baga, mntena so icil baga na. 14Wada nganguc ka seediq Parisay, mpprengo huwa kesun phuqil ka Yesu.
Tnqliyan Utux Baro
15Klaun Yesu ka nii de mlatac peeyah hiya. Niqan hbaro ba seediq smnegul heya. Wada na qhdeun pkmalu ka seediq mnarux ckceka daha ka Yesu. 16Dmurun dheya, iya sai smneeru nganguc ka heya. 17Nii we kika mpbale kari rnengo Isaya mpgeela kari:
18“Tai, tnqliyan gneegan mu,
sgaalu mu ma kuxul mu bale peeyah lhebun.
Bege mu heya ka Bgihur mu,
maha mquri seediq icil gmarang msderux ooda ka heya.
19Ini ptgdiyal kari ka heya, ini pddiras,
uka ani 1 seediq mpqbahang hrenang na ckceka elu paru.
20Mnluqah brhengil we uxe na gremun,
mpkuuka ba ka camo we uxe na phengun,
betaq na pdgyalun mbeyax ka msderux ooda.
21Msatang ngayan na ka kana seediq icil.”
Beerjebul Kesun Smngayan ka Yesu
(Mrk 3:20-30. Ruk 11:14-23, 12:10)
22Ciida, niqan ka seediq, desun daha hiya ka 1 mngangah ma mbudu doriq ga qrapun bgihur naqah. Wada pklmeun Yesu ka heya da. Mkela rmengo ma betaq mita uri da. 23Skluwi bale ka kana hbaro seediq, rmengo: “Uxe laqi Dawid ka nii peni?” 24Mbahang kari seediq ka Parisay de rmengo: “Pqduriq bgihur naqah ka seediq nii we pnooda na ba Beerjebul Qbsuran Paru Bgihur Naqah kiya.” 25Mkela lnglungan daha ka Yesu, kiya de rmengo dheya: “Mtgdiyal dheya nanak ka 1 qnlhangan we maha asi ktadus. Mtgdiyal dheya nanak ka 1 alang uxe uri 1 sapah we uxe mpheyu. 26Nasi pqduriq Satang ka Satang, kiya ka mtgdiyal dheya nanak. So kiya de mphuwa mesa mheyu ka qnlhangan na da ho? 27Nasi mu pnooda Beerjebul pqduriq dbgihur naqah ka yaku de pnooda ima pqduriq dbgihur naqah ka lqlaqi namu ho? So kiya de dheya ka moda pgkela malu namu ma qnquwan namu! 28Nasi mu spooda Bgihur Utux Baro ka spqduriq mu dbgihur naqah, kiya de tena dehuk yamu ka qnlhangan Utux Baro. 29Huwa mesa mosa gmeeluk mkkere ba tnsapah nii ka seediq? Asi na ka pllayo mekuy ka mkkere ba tnsapah nii han, nasi uxe so nii, uka na gglekun ka qyqeya tnsapah na di. 30Ini psuupu kenan we kika tbrinah kenan. Ini psuupu kenan psseli we kika nii mpswaye. 31Maanu so kiya de rngage maku, kana qnquwan seediq ma kana kari smngayan we srwaun kana. Kiya de smngayan Bgihur Utux we uxe srwaun. 32Nasi pqnaqah rmengo Laqi Seediq we tduwa srwaun. Kiya de nasi smngayan rmengo Bgihur Utux ka seediq, ani kdesan saya uxe uri we kdesan nexal we uxe ba srwaun.”
Malu Qhuni ma Naqah Qhuni
(Ruk 6:43-45)
33“Malu ka qhuni we malu ka pnugheyi na uri. Naqah ka qhuni we ida naqah ka pnugheyi na uri. Ado peeyah gnhei na de maha klaan ka malu ma naqah qhuni. 34Dlutuc quyu naqah! Naqah namu seediq ka yamu de mphuwa mesa mtduwa rmengo malu kari dungal ho? Ado mmaanu ka knstenge lhebun we maha kiya ka srengo ckceka quwaq. 35Malu seediq we smeku malu lhebun. Naqah seediq we smeku naqah lhebun. Kiya de peeyah lhebun meyah ka naqah. 36Rngage maku, ali psgeegan ciida, ida daha srtudul smneru kana ka wada srengo. 37Ado spooda daha kari su ngalun su na msderux. Dungal we spooda daha kari su peeniq su na niqan qnquwan.”
Mesa Pnskraya
(Mrk 8:11-12. Ruk 11:29-32)
38Kiya de, rmengo Yesu ka duma dmptpatis ma duma seediq Parisay: “Mptgesa, braho su pqtai nami pnskraya peeyah sunan.” 39Cmiyuk rmengo ka Yesu: “Mesa pnskraya ka kndesan naqah ma mmhemuc msuupu, wano pnskraya ba Yonah mpgeela kari nii, uka ka pnskraya bbege mknexal naqah ma mmhemuc msuupu nii. 40Meniq 3 ali ma 3 rabi ckceka nbuyas paru qcurux ka Yonah. Mntena so nii, Laqi seediq uri we 3 ali ma 3 rabi meeniq toma dxeral. 41Ali psgeegan ciida, mptutuy ka seediq Nineweh ma mptaanak qnnaqah mknexal saya. Ado dheya we wada priyux lnglungan peeyah mnbahang gnrangan kari Yonah. Tai! Nii hini saya ka 1 seediq mgkala Yonah knparu! 42Ali psgeegan ciida, mptutuy pneyah toma ka qbsuran paru mqedil we meyah mptaanak qnnaqah mknexal saya. Ado pneyah rebuq ba dxeral qqbahang na kari knkela lmngelung Selomoh. Tai, nii hini saya ka 1 seediq mgkala Selomoh knparu!”
Meyah ka Utux Mqnnaqah
(Ruk 11:24-26)
43“Niqan ka bgihur naqah mlatac peeyah 1 seediq. Mtqiri mkkesa dxeral mdengu, migin ssaun na msange. Kiya de ini sdiyal. 44Kiya de rmengo ka heya: ‘Mosa ku brinah sapah pnyahan mu dungal.’ Mosa de taan na ga sksikan ma ga smterung. 45Kiya de mosa ka heya ma desun na ka 7 dungal bgihur naqah mgkala heya naqah ma mremux meniq hiya. So kiya de seediq nii ge, pntnaun so plaale we mgkala ba qnnaqah ka hiti da. Maha so nii ka mknexal saya uri.”
Ima ka Lutuc Yesu
(Mrk 3:31-35. Ruk 8:19-21)
46Gisu mpprengo hbaro ba seediq ciida ka Yesu, tai, gaga mheyu nganguc ka bubu na ma dmtswai na. Kmprengo Yesu ka dheya. 47Rmengo Yesu ka duma daha: “Tai, bubu su ma dmtswai su rseno we ga mheyu nganguc. Kmprengo isu ka dheya.” 48Kiya de cmiyuk rmengo ka Yesu: “Ima ka Bubu mu? Ima ka mtswai mu?” 49Hmkero baga na tmiyu tnugsaan na ka heya, rmengo: “Tai! Bubu mu, mtswai mu! 50Ado ima ka muyu lnglungan Tama mu ga baro, kiya ka mtswai mu rseno, mtswai mu mqedil ma bubu mu.”
Currently Selected:
Matay 12: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
