Matay 11
11
1Mnhedu dmurun 12 tnugsaan na ka Yesu de mlatac peeyah hiya, mosa tmgesa ma gmarang lualang daha.
Meyah Tqita Yesu ka Tnugsaan Yohane
(Ruk 7:18-35)
2Yohane we qbhangan na ckceka sapah kuung hiya ka qneepah Kiristo ma smkagul tnugsaan na, 3smiling Yesu: “Isu ka mmeyah na kiya ho? Uxe uri we mtara nami 1 mmeyah na ho?” 4Cmiyuk rmengo dheya ka Yesu: “Saani smneeru Yohane ka qntaan namu ma bnhangan namu. 5Kiya ka wada qmita ka mbudu, mkkesa ka mrikic, msbgurah heyi ka msburo heyi, mbahang ka mrbuni, pkdusun ka wada mhuqil ma grangan malu kari ka seediq qrinuc. 6Ani ima ririh yaku ini ktakur we niqan mbleyaq.” 7Wada ka tnugsaan Yohane da. Rmengo hbaro ba seediq quri Yohane ka Yesu: “Mosa namu mita maanu tadus brenux cuuxal ho? Mita namu slgelu bgihur ka brhengil ho? 8Maanu ba ka nsaan namu mita ho? Seediq mlukus malu lukus ho? Tai, ga meniq sapah qbsuran paru ka seediq mlukus malu lukus. 9So kiya de maanu ba ka nsaan namu mita ho? Qmita namu mpgeela kari ho? Rngage maku, bale ba, heya ge mgkala mpgeela kari ka heya. 10Heya ge kiya ka seediq gaga spatis Patis:
‘Tai! Mpskagul ku snkgulan mu mptgeela berah su,
meeniq berah su mpsramal elu su.’
11Bale ba rngage maku, so ka mntuting ckceka mqedil we uka ani kingal mgkala Yohane mptgaya smino knpruwan na. Ani so kiya, so ka tgbiciq bale ga Qnlhangan Baro hiya we mgkala heya knparu. 12Peeyah Yohane betaq saya ka Qnlhangan Baro we gaga yahan kmremux ka Qnlhangan Baro. Mbeyax ba gmeeluk mangal ka seediq mpgeeluk. 13Kana dmpgeela kari ma gaya, betaq Yohane we wada rmengo kari pgeela ka dheya. 14Nasi namu smruwa maangal, Yohane nii ka Eliyah mmeyah. 15Niqan birac we bleyaq ba mbahang!”
16“Pntnaun mu maanu ka mknexal saya ho? Mntena ba so laqi gaga tleung bbrigan ma mlawa dadal daha:
17‘Miyuk nami iyuk sunan, Ini namu keeki ka yamu.
Muuyas nami uyas mbasi, Ini namu qnaqah kuxul.’
18Ado meyah ka Yohane de ini ekan ma ini imah. Rmengo ka seediq de: ‘Gaga qrapun utux mrutiq ka heyi na da.’ 19Meyah ka laqi seediq dungal. Mekan ma mimah. Rmengo ka seediq da: ‘Tai, seediq nii we msnekan ma tnssino. Dadal maangal pila nqbsuran ma seediq niqan qnquwan noda.’ Kiya de mooda ndaan na pgkela knbale na ka knkela lmngelung.”
Alang ini Snhii
(Ruk 10:13-15)
20Kiya de mseru rmengo lualang ndaan na qmeepah lmlamu paru beyax qneepah na. Ado ini priyux lnglungan ka dseediq hiya: 21“Qorajin, smtali su bale! Betsaida, smtali su bale! Ado kana paru beyax qneepah wada mu sqeepah yamu, nasi mu daun meepah Turos ma Cidon de, naka peeyah cbeyo mlukus lukus mbasi, mubung qbulic ma kmpriyux lnglungan daha da. 22Kiya de rngage maku, ali psgeegan ciida we maha mslokah pntnaun yamu ka Turos ma Cidon! 23Isu nii, Kaparnaom,
ye su mesa ngngalun su betaq karac baro ka isu peni?
maha su mtuting betaq tuxan mnkuung ka isu!
Ado paru beyax qneepah mu meniq isu hiya, nasi sqepah Sedom, naka meniq hiya betaq saya ka alang. 24Kiya de rngage maku, ali psgeegan ciida we maha mslexan pntnaun sunan ka Sedom.”
Aguh Yaku Hini
(Ruk 10:21-22)
25Ciida rmengo ka Yesu: “Tama, Bukung karac ma dxeral. Mqaras nami sunan! Ado wada su sgleing seediq niqan tunux ma mkela lmngelung ka so nii, so laqi rabu de sptuura su da. Tama, kiya. Ado lnglungan su we bale ba so nii. 26Bale ba, Tama. Nii bale ka lnglungan su. 27Tama mu we wada na spstama yaku ka kana ani maanu. Wano Tama, uka ani ima ka mkela ima ka Laqi. Wano Laqi ma seediq kmptraun Laqi, uka ani ima ka mkela ima ka Tama. 28Kana ga mqraqil ma mapa mchedil we eyah kenan hini! Psngayun maku. 29Yamu we pai ka kudo mu, eyah slluhe kenan. Ado mgseesu ma psbiciq lnglungan mu ka yaku. So kiya de maha namu maangal psngayan ka yamu da. 30Ado leexan ka kudo mu ma slokah ka ppaun mu.”
Currently Selected:
Matay 11: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
