Matay 10
10
Mlawa 12 Snkgulan
(Mrk 3:13-19. Ruk 6:12-16)
1Tosun na mlawa ka 12 tnugsaan na ka Yesu, biqan na pusu beyax ppqduriq daha dbgihur naqah, pkmalu daha kana mnarux ma kana lmlamu knuuwic. 2Ngayan 12 snkgulan we so nii: Plaale we Simon kesun ka Petros, Andreas mtswai na. Yakobu laqi Cebeday ma Yohane mtswai Yakobu. 3Pilipos ma Bartolomay, Tomas ma Matay maangal pila nqbsuran, laqi Alhuay Yakobu ma Taddai, 4Pnspuwan mttilux dmayo alang kesun ka Simon ma Yehudah seediq Iskariot, kiya ka mbaruy Yesu.
Smkagul 12 Snkgulan
(Mrk 6:7-13. Ruk 9:1-6)
5Smkagul 12 seediq nii ka Yesu, rmengo ba dheya: “Iya osa ddxeral seediq icil qnlhangan, iya teme alang seediq Samareia. 6Nuqu mosa sapah Israel miric mnugedang hiya. 7Mkkesa namu ma garang uri, rngagi: ‘Daling ka Qnlhangan Baro da!’ 8Pklmei ka seediq mnarux, pkdusi ka seediq wada mhuqil, psbgurah ka seediq mnarux msburo heyi, pqdriqi ka bgihur naqah. Uxe namu bnaruy ka maangal we uxe namu brigan ka mege uri. 9Iya adis king, ging ma pila ka ckceka lubuy habik namu. 10Mkleelu namu ciida we iya adis lubuy, iya adis 2 lukus pstrmaun, iya adis ramil uri ma hukuc. Ado mangal ngngalun daha ka mpqeepah we mndungus ba ka kiya. 11Ani alang paru, ani alang biciq ka tmayan namu ge, bleyaq smiling teta ima ka ttmayan namu. Kiya de asi eniq hiya ma betaq namu mswaye hiya. 12Mremux namu sapah na de, mbeyax namu kesi ka sapah kiya. 13Nasi psteme ka sapah nii ge smbleqan pnesa namu we maha meniq sapah kiya. Nasi ini psteme mangal ka sapah de mpberih yamu ka smbleqan namu. 14Ani ima nasi ini psteme yamu, ini qbahang kari rnengo namu, mlatac namu peeyah sapah nii ma alang paru nii ciida ge, htii plhelah ka qbulic dxeral papak namu. 15Bale ba rngage maku, ali psgeegan de pntnaun so alang kiya we nuuqu mslokah ka Sedom ma Amorah!”
Ptraqil Mmeeyah
(Mrk 13:9-13. Ruk 21:12-19)
16“Tai! Smkagul ku yamu mosa nganguc, mntena so miric mremux ckceka huling bbuyu. Maanu so kiya de, yamu we pntena so knkela quyu ma kntaso byugu. 17Qlhangi ka seediq gaga, ado dheya we bege namu daha prngagan ka yamu. Kiya de sbetun namu daha meniq sapah pssliyan daha. 18Ririh yaku ka desun namu daha berah dmpdudul ma dqbsuran paru. Kiya de ppgkela namu dheya ma seediq icil qnlhangan. 19Sbege namu daha seediq ciida ka yamu we, iya pslhebun mphuwa ta mesa rmengo, uxe uri we mprengo ta maanu. Dehuk ciida de, bege mu yamu ka kari rrengo namu. 20Ado uxe yamu ka mprengo, Bgihur Tama namu ka pooda yamu rmengo. 21Mtswai we sbege na ka mtswai. Tama we sbege na phqilun ka laqi uri. Mtutuy ka laqi we mptbrinah pphuqil ddrudan daha. 22Ririh ngayan mu ka pqnqihun namu daha hbaro seediq. Kiya de ini klgelu knremun ka seediq we maha dooyun baga. 23Trqilun namu daha meniq alang hini ka seediq we qduriq mosa 1 alang dungal. Bale ba rngage maku, ini namu qhdei moda mkkesa kana ka lualang Israel ciida we meeyah ka Laqi seediq da.”
24“Tnugsaan we ini pnkala mptgesa, tnqliyan we ini pnkala tnpusu sapah. 25Mntena so sntrengan mptgesa ka tnugsaan, so mntena tnpusu sapah ka tnqliyan we mndungus so kiya da. Dehuk niqan seediq smngayan kingal pusu tnsapah Beerjebul de maha hmuwa mesa ka tnsapah na da ho?”
Iya Kiicu
(Ruk 12:2-7)
26“Kiya de, iya kcugi ka dheya, ado ga bungan ka noda we uka ka uxe ptraun. Uxe uri we ga liingun ka noda we uka ka uxe maha klaun. 27Rnengo mu yamu ckceka mnkuung we maha namu asi ptuura rmengo. Hnyeho namu siyo birac we maha namu asi ptuura rmengo. 28Tduwa phuqil heyi ma ini tduwa phuqil utux bgihur we iya kcugi ka dheya. Mtduwa pkuuka utux bgihur ma heyi meniq ckceka tuxan pkdraan we kiya ka kcugi. 29Uxe 1 kretan brigan ka 2 qbheni peni? Nasi ini sruwa ka Tama namu de ani 1 uxe mptuting dxeral. 30So yamu ge ani snuunux namu we wada qhdeun smepu da. 31Maanu so kiya duma iya kiicu. Mgkala egu ba qbheni niqan rrihan ka yamu!”
Ini Deqo Kiristo
(Ruk 12:8-9)
32“Maanu so kiya de ani ima ini deqo kenan meniq berah seediq we uxe ku mpdeqo heya meniq berah Tama mu baro uri. 33Ani ima ka dmeqo kenan meniq berah seediq we mpdeqo ku heya meniq berah Tama mu baro uri.”
Rrihan Tnugsaan
(Ruk 12:51-53, 14:26-27)
34“Iya lngelung meyah ppsbale bobo dxeral ka yaku. Uxe ku maadis ppsbale, madis ku hlmadac. 35Ado yahan mu ka yaku we
ptbrinah tama ka seediq,
ptbrinah bubu ka laqi mqedil,
ptbrinah payi ka ina.
36Pais seediq we kika tnsapah daha nanak.”
37“Spgkala na gmaalu ka tama ma bubu we ini tduwa mtnugsaan mu. Spgkala na gmaalu ka laqi na rseno ma mqedil we ini tduwa mtnugsaan mu. 38Ani ima ini phean jyujika na nanak snegul kenan we ini tduwa mtnugsaan mu. 39Maangal knuudus na we pgdangun na ka knuudus na. Ririh yaku ka wada pgedang knuudus we maha maangal kuudus.”
Rmengo Maangal Snadu
(Mrk 9:41)
40“Psteme yamu we kiya ka psteme kenan. Psteme kenan we kiya ka psteme smnkagul kenan. 41Ado mpgeela kari we ngali so mpgeela kari psteme, kiya de maangal snadu gaga sbege mpgeela kari. So seediq msderux we ngali so seediq msderux psteme, kiya de maangal namu snadu sbege seediq msderux ooda. 42Ani ima, ririh ngayan nii, ani namu mangal 1 pngerah tleetu qsiya spimah namu 1 tgbiciq ba dheya nii. Bale ba rngage maku, mosa mangal snadu ka heya.”
Currently Selected:
Matay 10: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
