Matay 9
9
Beyax Smruwa Rutiq
(Mrk 2:1-12. Ruk 5:17-26)
1Taapa asu ka Yesu, mntaril rcilung ma meyah alang na nanak. 2Tai, niqan ka duma seediq spheal daha ka 1 seediq ini pklgelu heyi mntaqi tnqiyan na qlapo ma meyah berah Yesu. Qmita so nii snhiyan daha ka Yesu de rngagan na ka mnarux ini pklgelu heyi: “Laqi, kbeyax, wada srwaan ka qnquwan su da!” 3Tai, rmengo lnglungan daha ka duma dmptpatis: “Seediq nii we gisu rmengo kari smngayan Utux Baro!” 4Mkela lnglungan daha ka Yesu, kiya de rmengo: “Hmuwa, ma namu lmngelung naqah ka ckceka lhebun namu ho? 5Rmengo: ‘Wada srwaan ka qnquwan su da’ ma ‘Tutuy kkesa da’ we tgiinu ka msleexan ho? 6So pgkela yamu, Laqi Seediq we niqan pusu beyax na ssruwa qnquwan meeniq bobo dxeral.” Kiya de, rngagan na ka seediq ini pklgelu heyi: “Tutuy, angal tqiyan su ma osa sapah da.” 7Kiya de mtutuy ka heya duma wada sapah na da. 8Qmita nii ka hbaro ba seediq de miicu ka lhebun daha, tmdahu Utux Baro ado wada na sbege seediq ka so nii pusu beyax.
Mlawa Matay
(Mrk 2:13-17. Ruk 5:27-32)
9Mlatac peeyah hiya mosa tgberah ka Yesu, taan na ka 1 seediq. Ngayan na we Matay. Gaga tleung sapah ngalan pila. Kiya de rmengo heya ka Yesu: “Snegul kenan!” Kiya de mtutuy ka heya duma smnegul Yesu.
10Niqan texal, tleung mekan hnpure sapah ciida ka Yesu. Tai, meyah ka hbaro ba maangal pila nqbsuran ma seediq niqan qnquwan, msuupu tleung mekan Yesu mtnugsaan na. 11Qmita so nii ka seediq Parisay de rngagan daha ka tnugsaan Yesu: “Hmuwa, ma theyaq mekan dmaangal pila nqbsuran ma seediq niqan qnquwan ka mptgesa namu ho?” 12Mbahang so nii ka Yesu de, rmengo: “Ani naq uka ising ka seediq mbeyax heyi. Asi ka niqan ising ka mnarux seediq. 13Matis ka Patis: ‘Smkuxul ku gnaalu ka yaku. Ini ku skuxul snapuh’. Sai lmngelung bale ka kari mu nii. Ado eeyah mu we uxe ku meyah mlawa msderux ooda seediq, seediq niqan qnquwan noda ka seeyah mu mlawa.”
Ptgaya Ini Ekan
(Mrk 2:18-22. Ruk 5:33-39)
14Ciida, meyah smiling Yesu ka tnugsaan Yohane: “Hmuwa, ma nami knteetu moda gaya ini ekan ka yami ma seediq Parisay? Ini ooda gaya ini ekan ka tnugsaan su ho?” 15Rmengo dheya ka Yesu: “Msuupu mtheyaq riso pstrengun ma seediq ddangi ciida han we mtduwa naqah kuxul ka seediq ddangi pstrengun peni? Kiya de mpdehuk ka ali, seediq we ddesun daha peeyah ckceka daha hiya ka riso pstrengun. Ciida de asi ka moda gaya ini ekan ka dheya di. 16Uka ani ima ka cmapang bgurah galiq gaga cmucac lukus. Nasi so kiya de bgurah galiq cnapang we sgliqun na ka cmucac lukus, maha mrana paru ka msnugaliq da. 17Uka ani ima ka tmquri bgurah sino ckceka cmucac lubuy qraqil sino. Netun so kiya de prequn bgurah sino ka cmucac lubuy qraqil sino, pqnaqah ka sino ma lubuy qraqil. Asi ka tqriun na bgurah qraqil sino ka bgurah sino. Kiya ka maha malu ka ddaha daha.”
Weewa Mpqlahang Sap ma Mqedil Mnarux Msdara
(Mrk 5:21-43. Ruk 8:40-56)
18Gaga rmengo so kari nii ciida ka Yesu. Tai, niqan ka 1 mpqlahang sapah pssliyan meyah tmbqelic heya, rmengo: “Wada hani mhuqil ka weewa mu da. Braho su ba, sai tmelung baga su ka heyi na, kiya de mpkuudus ka heya.” 19Mtutuy ka Yesu ma msuupu heya mosa, smnegul ka tnugsaan na uri.
20Tai, niqan ka 1 mqedil mnarux msdara tena 12 knkawas, meyah bukuy Yesu, tmelung palic lukus na. 21Ado rmengo lhebun na ka heya: “Wano ku tmelung lukus na de maha ku na klmeun da.” 22Mspgeriq heyi na ka Yesu ma qmita heya, rmengo: “Weewa, kbeyax! Snhiyan su ka wada pkmalu isu!” Kiya de peeyah ciida, wada asi kmlei ka mqedil nii da.
23Meyah dehuk truma sapah mpqlahang hiya ka Yesu, taan na ka seediq mtubu ma hbaro ba seediq nii mrrudu squwaq, 24kiya de rmengo: “Osa nganguc ka yamu! Ini qhuqil ka laqi mqedil nii. Nii mtaqi!” Mhulis heya ka dheya. 25Wada psaun nganguc ka dseediq nii de, mremux ka Yesu. Dooyan na baga ka laqi mqedil. Kiya de mtutuy ka laqi mqedil nii da. 26Mkgarang kana alang hiya ka snneeru daha so nii.
Rmaguh Doriq 2 Seediq Mbudu
27Mlatac peeyah hiya ka Yesu ciida, niqan ka 2 seediq mbudu doriq smnegul heya. Mdiras mlawa: “Laqi Dawid, glaani nami!” 28Mremux sapah ka Yesu de meyah heya ka 2 seediq mbudu. Rmengo dheya ka Yesu: “Snhii namu mpkela ku qmeepah so nii peni?” Rmengo ka dheya: “Bukung, snhii nami.” 29Kiya de, tmelung doriq daha ka Yesu, rmengo: “Spooda snhiyan namu mpuso kiya bege mu sunan!” 30Mtraguh ka doriq daha da. Kiya de scugan rmengo Yesu ka dheya: “Qlahang ba ka yamu. Iya pgklai ani ima!” 31Ani so kiya, mosa nganguc ka dheya de sgarang daha kana alang hiya ka quri Yesu.
Pkmalu Mngangah
32Mlatac ka dheya ciida de, tai, niqan ka duma seediq desun daha berah Yesu ka mngangah ga qrapun bgihur naqah. 33Yesu we pqdriqun na ka bgihur naqah. Rmengo ka mngangah da. Kiya de mskluwi bale kana ka hbaro seediq, rmengo: “Uxe nami ba ntaan ka so nii meniq ckceka Israel!” 34Rmengo ka seediq Parisay: “Mnoda Qbsuran Paru Bgihur Naqah lmiwaq bgihur naqah ka heya.”
Gnhuwe Yesu
35Moda mkkesa mtqiri lualang paru ma lualang biciq ka Yesu. Tmgesa seediq meniq knkingal sapah pssliyan hiya. Sgarang na ani inu ka malu kari quri Qnlhangan Baro, pklmeun na ka lmlamu mnarux ma lmlamu knuuwic. 36Taan na ka hbaro ba seediq ga mqraqil ma uka mdayo, mntena so miric uka mtabu na de sgaalu na bale ka dheya. 37Kiya de rmengo tnugsaan na: “Egu bale ka qbrungun, ini ba khbaro ka mpqeepah. 38Maanu so kiya de druni ka Bukung mpqlahang qbrungun so maha nhari smkagul mpqeepah na meyah qmburung qbrungan na.”
Currently Selected:
Matay 9: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
