Malakiy 2
2
1Saya, dmsapuh! Sbege mu yamu ka gaya pndakar nii. 2Rmengo ka Utux Tmninun Mdoi Kana Supi: “Nasi namu ini qbahang, ini namu psai lhebun namu ma, ini namu pquri ngayan mu ka knledax de, mpeeyah ku pqraqil yamu ma, priyuxun mu cmiyus ka smbleqan. Bale ba we wada mu syusun ka snbleqan namu. Ado ini namu psai lhebun namu ka gaya pndakar nii. 3Qtai! Mpkseang ku lqlaqi mslutuc namu, rcuhun mu quti ka dqeras namu, kiya ka quti snapuh namu tnbugan. Sptheyaq daha yamu ma quti nii maadis nganguc ka seediq. 4Kiya ka mpkeela namu, yaku ka bnege gaya pndakar nii. So maha meeniq betaq ani knuwan ka sndhegan mu daha Lewiy. Rnengo Utux Tmninun Mdoi Kana Supi ka nii. 5Mnoda ku smdehu knuudus ma psbleyaq heya ka yaku. Wada mu sbege heya ka 2 nii ma, so mpniqan kniicu na ngayan mu ka heya. 6Gaga meeniq quwaq mu ka bale ba tnugesa. Quwaq na we uka ba ka ini psderux noda. Dmoi mbleyaq ma msderux theyaq mkkesa kenan ka heya ma, wada moda smbrinah hbaro seediq mlatac qnquwan noda ka heya. 7Quwaq msapuh we asi ka qmlahang gnkela. Kiya we mpeeyah quwaq na migin pndakar tnugesa ka seediq uri. Ado snkgulan Utux Tmninun Mdoi Kana Supi ka heya. 8Kiya we wada mridil ka yamu ma, wada namu ptakur hbaro ba seediq meeniq kari pndakar nii ka yamu. Yamu ka wada smeeliq sndhegan mu Lewiy. Rnengo Utux Tmninun Mdoi Kana Supi ka nii. 9Kiya de psbciqun mu ma uka bbrihan qnita ta yamu ka seediq. Ado ini namu puyu elu mu ma, qmita namu dqeras seediq meeniq gaya.”
Ini Pskingal Utux Baro ka Seediq
10Uxe niqan ta 1 kana ka tama ta bino? Uxe wano Utux Baro snmalu ita ho? Ma namu mqqberiq, smrutiq pnsdhegan Utux Baro ma ddrudan ta ho? 11Mberiq ka noda Yehudah, mnoda oda qnqihun meeniq Israel ma Yerusalem. Ado smrutiq sapah thmkuwan kuxul ba Utux Tmninun ka seediq Yudaya ma, mnangal mqedil tnhmuku utux icil. 12Kana mnoda nii, ani gaga tgkeela ma, gaga cmiyuk, ani yaa bnege snapuh Utux Tmninun Mdoi Kana Supi we, Utux Tmninun we ida na mpkuuka peeyah kobu Yakobu ka heya uri.
13Ida namu moda oda nii dungal ka yamu, kiya ka mubung spuhan Utux Tmninun ka rusuq doriq ma rusuq doriq mnbasi. Kiya ka ini qita snapuh nii ka Utux Tmninun ma, ini skuxul mangal snapuh peeyah baga ta ka heya. 14Rmnengo namu: “Hmuwa, ma so kiya ho?” Ado gaga pgkela cenga isu ma mqedil nangal su rsriso ka Utux Tmninun. Ani yaa mqedil su ka heya, ndaan su smdehu, kiya we wada su lixun ka heya. 15Nasi ida gaga niqan biciq bgihur ka seediq we, uxe ba moda so nii. Gaga migin manu ka seediq nii ho? Llqlaqi mslutuc Utux Baro! Qlhangi ba ka bgihur namu, ani namu ima iya ba lixi ka mqedil nangal namu sriso ciida. 16Rmengo ka Utux Tmninun, Utux Baro nuIsrael: “Qmriqu ku oda maalix mqedil ma mlukus mmhemuc pphuqil ka yaku. Kiya de asi namu ka qmlahang lhebun namu, iya ba oda psridil. Rnengo Utux Tmninun Mdoi Kana Supi ka nii.”
Smdaling ka ali Moda Psgao
17Dmoi namu kari meeyah namu prrudu Utux Tmninun, kiya we ida namu rmengo: “Kenu ka noda miyan prrudu heya ho?” Ado rmengo namu: “Kana qmnepah naqah we, malu mesa ka qntaan Utux Tmninun ma, smkuxul dheya uri.” Dungal we rmengo namu: “Gaga inu ka Utux Baro ini psaanak ho?”
Currently Selected:
Malakiy 2: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
