Malakiy 3
3
1Rmengo ka Utux Tmninun Mdoi Kana Supi: “Qtai! Mpskagul ku snkgulan mu mpsramal elu berah mu. Bukung gaga namu gimun we, asi dehuk sapah thmkuwan na. Snkgulan pnsdhegan we, kiya ka sntangan namu, qtai! Uxe beyo meeyah ka heya.” 2Ali yahan na we, ima ka mtduwa hmetur ho? Ptuura ka heya ciida we, ima ka mtduwa mheyu ho? Ado mntena puniq mmoda muduh smmalu ka heya, mntena mngihur doyun daha smmino ka heya. 3Heya we meeyah tleung mntena nii smino ging, moda pkbgurah seediq Lewiy, daun na muduh mntena king ma ging ka dheya. Dheya we mpooda msderux noda mege snapuh Utux Tmninun ka dheya. 4Ciida, mosa qqrasun mangal Utux Tmninun ka bnege snapuh Yehudah ma Yerusalem, mntena so ali tgberah bale ma, knkawas so cuuxal.
5Rmengo ka Utux Tmninun Mdoi Kana Supi: “Meeyah ku smdaling yamu ka yaku ma, mooda ku psgao. Moda ku nhari pgkela ma, mdakar mhhuni, mmhemuc msuupu, mberiq smdehu, hmilic snadu, mpkraki mqedil mqrinuc ma laqi qrinuc ma, mmhemuc mege qnnaqah so uka qnquwan ma, ini kiicu kenan.”
Bbege 1 Tnugmxalan
6“Yaku, Utux Tmninun we ini ba knpriyux. Kiya de, lqlaqi laqi Yakobu! Uxe namu mpkuuka. 7Peeyah ali rdrudan namu cbeyo, ida namu mlatac gaya pndakar mu ma ini qbahang. Saya, pquri kenan ka yamu, kiya ka mpquri ku yamu ka yaku uri. Rnengo Utux Tmninun Mdoi Kana Supi ka nii. Kiya we cmiyuk namu: ‘Huwa miyan pquri sunan ho?’ 8Tduwa gmeluk Utux Baro ka seediq ho? Kiya we gmeluk namu kenan ka yamu! Rmengo namu ka yamu: ‘Gaga inu ka gmneluk miyan sunan ho?’ Bale ba we, gaga oda 1 tnugmxalan bbege ma snapuh asi namu ka sbege nii ka noda namu. 9Ado wada gmeluk snapuh mu kana ka seediq qlhangan, kiya de meeyah heyi namu ka sniyus mu. 10Asi namu ka psaun repun mu ka snapuh bbege namu 1 tnugmxalan, so maha niqan uqun ka sapah mu. Pdai nii tlami ku, tai so yaa bale mpraguh blingan karac baro yamu ma, hheruy mu qmbleqan yamu betaq uka ppsaan. Rnengo Utux Tmninun Mdoi Kana Supi ka nii. 11Mpkseang ku utun, uxe moda smeeliq pnhmaan namu ka heya. Mosa niqan lipas qnpahan namu, ani yaa ini khada we uxe mpktuting uri. Rnengo Utux Tmninun ka nii. 12Niqan qnbleqan maha mesa ka qqlhangan, ado ma dxeral qqrasun ka kiya. Rnengo Utux Tmninun Mdoi Kana Supi ka nii.”
Sntangan Mbege Huwe ka Utux Baro
13Rmengo ka Utux Tmninun: “Knciyuk namu kari kenan.” Kiya we rmengo namu: “Rmnengo miyan kari manu wada knciyuk sunan ho?” 14Rmengo namu: “Sbrhuwan ka meepah Utux Baro, thei ta kari pnosa Utux Baro we, tgrengac ta ba mkkesa berah Utux Tmninun Mdoi Kana Supi we, manu ka ririh na ho? 15Saya, kesun namu niqan mbleyaq ka seediq psparu, dungal we dseediq meepah naqah we kesun namu psddehu bale. Ani mnoda psseung Utux Baro ka dheya we, ida wada qduriq ka dheya.”
16Ciida, mpprengo ka dseediq miicu Utux Tmninun we, tgleus ba peyah birac mbahang ka Utux Tmninun ma, gaga berah na ka patis lnglungun gaga matis dseediq miicu Utux Tmninun ma lmngelung ngayan na. 17Rmengo ka Utux Tmninun Mdoi Kana Supi: “Ali pndungus mu we, ida mpnaku ka dheya ma, pusu dnoi mu ka dheya. Mpgaalu ku dheya ma, mntena so seediq gmaalu laqi dmayo heya. 18Ciida, mpnpusal mqita namu so manu ka ini pntena dseediq msderux noda ma seediq naqah, dseediq qmeepah Utux Baro ma ini qeepah Utux Baro.”
Currently Selected:
Malakiy 3: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
