Malakiy 1
1
1Kari Utux Tmninun we spooda na Malakiy rnengo ka kari quri Israel.
Gnaalu Israel ka Utux Tmninun
2Rmengo ka Utux Tmninun: “Gmnaalu ku yamu ka yaku.” Kiya we cmiyuk namu: “Mgmaanu ka pntuura ggaalu su menan ho?” Rmengo ka Utux Tmninun: “Uxe qbsuran mtswai Yakobu ka Esaw peni? Kiya we gmaalu ku Yakobu, 3riqu mu ka Esaw. Hrahun mu ka dgiyaq na ma bege mu huling tadus brenux ka dxeral na.” 4Nasi rmengo ka Edom: “Ani hrahun ka alang miyan we sbgrahun miyan smalu dungal.” Cmiyuk so nii ka Utux Tmninun Mdoi Kana Supi: “Psmlei ka dheya han, ida mu hrahun. ‘Qlhangan qnnaqah’ uxe uri we ‘Dseediq kseengun Utux Tmninun ani betaq knuwan’ kesun seediq ka dheya.” 5Mpqita ka doriq namu ma, mprengo namu: “Utux Tmninun we spruun paru meeniq nganguc ayus dxeral Israel!”
Mseang Mdakar Dmsapuh
6Rmengo yamu ka Utux Tmninun Mdoi Kana Supi: “Laqi we smparu tama, tnqliyan we smparu miicu tnpusu sapah. Tama ku ka yaku we kenu ka smparu namu kenan ho? Yaku ka tnpusu sapah we kenu ka smparu namu kenan ho? Yamu dmsapuh smbiciq ngayan mu nii!” Kiya we cmiyuk namu ka yamu: “Kenu ka noda miyan snbiciq ngayan su ho?” 7Ini kbgurah ka uqun we wada namu ssapuh bobo spuhan we, rmengo namu: “Kenu ka noda miyan psrutiq sunan ho?” Rmengo namu: Spuhan Utux Tmninun we tduwa smbiciq qmita. 8Yaa uxe niqan qnaqah ka wada namu mege mnbudu snapuh ho? Kiya de sai mege qbsuran mpqlahang namu ka nii, yaa mpqaras mangal ka heya ma mpstutuy sunan ka heya ho? Rnengo Utux Tmninun Mdoi Kana Supi ka nii.
9Saya, mdakar ku rmengo yamu, osa dmurun ba Utux Baro, tai so mpgaalu yamu ka heya. Pneeyah baga namu ka noda nii de, huwa mu kesun posa baro ka ddyamu ho? Rnengo Utux Tmninun Mdoi Kana Supi ka nii. 10Rmengo ka Utux Tmninun Mdoi Kana Supi: “Tai so niqan seediq meluk rhengun sapah thmkuwan, so uxe namu mpsqama bobo spuhan mu. Ini ku skuxul yamu ma, ini ku skuxul mangal bnege pneeyah baga namu snapuh uri.” 11Rmengo ka Utux Tmninun Mdoi Kana Supi: Peeyah nklaan hido betaq priyax hido we, gaga spruun ba paru dqlhangan ka ngayan mu. Meeniq ani inu, ngayan mu ka sbege daha snapuh skenux ma, sbege daha snapuh bgurah. Ado ngayan mu we gaga spruun paru meeniq dqlhangan. 12Kiya we wada namu smrutiq ngayan mu ma, rmengo namu: “Spuhan Bukung we ini kbgurah, kiya de tduwa sbciqun qmita ka heyi ma uqun bobo snpuhan.” 13Rmengo namu dungal: “Qtai! Prrudu ba ka noda nii!” Kiya we snyaxun namu. Rnengo Utux Tmninun Mdoi Kana Supi ka nii. Yahan namu smapuh mege ka gneeluk, mpika ma, mnarux na we, huwa mu kesun mqaras mangal peeyah baga namu ho? Rnengo Utux Tmninun ka nii. 14Tduwa syusun ka seediq psridil! Ani yaa gaga niqan baus miric ma, mnoda smdehu we, wada daha sbege Bukung ka snapuh niqan luqah. Ado paru ba qbsuran paru ka yaku, ngayan mu we kcugun meeniq dqlhangan. Rnengo Utux Tmninun Mdoi Kana Supi ka nii.
Currently Selected:
Malakiy 1: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
