Uyas Tsdamac Yirmeyah 5
5
Mesa Gaalu Utux Tmninun
1Utux Tmninun! Braho su lnglungi miyan heya ka ndaan nami,
psbrnahi miyan heya ka pnsqaan nami.
2Dxeral miyan we wada ngalun seediq icil qlhangan,
sapah miyan we wada dooyun seediq icil qlhangan.
3Laqi miyan qrinuc, uka tama nami,
mntena mqedil mqrinuc ka bubu nami.
4Asi ka mege miyan pila kiya ka niqan qsiya mahan,
ani qhuni miyan we asi ka brigun pila uri.
5Smdurak yami ma betaq nduyung ka pnqraqil,
muuwic bale uka sngayan.
6Asi miyan osa smtama Micrayim ma Asur,
so maha mttuku ka uqun miyan.
7Wada niqan qnquwan noda ka rdrudan miyan, uka hini saya ka dheya,
yami ka nii mapa qnquwan noda daha.
8Dtnqliyan ka nii qmlahang menan,
uka ka maangal menan peeyah baga daha.
9Ado niqan hlmadac ka tadus brenux,
asi miyan ka mkmhuqil migin ka uqun.
10Ado muure ma mtilux heyi,
so rqeda mtilux ka qraqil heyi nami.
11Mmhemuc mtheyaq dmqedil Sion ka dheya,
moda smeeliq dweewa lualang Yehudah ka dheya.
12Psdooyun daha pkdira ka baga dqbsuran,
ini daha sprui ka dqeras drudan.
13Spaapa daha btunux glangan ka rsriso,
tgcikul mapa qhuni ka lqlaqi.
14Uka rdrudan ka rhengun alang,
ini tubu tbegan ka rsriso uri.
15Asi sange ka qnaras lhebun nami,
kmpriyux tsdamac ka keeki miyan.
16Mtuting peeyah tunux ka bunuh ledax nami.
Teyal miyan mqraqil! Ado wada miyan niqan qnquwan noda.
17Ririh ba nii, mkuni ka lhebun nami,
mnkuung ka doriq nami.
18Ma tadus laxan ka dgiyaq Sion,
ado gaga mkkesa hiya ka huling bbuyu.
19Utux Tmninun! Qnlhangan su we betaq ani knuwan,
tluungan su we uxe mpsetuq kknxalan.
20Hmuwa ma su nii asi chungi bale yami?
Hmuwa ma su bsiyaq qmada yami?
21Utux Tmninun! Braho su pbrnahi miyan pquri sunan,
kiya ka tduwan miyan mbrinah.
Braho su sbgrahi ka knkawas miyan, ptnaani miyan so knledax cuxal.
22Yaa su bale asi ba qada yami,
mpquri yami mseang paru ho?
Currently Selected:
Uyas Tsdamac Yirmeyah 5: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
