Yexejqel 1
1
Tgplaale Qtaan Yexejqel so Utux (1:1-7:27)
Tluungan Utux Baro
15 ali 4 idas tg30 knkawas, meniq ku ckceka seediq qnerac ssiyo yayung Kebar ciida, mtraguh ka karac ma, mnita ku tuutux nuUtux Baro. 2Nii we pkelu 5 ali 4 idas tgrima knkawas bobo qnerac madis Yehoyakin qbsuran paru. 3Meyah Yexejqel msapuh laqi Bujiy ssiyo yayung Kebar dxeral seediq Krdiya hiya ka kari Utux Tmninun ma, tmelung heyi na ka baga Utux Tmninun.
4Qmita ku, qtai! Gisu peeyah tgbaro ka mbeyax ba bgihur ma, niqan kingal plabu paru. Tqwilaq ka mtqiri na ma, mtrherah peeyah hiya ka rana puniq. So ba limuk lmedax ka gaga ckceka puniq hiya. 5Dungal we 4 muudus ka criyu peeyah ckceka hiya. Hnyegan daha we so nii, niqan so seediq ka hnyegan daha. 6Ms4 ka dqeras daha ma, ms4 ka palic daha. 7Msderux ka papak daha ma, qapal papak daha we mntena papak wawa dapa. Tqwilaq bale mntena so xiluy limuk lnpaxan. 8Truma 4 palic daha we niqan baga seediq. Dqeras ma palic 4 muudus nii we so nii, 9gaga mllutuc ka palic daha. Mkkesa ka dheya ciida we ini pspgeriq, mqquri berah msderux mosa kana. 10Quri so dqeras daha we so nii, 4 muudus nii ka niqan dqeras seediq, tgnarac we dqeras rkelic rudu. Tgiiril we dqeras dapa ma, tgbukuy we dqeras kjiro. 11So nii ka dqeras daha. Kmugah mquri baro ka palic daha ma, 2 we mllutuc ma 2 we qmeerung heyi daha. 12Msderux mosa quri berah ka dheya. Mquri inu ka bgihur de, wada mquri hiya ka dheya uri, mkkesa ciida ini pspgeriq. 13Quri so hnyegan 4 muudus nii we, mntena so rana puniq srana ma, mntena hiru harung tqilung. Niqan puniq gaga mkkesa moda ccenga 4 muudus. Lmedax ka puniq nii ma, criyu peeyah puniq ka wilaq. 14Muudus nii we mntena tnqlwiqan wilaq mtbberih skiya.
15Qmita ku muudus nii, qtai! Ssiyo muudus niqan 4 dqeras nii we, niqan png1 ribo bbaang gaga bobo dxeral. 16Gnkudan ribo nii we so dnyangan mtumun btunux mgsama. Mntena kana hnyegan snlmean 4 ribo nii. Mntena so gaga ptpaun ckceka 1 ribo hiya dungal ka kingal gukuc. 17Mkkesa ka ribo nii we, msderux ma ini spgeriq. 18Tnqiri ribo nii we bbaro ba ma so kcugun bale. Mtqiri 4 ribo nii we gaga stngayan doriq kana. 19Mkkesa ka muudus nii we mtheyaq hiya mkkesa ssiyo na ka ribo nii uri. Mnkala peeyah bobo dxeral ka muudus we, mtheyaq hiya mnkala ka ribo uri. 20Mquri inu ka bgihur we, mquri nak hiya ka muudus uri. Mtheyaq mnkala meniq ssiyo na ka ribo, ado gaga meniq ckceka ribo nii ka bgihur dmuudus nii. 21Mkkesa ka muudus de mkkesa ka ribo uri. Msange ka muudus de msange ka ribo uri. Mnkala peeyah bobo dxeral ka muudus de mnkala bobo dxeral ka ribo uri. Ado gaga meniq ckceka ribo nii ka bgihur dmuudus nii.
22Bobo tunux dmuudus nii we niqan hnyegan rangah karac, mntena qrari tqwilaq, gaga so smapo bobo tunux daha. 23Toma rangah karac hiya we gaga msderux mllutuc kmugah ka palic dmuudus ma mssipo. Kn1 dmuudus we, gaga qmeerung dheya nanak ka 2 palic daha, kiya ka heyi daha nanak. 24Mkkesa ciida ka dmuudus we, mnbahang ku hrenang palic daha. Mntena so hrenang qsiya paru, mntena hrenang Utux Baro Mdoi Kana Beyax. Dungal we mntena so hrenang knhbragan supi. Msange ciida ka dmuudus we, mstkemu ka palic daha. 25Niqan hrenang peeyah rangah karac gaga bobo tunux daha. Msange ciida ka dheya we mstkemu ka palic daha.
26Gaga baro rangah karac ka bobo tunux daha we, niqan hnyegan so tluungan, so bale snlmean btunux mgqliyang. Bobo tluungan we so hnyegan seediq ka gaga hiya. 27Peeyah hwinuk na quri baro ka qnita mu we, so bale limuk tqwilaq ma mntena puniq. Peeyah hwinuk quri toma ka qnita mu we, mntena puniq. Niqan ledax bale ka mtqiri na. 28Qmuyux ciida de, so kenu ka hnyegan hako utux du we, so nak kiya ka knledax mtqiri ssiyo na uri.
So nii ka hnyegan knledax Utux Tmninun, qmita ku de, asi ku tgtemaq dxeral. Dungal we mnbahang ku hrenang gisu rmengo ka 1 heyi.
Currently Selected:
Yexejqel 1: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
