Uyas Tsdamac Yirmeyah 4
4
Yerusalem Bobo Wada Ngalun
1Ah! Wada uka ledax na ka king!
Knpriyux uka ledax na ka bale ba king!
Btunux sapah thmkuwan we sqada ani inu mxmuxi elu.
2Ani spntena king qmita ka malu ba laqi Sion,
gisu pntnaun qmita pngerah snmalu muduh dxeral!
3Ani huling bbuyu, ida mnunuh wawa na,
weewa seediq mu de krrinah naqah bale,
mntena rodux wili tadus brenux.
4Mdengu ka hema laqi muunuh ma sqapah kurang,
ani asi pesa uqun ka laqi biciq we uka ka mege dheya.
5Mnekan malu uqun ka seediq,
msqelung ssiyo elu saya.
Mlukus lukus purah tnqliyan we,
so smemur berah quti saya.
6Mgkala qnquwan noda Sedom ka qnquwan noda seediq mu.
Ani yaa uka seediq cmebu Sedom,
wada asi pkuuka ka Sedom.
7Mgkala huda knttaso ka seediq Najir,
hmrinas nunuh knbhege.
Mgkala kntanah btunux qrari ka heyi daha,
mntena mtumun mtlawa ka qnsdiqan hnyegan daha.
8Kiya de mgkala begu knqalux ka dqeras daha saya,
betaq ini klai qmita seediq ckceka alang.
Msklabuy ka qraqil heyi daha ma sqapah buuc,
mntena qhuni mdengu mkeruh kndungean.
9Seediq mhuqil hlmadac,
mgkala wada uqun ure.
Dmuure we ado uka ka gnhei peeyah qnpahan,
wada mkure mhuqil ka dheya.
10Ali pkuuka seediq mu ciida,
ani mnughuwe ba ka dmqedil we hmanguc laqi daha nanak ma ngalan daha uqun.
11Tperuq mseang ka Utux Tmninun,
srana sqama seang na.
Sdoi na puniq lmaung ka Sion,
psqama betaq pusu alang Sion.
12Ini snhii ka dqbsuran paru bobo dxeral ma kana seediq bobo dxeral ma,
betaq mpteme rhengun Yerusalem ka pais ma mppais.
13Nii we ririh qnquwan noda dmpgeela kari ma dmsapuh,
ado wada psdara phuqil seediq msderux ckceka alang ka dheya.
14Mntena mbudu mgeedang mkkesa alang ka dheya,
gaga srtiqan dara ka dheya dungal,
kiya ka uka ka kmtelung lukus daha.
15Mquri dheya mlawa ka seediq: “Yamu mrutiq nii, latac hini!
Osa! Osa! Iya ku tlengi!”
Qduriq tnooda ka dheya ciida,
rmengo ka dqlhangan:
“Iya pdai tnooda hini ka dheya.”
16Pkrehak dheya ka Utux Tmninun,
ini npusal psbrinah dheya.
Ini na sprui ka dmsapuh. Ini na sbleqi ka drudan.
17Tmnara miyan bale ddayo ka doriq miyan,
betaq msqelung ka doriq nami,
tmnara miyan ddayo peeyah seediq qmlahang gaga paga gmraka we, kiya ka qlhangan betaq ini dehuk pkuudus seediq!
18Smdurak dapil miyan ka pais,
kiya ka miicu miyan mkkesa alang nami nanak.
Daling ka ali nami,
Mtuku ka ali nami,
Gisu dehuk ka qnhdean miyan da.
19Hmrinas knslkagan qdiro ka smdurak menan.
Mhero menan ddgiyaq ka dheya,
tperuc tmara menan tadus brenux hiya.
20Hengak knuudus miyan ka cnwiqan abura Utux Tmninun,
wada qrapun beling tnraki daha hiya.
Quri so heya, rmnengo ku:
“Meeniq ta toma na,
mpkuudus ta ckceka dqlhangan.”
21Edom meeniq dxeral Uc! Qqarasi,
mooda sunan ka pngerah mahan nii uri.
Mpkbsukan su ma mpberas su.
22Sion! Wada mnhedu ka pkdira qnquwan noda su da,
uxe su na npsalun qmerac posa icil ka Utux Tmninun.
Edom! Ida mpkdira qnquwan noda su ka Utux Tmninun,
ptraun na ka qnquwan noda su!
Currently Selected:
Uyas Tsdamac Yirmeyah 4: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
