Yehosua 8
8
Kmremux Maangal Alang Maangal Alang Ay
1Rmengo Yehosua ka Utux Tmninun: “Iya kiicu. Iya knngungu. Tutuy ka isu, dduli ka kana supi osa mccebu alang Ay. Qtai, wada mu sbege baga su ka qbsuran paru alang Ay ma, dseediq na, alang na ma, dxeral na. 2Wada su hmuwa kesun ka alang Yerixo ma qbsuran paru Yerixo we, maha so kiya ddaun su alang Ay ma qbsuran paru alang Ay uri. Wano qyqeya ma tnbugan gneeluk namu pneeyah ckceka alang we, ani namu ngalun kiya. Isu we asi su ka psramal duma supi mqburang bukuy alang hiya.”
3Kiya de mtutuy ka Yehosua ma kana dsupi mpccebu mosa alang Ay. Yehosua we, gmao 3 mang supi mnpahung ba ma, skgulan na mccebu keeman ciida. 4Rmengo dheya: “Qtai, asi namu ka qmburang bukuy alang hiya ka yamu, iya latac theya ma, psramal bale ka yamu. 5Yaku ma kana dsupi nadis mu we, mpquri nami mosa alang kiya ka yami. Maha so hndure meyah smterung mccebu yami ka dseediq alang hiya de, mpqduriq miyan berah daha. 6Dheya we, meeyah smdurak menan ma, betaq miyan trkiun smtheya alang daha. Ado mprengo ka dheya: ‘Dseediq ni we, maha so sndure dungal mpqduriq peeyah berah miyan.’ Kiya de mpqduriq miyan peeyah berah daha ka yami. 7Kiya ka ciida, asi tutui peeyah qnbrangan namu hiya ka yamu ma, asi ngali ka alang kiya. Ado Utux Tmninun, Utux Baro namu we, wada na sbege baga namu ka alang kiya. 8Bobo wada namu ngalun ka alang de, asi namu ka sqmaun puniq ka alang. Puyu so rnengo Utux Tmninun moda.” 9Kiya de, smkagul dheya ka Yehosua. Mosa qnburang dxeral hiya ka dheya. Kiya ka cenga Beytel ma alang Ay, kiya ka quri pryaxan hido alang Ay hiya. Keeman ciida de, mkrabi ckceka supi hiya Yehosua.
10Mtutuy mgrebu ba ka Yehosua, moda smepu supi. Mquri alang Ay meniq berah kana seediq ka heya ma rdrudan Israel. 11Wada baro hiya kana ka supi mntheyaq heya. Mquri berah ma smdaling meyah berah alang. Kiya de pkobu tgbaro alang Ay ka dheya. Paayus 1 ayu cenga Yehosua ma alang Ay. 12Gmao 50'00 supi ka Yehosua ma, psaun na pqburang tmara cenga Beytel ma alang Ay, kiya de quri pryaxan hido alang Ay. 13Kiya de, mhedu psramal supi, kiya ka kana dsupi na ga tgdaya ma, supi na mpqburang pryaxan hido alang. Keeman na ciida, Yehosua we mosa mremux ckceka ayu. 14Qtaan qbsuran paru alang Ay de, mgrebu bale msuupu seediq alang hiya mosa nganguc. Heya ma kana supi we msseli pssliyan daha, kiya ka berah Arabah msterung Israel ma, mccebu dheya. Ini kela niqan supi ga qmburang bukuy alang ka qbsuran Paru. 15Mnnangi ini baka mccebu ma, mqquri elu tadus brenux qduriq meniq berah daha ka Yehosua ma dseediq Israel. 16Gaga splawa kana ka dseediq mneniq ckceka alang hiya ma, meyah smdurak dheya. Smdurak Yehosua ka dseediq Ay ciida we, kiya de qbriqun daha platac peeyah alang daha. 17Uka ani 1 mtngari ka seediq alang Ay ma Beytel, wada smdurak seediq Israel kana. Kiya de lixan daha ka alang gisu rwahan rhengun, mosa smdurak mhero seediq Israel.
18Rmengo Yehosua ka Utux Tmninun: “Pquri alang Ay ka snbrangan gaga baga su. Ado bege mu baga su ka alang kiya.” Kiya de mquri alang kiya peeyah smbrangan gaga baga na ka Yehosua. 19Hmkero baga na ka heya de, asi tutuy peeyah nniqan daha hiya ka supi qnburang. Asi sderux mquri alang kmremux, ngalan daha ka alang ma, asi daha psqmai puniq ka alang kiya. 20Psbrinah qmita bukuy ka seediq Ay. Qtai! Mqquri karac ka qrengul pneeyah ckceka alang. Uka ssaun daha tgleing, ani mosa hini ma, ani mosa so hiya. Dseediq qduriq mquri tadus brenux we, mbrinah meyah mccebu dseediq smdurak dheya. 21Yehosua ma dseediq Israel we, qtaan daha wada ngalan ka alang ma, peeyah ckceka alang ka qrengul de, mbrinah mosa mccebu seediq Ay ka dheya. 22Meyah mccebu peeyah ckceka alang hiya ka dsupi qnburang. Betaq qdhean mccebu peeyah berah ma bukuy ma, kana mtqiri ka dheya. Kiya de wada phqilun seediq Israel ka dheya. Uka ani 1 ka mtngari ma, uka ani 1 ka wada qduriq. 23Qrapun daha ka qbsuran paru Ay ma, desun daha Yehosua hiya.
24Seediq Israel we, wada daha phqilun kana ka dseediq Ay sndurak dheya meniq qnpahan ma tadus brenux. Wada mtakur toma hlmadac, betaq mhuqil kana. Kiya de mbrinah alang Ay ka seediq Israel. Dmoi hlmadac phuqil kana seediq ckceka alang hiya. 25Pnhuqil daha ali ciida, spegun ka rseno ma mqedil we 1 mang 20'00 heyi. Kiya ka kana ba seediq Ay hiya. 26Yehosua we ini na rdaani toma ka smbrangan baga na, asi ka betaq wada phqilun ka kana seediq Ay. 27Wano ba tnbugan ma qyqeya gneeluk daha peeyah ckceka alang we, wada daha ngalun. Nii we pnuyu daha tnugesa Utux Tmninun rnengo na Yehosua kiya. 28Wada sqmaun Yehosua ka alang Ay. Llixun daha betaq ani knuwan ka alang nii. Betaq saya ida gaga lixan hiya. 29Psduyun daha qhuni baro betaq keeman ka qbsuran paru Ay. Gbiyan de plaxun daha peeyah bobo qhuni. Smkagul seediq ka Yehosua, sqada daha rhengun alang ma, gtuun daha btunux ka bobo heyi na. Betaq ali saya ida gaga hiya na.
Smepu Gaya Meniq Dgiyaq Eybal
30Ciida, smalu 1 spuhan Utux Tmninun, Utux Baro nuIsrael meniq dgiyaq Eybal hiya ka Yehosua. 31Spuhan nii we ida so kari tnugesa na seediq Israel ka Moseh. Dmoi btunux ini dai xiluy, mntena so gaga spatis patis gaya hiya. Mege snapuh psqmaun Utux Tmninun bobo spuhan nii ka dheya. Kiya uri we, phuqil tnbugan ngalan daha snapuh ptbale. 32Yehosua ge, meniq berah seediq Israel, spatis na bobo btunux ka gaya pnatis Moseh. 33Mtg2 mheyu ssiyo kulu pnsdhegan, mtheyaq rdrudan, mdudul ma, qbsuran mpsgao ka seediq Israel, ani seediq hini ma seediq tnooda hiya. Meniq berah dmsapuh tnsapah Lewiy ka mpnhean kulu sndhegan, dmeka daha we mquri dgiyaq Gerijim, dmeka daha we mquri dgiyaq Eybal. Muyu tnugesa Moseh tnqliyan Utux Tmninun, psbleyaq seediq Israel. 34Bobo na nii de, Yehosua we spooda na kana pnatis patis gaya hiya, saangal na ka gaya kari ssbleyaq ma cmiyus. Daun na smepu texal. 35Kana kari rnengo Moseh, Yehosua we ini na ba srhuqi smepu ani kingal meniq berah kana seediq Israel, mqedil, lqlaqi ma, dseediq tnooda ckceka daha.
Currently Selected:
Yehosua 8: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
