Yehosua 7
7
Qmnuuqu Moda ka Akan
1Qmnuuqu noda daha quri qyqeya asi ka ssliqun ka seediq Israel. Mnangal qyqeya asi ka sgliqun ka Akan, laqi Karmiy, lqlaqi laqi Jabdiy ma, lqlaqi laqi Jerax pnswayan rdrudan Yehudah. Utux Tmninun we, mseang quri seediq Israel ka heya.
2Smkagul duma seediq peeyah Yerixo mquri nklaan hido Beytel, msdaling alang Ay meeniq Bet Awen ka Yehosua. Rmengo dheya: “Sai kmuruy qmita ka dxeral hiya.” Dseediq kiya de mosa kmuruy qmita alang Ay. 3Mbrinah meyah Yehosua hiya ma rmengo heya: “Ani nak ini osa hiya kana ka seediq. Ani nak 20'00 ma, 30'00 heyi ka seediq mosa kmremux de, ngngalun ta ka alang Ay. Iya psai kana ka seediq. Ado ini khbaro ka dheya.” 4Kiya de niqan 30'00 ka seediq wada hiya. Kiya de wada ini baka ka dheya ma, qduriq peeyah berah seediq alang Ay ka dheya. 5Wada phuqil 36 heyi daha ka seediq alang Ay, speeyah na rhengun daha smdurak dheya betaq Sbaring. Ini daha baka meniq nniqan dxeral theruy mcherus hiya. Mkrkerang ma miicu lhebun daha ma, betaq uka pahung daha.
6Kiya de asi smgaliq lukus daha ka Yehosua ma rdrudan Israel. Tgtemaq dxeral ka dqeras daha meniq berah kulu pnsdhegan Utux Tmninun betaq keeman. Merus qbulic tunux ka dheya. 7Rmengo ka Yehosua: “Ah! Utux Tmninun Bukung! Hmuwa, ma su pntrilun yayung Yarden ka dseediq nii ma pphuqil su dheya, kika sbege su baga seediq Amori ka dheya ho? Nuuqu miyan meniq sipo yayung Yarden hiya ka yami han! 8Bukung! Ani ba rabang braho su, wada dehuk qduriq peeyah berah pais ka seediq Israel de, maanu ka rrengo mu dungal peni? 9Mbahang ka seediq Kenaan ma seediq tndxeral hini de, meeyah tmlibu menan ka dheya. Maha daha ngalun peeyah bobo dxeral nii ka ngayan miyan da. Ciida de, hmuwa kesun ka paru ba ngayan su di ho?”
10Rmengo Yehosua ka Utux Tmninun: “Tutuy! Hmuwa ma su so nii tgtemaq dqeras su ho? 11Niqan qnquwan noda ka Israel, wada mangal qyqeya ssliqun, tbrinah pnsdhegan rnengo mu dheya. Gmeeguy mangal ma, mberiq moda ka dheya. Sptheyaq na qyqeya daha ka qyqeya sgsliqun. 12Maanu so kiya de, uxe pnheyu berah pais dseediq Israel ka dheya. Mpqduriq peeyah berah pais daha ka dheya. Ado qyqeya sgliqun kiya ka dheya. Nasi namu ini pkngali peeyah ckceka namu ka qyqeya sgliqun nii de, uxe ku mpsuupu yamu ka yaku da. 13Tutuy ka isu, sai prtaso psaanak ka seediq. Rngagi: ‘Prtaso yamu nanak quri ddaun namu kusun. Ado rmnengo so nii ka Utux Tmninun, Utux Baro Israel, seediq Israel! Niqan qyqeya sgliqun ka ckceka namu. Nasi namu ini pkngali peeyah ckceka namu ka qyqeya sgliqun nii de, uxe namu mpheyu berah pais namu ka yamu!’ 14Betaq mgrebu de, pygaani knkingal pnswayan rudan eyah berah mu. Pygaani gnao pnswayan rudan Utux Tmninun, pooda txtaxa pnswayan tnsapah meyah berah hini. Gnao pnswayan tnsapah we, asi ka spooda txtaxa tnsapah meyah. Gnao txtaxa tnsapah Utux Tmninun we, pdai rseno, knkingal meyah berah na. 15Dseediq gnao mu we, gaga niqan qyqeya sgsliqun ka hiya. Heya ma kana nangal na we, asi ka sqmaun puniq kana. Ado wada tbrinah sndhegan Utux Tmninun ka heya. Kiya uri we mnoda ooda mngataq ckceka Israel ka heya.”
16Kiya de, ttutuy mgrebu ba ka Yehosua. Spooda na pnswayan rudan Israel psseli mlawa berah na. Pnswayan rudan Yehudah ka wada geegun. 17Mlawa pnswayan rudan Yehudah ka heya. Gnao na we pnswayan tnsapah Jerax. Mlawa pnswayan tnsapah Jerax, spooda na rseno, knkingal moda berah na. Kiya de gmao Jabdiy ka heya. 18Mlawa tnsapah Jabdiy ka heya, spooda na rseno, knkingal moda berah na. Kiya de gmao pnswayan rudan Yehudah, lqlaqi laqi Jerax, lqlaqi laqi Jabdiy, laqi ba Karmiy, Akan. 19Rmengo Akan ka Yehosua: “Laqi mu. Pkldaxi ka Utux Tmninun, Utux Baro Israel. Ptuura qnquwan noda su meniq berah na. Tgsai ku hiya ka ndaan su, iya ku hiya liingi.” 20Cmiyuk Yehosua ka Akan: “Bale ba wada ku qmnuuqu moda Utux Tmninun, Utux Baro Israel ka yaku da. So nii ka ndaan mu. 21Ckceka qyqeya gnlekan mu hiya we, qmnita ku 1 lukus malu bale pgbaro Sinar ma 2'00 skere ging ma, 1 king knchedil 50 skere. Kuxul mu riyung ka qyqeya nii, kiya de wada mu desun. Qtai! Qyqeya nii we wada mu reesun toma dxeral kobu mu. Ging we ga meniq toma lukus mgbaro mu.”
22Kiya de smkagul seediq tmalang mosa kobu Akan ka Yehosua. Qtai! Gisu liingun truma kobu na ka lukus tgbaro kiya. Gaga meniq toma lukus tgbaro hiya ka ging. 23Ngalun daha peeyah kobu hiya ka qyqeya nii ma, desun daha Yehosua ma kana seediq Israel hiya, sheruy daha berah Utux Tmninun. 24Yehosua ma kana seediq Israel we, desun daha ayu Akor hiya kana ka Akan lqlaqi laqi Jerax, ging, lukus tgbaro, king ma, lqlaqi Akan, dapa, dapa roba, miric, kobu na ma, kana dnoi na. 25Rmengo ka Yehosua: “Ma su maadis pqraqil menan ka isu ho? Saya mbege pnqraqil sunan ka Utux Tmninun.” Kiya de seediq Israel we, mangal btunux phuqil heya ma, dmoi puniq psqama dheya ma, gtuun daha bobo heyi na ka btunux. 26Gntuwan egu bale btunux betaq saya ka bobo heyi Akan. Kiya de kmpriyux ka lnglungan Utux Tmninun, ini pquri heya mseang da. Kika ayu Akor betaq saya ka ngayan dxeral hiya.
Currently Selected:
Yehosua 7: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
