Yehosua 9
9
Mberiq Yehosua ka Seediq Gibon
1Mbahang noda nii ka dqbsuran paru meeniq pryaxan hido yayung Yarden, mquri ddgiyaq, brenux ma, ssiyo rcilung betaq Lebanon. Kiya ka dqbsuran paru seediq Xet, Amori, Kenaan, Perijiy, Xiwiy ma, Yebus. 2Kiya de msuupu ma pskingal lhebun daha kmpceebu Yehosua ma seediq Israel.
3Mnbahang ndaan Yehosua quri alang Yerixo ma alang Ay ka seediq Gibon de, 4smalu mberiq smkagul snkgulan mosa nganguc. Dheya we mapa cmucac lubuy ma cmucac qraqil lubuy sino ppaun daha bobo dapa roba. 5Plkusan daha ramil cmucac ka papak daha, plukus lukus cmucac ka heyi daha. Kiya uri we snmalu srpungan pang rinah mhrehur kndungean ka dheya. 6Meyah Yehosua ckceka kobu Gilgal hiya ka dheya, rmengo heya ma dseediq Israel: “Pneyah miyan theya ka yami. Braho su psdehu yami ka isu.” 7Rmengo seediq Xiwiy ka seediq Israel: “Yaani su gaga meniq ssiyo mu ka isu. Nasi so kiya de, mphuwa miyan mesa psdehu yamu ho?” 8Rmengo Yehosua ka dheya: “Tnqliyan su ka yami.” Rmengo dheya ka Yehosua: “Seediq namu ima ka yamu? Pneeyah namu inu?” 9Cmiyuk heya ka dheya: “Ririh ngayan Utux Tmninun, Utux Baro su, tnqliyan su we pneeyah miyan dxeral theya bale. Mnbahang miyan ngayan na ma ndaan na meniq Micrayim hiya. 10Kiya uri we kana ndaan na quri 2 qbsuran paru Amori gaga quri nklaan hido yayung Yarden ka Sixon qbsuran paru Xesbon ma, Og qbsuran paru Basan meniq Astarot. 11Drudan miyan ma kana seediq hiya we, rmnengo yami: ‘Desi uqun ddaun namu mekan elu, osa smterung seediq Israel. Kiya ma tgsai ka dheya, tnqliyan namu ka yami, saya braho su psdehu yami ka dyamu.’ 12Pang nadis miyan pneeyah sapah miyan mquri yamu ciida we, ida mntilux na. Qtai! Gisu srpungan mhrehur ka saya da. 13Hrigan miyan sino lipas ka lubuy qraqil nii ciida we nbgurah ba han. Qtai! Gisu msgaliq saya di. Ado theya ba kksaan ka elu, lukus ma ramil miyan uri we wada cmucac kana di.” 14Wada ini siling Utux Tmninun ka seediq Israel ma, wada mangal duma uqun daha. 15Mkmalu dheya ka Yehosua ma, psdehu dheya ma, pkdusun na ka dheya. Dmdudul seediq we psdehu dheya uri.
16Mnoda psdehu dheya ka seediq Israel, bobo mk3 ali de, hani daha bhangan mesa pneeyah ssiyo ma mneniq siyo ka dheya. 17Mtutuy ka seediq Israel, mk3 ali de dehuk alang daha. Lualang daha we, kiya ka Gibon, Kepirah, Beerot ma Qiryat Yearim. 18Ado tena wada mssdehu Utux Tmninun, Utux Baro nuIsrael ka dmpdudul daha de, ini daha sai smipaq ka dheya. Kana seediq we mseang dmpdudul ka dheya. 19Rmengo kana seediq ka dmpdudul: “Tena ta wada smdehu Utux Tmninun, Utux Baro nuIsrael da. Saya we uxe ta mptelung dheya. 20Kiya de keso ta moda ka ita da. Pkdusi ta ka dheya, kiya ka uxe meeyah ita ka knsengan pneeyah sndhegan ta.” 21Rmengo kana seediq ka dmpdudul: “Pkdusi ka dheya.” Kiya de mbahang rnengo dmpdudul ka kana seediq, ngalun daha dseediq mceyax qhuni ma mpheal qsiya ka dheya.
22Mlawa dheya ka Yehosua ma rmengo dheya: “Ma namu mberiq rmengo yami: ‘Pneyah miyan theya ka yami’ ho? Bale ba we mneniq namu ssiyo nami. 23Saya de maangal namu snyusan! Uxe mpsetuq ngalun mptnqliyan ka seediq ckceka namu. Dyamu we mpcaux namu qhuni ma, mpheal namu qsiya ckceka sapah mrtaso Utux Baro ka yamu.” 24Cmiyuk Yehosua ka dheya: “Ado bale ba rmnengo tnqliyan su ka dyamu, Utux Tmninun, Utux Baro su we rmnengo Moseh tnqliyan na. Sbege na dheya ka kana dxeral nii ma, phqilun na kana ka dseediq bobo dxeral nii meniq berah daha. Ririh so dyamu, miicu nami riyung mphuqil de, kiya ka mnoda nami so nii. 25Saya, qtai! Gisu miyan baga su ka dyami. Mphuwa namu mesa menan we seung nanak kenu ka malu ma kenu ka naqah de dai!” 26Wada so nii noda na quri dheya ka Yehosua. Wada na pkdusun peeyah baga seediq Israel ma, dseediq Israel we ini daha phqili ka dheya. 27Ali ciida, Yehosua we smkagul dheya mosa nniqan gnao Utux Tmninun. Dheya ka pceexun qhuni ma, pbbulan qsiya quri seediq ma spuhan Utux Tmninun betaq saya.
Currently Selected:
Yehosua 9: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
