Yehosua 6
6
Wada Ngalan ka Alang Yerixo
1Ado seediq Israel, rhengun alang Yerixo we psgdehu ba meluk ma, uka seediq dehuk mremux ma mlatac. 2Rmengo Yehosua ka Utux Tmninun: “Qtai, wada mu sbege baga namu ka alang Yerixo ma qbsuran paru Yerixo ma, kana supi mnpahung daha. 3Yamu we dai mtqiri alang nii, kana supi oda mtqiri texal. Keso kiya mooda 6 ali uri. 4Meniq berah kulu pnsdhegan ka 7 msapuh mangal iyuk urung miric. Betaq 7 ali de, asi namu ka mtqiri mn7, kiya ma msapuh we asi ka miyuk iyuk urung. 5Mbahang namu hrenang urung pmbaro phrenang iyuk urung de, asi pgbaro mdiras paru ka kana seediq. Kiya de mphurah ka qnalang alang ma, asi osa mremux berah ka kana namu.” 6Mlawa dmsapuh ka Yehosua laqi Nun. Rmengo dheya: “Phlani ka kulu pnsdhegan eyah hini. Asi ka niqan 7 msapuh mangal 7 iyuk urung miric meniq berah kulu pnsdhegan Utux Tmninun.” 7Rmengo seediq ka heya: “Pquri berah osa mtqiri alang kiya. Adis ka qyqeya mccebu oda berah kulu pnsdhegan Utux Tmninun.”
8Muyu kari Yehosua rnengo na quri seediq, 7 msapuh we madis 7 iyuk urung miric moda berah Utux Tmninun mosa. Miyuk iyuk urung ka dheya ma, smnegul bukuy na ka kulu pnsdhegan Utux Tmninun. 9Dseediq gaga dmoi qyqeya mccebu we mkkesa berah dmsapuh gaga miyuk urung. Smnegul bukuy ka kulu pnsdhegan. Pltudi miyuk ka iyuk urung. 10Rmengo seediq ka Yehosua: “Iya plawa ka yamu, iya pqbhangi hrenang namu ka dheya. Ani 1 kari iya bale pyahi peeyah quwaq namu. Asi ka betaq rmengo ku ‘Kdiras’ ali ciida, kiya ka mplawa namu.” 11So kiya de, Yehosua we pdaun na ptqiri alang kiya ka kulu pnsdhegan Utux Tmninun kiya. Mnhedu texal tqqiri alang. Bobo na de, mbrinah kobu daha ka dseediq ma, msange kobu daha.
12Mtutuy mgrebu ba ka Yehosua, kiya ma mheal kulu pnsdhegan Utux Tmninun dungal ka dmsapuh. 13Mangal 7 iyuk urung miric ka 7 msapuh ma, mkkesa berah kulu pnsdhegan Utux Tmninun ma miyuk iyuk urung. Mkkesa berah daha ka maadis qyqeya mccebu. Smnegul bukuy kulu pnsdhegan ka seediq. Ida ini setuq miyuk ka iyuk urung. 14Tg2 ali de, moda mtqiri texal alang dungal ka dheya. Kiya de mbrinah kobu daha ma, mk6 ali so nii ka noda daha.
15Tg7 ali mgrebu bale ciida, ida so ndaan daha moda mtqiri mn7 alang ka dheya. Wano bale ali nii moda mtqiri mn7 ka dheya. 16Dehuk ka ntqiri tg7 ma, miyuk iyuk urung ka dmsapuh ciida. Rmengo seediq ka Yehosua: “Plawa da! Ado Utux Tmninun we, wada na sbege yamu ka alang nii da! 17Alang nii ma kana nniqan truma alang nii we, asi ka sbege namu Utux Tmninun sgliqun namu kana. Wano ba Raxab mqedil kbrexun ma kana ani maanu tnsapah na nanak ka maha muudus. Ado heya we lmneing dmpskuuruy ta. 18Kiya de, asi namu ka qmlahang bale ka yamu, iya bale ngali ka qyqeya ssliqun. So uxe namu maangal snyusan ka mnangal qyqeya ssliqun nii. Kiya de kana seediq Israel we maangal pnqraqil sniyus qyqeya snsliqan dhenu. 19Wano king, ging, xiluy limuk ma, xiluy we prtaso psanak bbege Utux Tmninun psaun namu repun Utux Tmninun kiya.” 20Kiya de mddiras mlawa ka seediq ma miyuk iyuk urung ka dmsapuh. Mbahang hrenang urung ka seediq de, pmbaro mddiras mlawa ka dheya. Kiya de asi ktakur ka qnalang alang. Mosa mremux alang ka seediq, txtaxa daha we asi pquri berah, betaq wada daha ngalun ka alang nii. 21Wada daha sdoi hlmadac phuqil kana ka mneniq ckceka alang hiya, ani rseno ma mqedil, ani rudan ma riso, dapa, miric ma, dapa roba.
22Rmengo 2 seediq mpskuuruy dxeral nii ka Yehosua: “Yamu we osa sapah mqedil kbrexun kiya, pdai so sndhegan namu heya, adis peeyah hiya ka mqedil kiya ma kana tnsapah na.” 23Mosa mremux hiya ka 2 seediq mnosa pskuuruy. Desun daha nganguc ka Raxab, tama ma bubu na, mtswai ma, kana lutuc na. Desun daha nganguc kana ka tnlutuc na ma, psaun daha peeniq bukuy kobu Israel hiya. 24Sqmaun daha puniq ka alang kiya ma, kana mneniq hiya. Wano ba king, ging, xiluy limuk ma, xiluy ka psaun daha ckceka repun Utux Tmninun. 25Quri so Raxab mqedil kbrexun ma tnsapah na ma, kana nheya we, pkdusun Yehosua ka kana daha. Kiya de gaga nak meniq ckceka seediq Israel betaq saya ka dheya. Ado lmneing snkgulan Yehosua mpskuuruy alang Yerixo ka heya.
26Ciida, pdaun na psdehu kana ka seediq ka Yehosua: “Kana mnbarah pheyu alang Yerixo nii we, maha syusun berah Utux Tmninun.
Pheyu eruc ciida we, mphuqil ka qbsuran laqi na.
Mpheyu rhengun alang ciida we, mphuqil ka laqi na tgbiciq bale.”
27Msuupu Yehosua ka Utux Tmninun ma, ngayan Yehosua we tggarang kana bobo dxeral.
Currently Selected:
Yehosua 6: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
