Yehosua 10
10
Ini Baka ka Seediq Amori
1Adonisedeq qbsuran paru Yerusalem we, mnbahang wada glekan ma sliqan bale Yehosua ka alang Ay. Pnhuqil daha alang Ay ma dqbsuran paru Ay we, mntena ba pnhuqil daha alang Yerixo ma qbsuran paru Yerixo. Dungal we mnbahang wada moda psdehu dseediq Gibon ma meniq ckceka daha ka seediq Israel. 2Kiya de miicu riyung ka seediq Yerusalem. Ado paru alang ka Gibon. Mntena so gaga niqan qbsuran paru riyung, mgkala alang Ay ka knparu ma, dmbbeyax daha we hbaro uri. 3Adonisedeq qbsuran paru Yerusalem we smkagul seediq mosa qmita Hoham qbsuran paru Xebron, Piram qbsuran paru Yarmut, Yapia qbsuran paru Lakis ma, Debir qbsuran paru Eglon. Rngagan na, 4“Braho namu eyah dmayo kenan. Klaan ta mccebu Gibon. Ado wada psdehu daha Yehosua ma dseediq Israel ka dheya da.” 5Kiya de msuupu mosa daya ka 5 dqbsuran paru seediq Amori. Kiya ka qbsuran paru Yerusalem, Xebron, Yarmut, Lakis ma Eglon. Dmudul kana supi daha, pkobu mquri sipo Gibon, kmccebu Gibon.
6Smkagul seediq mosa Yehosua kobu Gilgal hiya ka seediq Gibon. Rmengo: “Iya ali tmkemu baga ma, ini qita tnqliyan su. Braho su yahi miyan dmoi baga, dyagi miyan. Ado gisu msuupu mccebu yami ka dqbsuran paru Amori mneeniq dgiyaq.” 7Kiya de Yehosua ma kana dsupi mntheyaq heya mccebu ma, kana supi mnpahung ba we, mosa Gilgal hiya. 8Rmengo Yehosua ka Utux Tmninun: “Iya kcugi ka dheya. Ado wada mu sbege baga su ka dheya da. Mpkuuka ani 1 seediq dehuk mheyu berah su ka dheya.” 9Kiya de pksrabi dmudul supi kndalax Gilgal ka Yehosua ma, asi osa kmremux cmebu dheya. 10Prrduun pkiicu Utux Tmninun berah seediq Israel ka dheya. Yehosua we, phuqil dheya meeniq Gibon hiya. Sklaan na smdurak steetu mcherus Bet Xoron ma, phuqil daha betaq Ajeqah ma Maqedah. 11Qduriq peeyah berah seediq Israel ka dheya. Gisu meniq mcherus Bet Xoron ciida, Utux Tmninun we ptuting quyux huda heyi daha peeyah karac baro. Betaq Ajeqah wada phuqil dheya. Kiya ka wada phqilun quyux huda we mgkala wada phqilun hlmadac seediq Israel.
12Ali sbege na seediq Israel ka seediq Amori ciida ka Utux Tmninun, meniq berah seediq Israel mquri Utux Tmninun dmurun ka Yehosua,
“Hido! Ladu meniq Gibon.
Idas! Ladu meniq ayu Ayalon.”
13Kiya de ini klgelu ka hido, ini klgelu ka idas, betaq mhedu cmiyuk pais daha ka seediq.
Nii we uxe gaga spatis patis Yasar hiya di peni? Ini klgelu ckceka karac ka hido ma, ini priyax 1 ali. 14Mbahang riyung hrenang dnurun seediq so nii ka Utux Tmninun we, uka bale so nii ka ani ali tgberah ma ali tghiti. Ado gisu rmirih Israel mccebu ka Utux Tmninun. 15Mbrinah kobu Gilgal daha ka Yehosua ma kana seediq Israel mntheyaq heya.
Qmerac 5 Qbsuran Paru Amori
16Qduriq ka 5 qbsuran paru kiya ma, tgleing beling Maqedah. 17Meyah rmengo Yehosua ka seediq: “Slayan ka 5 qbsuran paru da. Gaga tgleing beling lhengo Maqedah hiya kana.” 18Rmengo ka Yehosua: “Ptduruy ka btunux paru ma gmuki ka rhengun beling lhengo. Kiya de pqlhangi duma supi. 19Iya sange ka yamu, asi namu ka mosa smdurak pais namu. Speeyah bukuy cmebu dheya, iya prmuxi dlualang daha. Ado Utux Tmninun we, wada na sbege baga namu ka dheya.” 20Yehosua ma dseediq Israel we, wada daha ini baka ka dheya ma, betaq daha phqilun kana ka dheya. Uka bale ka seediq wada qnduriq mremux alang pgdehu daha. 21Mbleyaq mbrinah Maqedah kobu daha ma Yehosua hiya ka kana seediq. Uka ani 1 seediq dehuk rmengo seediq Israel.
22Rmengo ka Yehosua: “Rwahi ka beling rhengun ma adis berah mu hini ka 5 qbsuran paru.” 23Muyu kari na ka seediq, desun daha Yehosua hiya ka 5 qbsuran paru. Kiya ka qbsuran paru Yerusalem, Xebron, Yarmut, Lakis ma Eglon. 24Desun daha berah Yehosua ka 5 qbsuran paru de, splawa Yehosua kana ka seediq Israel. Rmengo dqbsuran supi tnheyaq heya ka Yehosua: “Eyah berah mu ka yamu. Qlqahi nduyung dqbsuran paru nii ka papak namu.” Kiya de meyah berah ma, qmleqah nduyung dqbsuran paru nii ka papak daha. 25Rmengo dheya ka Yehosua: “Iya kiicu. Iya knngungu. Kbeyax ma pniqi pahung. Ado Utux Tmninun we, ida maha so nii mcebu pais namu ka heya.” 26Bobo na de, Yehosua we phqilun na ka 5 qbsuran paru ma, spqeya na 5 qhuni betaq keeman ka dheya. 27Priyax hido ciida, Yehosua we smkagul seediq mosa lmhelah bqerus seediq peeyah qhuni. Qdanun daha lhengo nsaan daha mgleing. Gmukan daha paru btunux ka rhengun, ida so kiya betaq saya.
Mccebu Maangal Egu Lualang
28Ali ciida, Yehosua we mnangal Maqedah ma, wada na phqilun ka seediq hiya ma qbsuran paru. Qhdeun na phuqil kana seediq alang hiya ma, uka ka mnsngari na. Wada daha phqilun ka qbsuran paru Maqedah, mntena so ndaan daha qbsuran paru Yerixo. 29Kiya de Yehosua ma kana dseediq Israel Maqedah heya we, peeyah Maqedah mquri Libnah. Mosa mccebu Libnah ka dheya. 30Utux Tmninun we, sbege na baga seediq Israel ka Ribuna ma qbsuran paru Ribuna. Yehosua de, mccebu alang kiya ma, dmoi hlmadac phuqil kana seediq alang hiya. Uka ani 1 ka mtngari muudus. Ndaan daha quri qbsuran paru Ribuna we, mntena so ndaan daha qbsuran paru Yerixo.
31Yehosua ma kana seediq Israel we mntheyaq heya peeyah Libnah mquri Lakis. Pkobu sipo Lakis, kmpceebu alang nii. 32Utux Tmninun we, sbege na baga seediq Israel ka Lakis. Tg2 ali de, Yehosua we ngalun daha ka Lakis ma, dmoi hlmadac phuqil kana seediq alang hiya. Mntena so ndaan daha quri Libnah. 33Ciida, meeyah dmayo Lakis ka Horan qbsuran paru Gejer. Yehosua we, wada na phqilun ka heya ma dseediq na. Uka ani 1 ka mnsngari muudus.
34Yehosua ma dseediq Israel mntheyaq heya we, peeyah Lakis mquri Igurung. Pkobu sipo Eglon, mpceebu alang kiya. 35Ali ciida, Yehosua we ngalun daha ka alang ma dmoi hlmadac phuqil kana seediq alang hiya. Ali ciida, wada daha qhdeun phuqil ka kana seediq alang hiya. Mntena so ndaan daha Lakis.
36Yehosua ma dseediq Israel mntheyaq heya we, peeyah Eglon mquri Xebron, mosa mccebu alang nii. 37Ngalun daha ka Xebron ma, wada daha ini baka ka Xebron, qbsuran paru, kana lualang ma, kana seediq daha. Ini daha rngii ani 1 ka muudus. Mntena so ndaan daha Eglon, wada qhdeun phuqil ka kana seediq.
38Yehosua ma dseediq Israel mntheyaq heya we, mquri Debir, mccebu alang nii. 39Ngalun daha ka Debir, kana lualang na. Wada daha phqilun hlmadac ka kana seediq hiya, uka ani 1 ka msngari muudus na. Ndaan daha qbsuran paru Debir we, mntena ba ndaan daha Xebron ma, Libnah ma qbsuran paru hiya uri.
40So kiya de, Yehosua ge, wada na ini baka kana ka dseediq tndxeral hiya. Kiya ka mneniq ddgiyaq, Negeb, breenux, hrherus ma dqbsuran paru hiya. Uka ani 1 ka knrngiyan muudus. Kana niqan knuudus na we, wada na asi phqili kana. Mntena so rnengo Utux Tmninun, Utux Baro nuIsrael. 41Yehosua we, speeyah na Qades Barnea cmebu Ajah. Dungal we cmebu kana dxeral Gosen betaq Gibon. 42Yehosua we, wada na ini baka kana ka dqbsuran paru nii ma maangal dxeral daha. Ado dmayo Israel mccebu ka Utux Tmninun, Utux Baro nuIsrael. 43Kiya de Yehosua ma dseediq Israel mntheyaq heya we, mbrinah kobu Gilgal hiya ka dheya.
Currently Selected:
Yehosua 10: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
