Yehosua 11
11
Ini Baka ka Supi Dqbsuran Mnsuupu
1Mbahang so nii ka Xacor qbsuran paru Yabin de, smkagul seediq mosa Yobab qbsuran paru Madon, dqbsuran paru Simron ma Aksap, 2dqbsuran paru dgiyaq quri daya, Arabah toma Kineret, breenux hunac, duyung Dor quri pryaxan hido. 3Dungal we seediq Kenaan quri nklaan hido ma pryaxan hido, seediq Amori, Xet, Perijiy, Yebus gaga dgiyaq, seediq Xiwiy gaga meniq deriq dgiyaq Xermon ma dxeral Micpah hiya. 4Dheya ma kana supi daha we, meyah nganguc kana. Knhbaro riyung ka supi daha, mntena so bnaquy ssiyo rcilung. Hbaro riyung ka rulu mccebu ma dapa dmay daha uri. 5Msuupu kana ka dqbsuran paru nii ma, mosa msseli pkobu ssiyo yayung Merom, tmara mccebu daha Israel.
6Rmengo Yehosua ka Utux Tmninun: “Iya kiicu dheya. Pkelu ali saya ka so kusun we, bbege mu seediq Israel ma phqilun kana ka dheya. Isu we mpseqic su urac dapa dmay na ma, mpsqama su rulu mccebu daha ka isu.” 7Kiya de, Yehosua ma dseediq Israel mntheyaq mccebu heya we, meyah ssiyo ayu Merom. Asi osa kmremux dheya. 8Utux Tmninun we, sbege na baga seediq Israel ka dheya. Kiya de phuqil dheya ka seediq Israel. Smdurak mhero dheya betaq alang paru Cidon ma, Misrepot Mayim. Betaq ayu Micpeh quri nklaan hido. Wada phqilun seediq Israel ka dheya, uka ani 1 ka mtngari muudus. 9Yehosua we, muyu rnengo Utux Tmninun moda ka heya. Wada na sqetun ka urac papak dapa dmay ma, psqmaun na puniq ka rulu mccebu daha.
10Ciida, mbrinah ka Yehosua ma, meyah mangal Xacor ma, wada na phqilun hlmadac ka qbsuran paru Xacor. Xacor nii we, kiya ka npusu bale paru ckceka dqbsuran paru nii ka heya. 11Seediq Israel we, dmoi hlmadac phuqil kana seediq alang hiya ma, wada daha phqilun kana. Kana niqan knuudus na we, uka ani 1 ka mntngari na. Dungal ge, Yehosua we, wada na psqmaun ka alang Xacor. 12Yehosua we, dhekun na mangal kana ka lualang dqbsuran paru nii. Qrapun na ka dqbsuran paru nii ma, phqilun na hlmadac ka dheya. Wada na phqilun kana, mntena so rnengo Moseh tnqliyan Utux Tmninun. 13Quri so lualang gaga bobo msubung dgiyaq, wano ba Xacor, wada psqmaun seediq Israel kana. Wano bale psqama alang Xacor ka Yehosua. 14Qyqeya ma kana tnbugan gneeluk daha peeyah lualang kiya ge, dseediq Israel we wada daha ngalun dheya nanak. Quri so kana dseediq we, wada daha phqilun hlmadac kana. Kana niqan knuudus na we, uka ka mtngari na. 15Hmuwa mesa tnugesa Moseh ka Utux Tmninun we, ida so kiya tmgesa Yehosua ka Moseh uri. Yehosua we muyu so kiya mooda. Kana tnugesa Utux Tmninun rnengo na Moseh we, uka ba ani 1 ini na dai ka Yehosua.
Dxeral Nngalan
16Wada na ngalun kana dxeral ka Yehosua. Kiya ka dxeral ddgiyaq, kana dxeral Negeb, kana dxeral Gosen, breenux hunac, Arabah, ddgiyaq Israel ma dxeral breenux, 17peeyah dgiyaq Halak Seir betaq Baal Gad dxeral breenux Lebanon toma dgiyaq Xermon. Wada mekui dqbsuran paru hiya ka heya ma wada na phqilun. 18Bsiyaq hari ali ndaan daha mccebu dqbsuran paru nii ka Yehosua. 19Wano ba seediq Xiwiy gaga meniq Gibon ka msbleyaq mssdehu seediq Israel ma, uka ani 1 di. Nii we pnooda mccebu dseediq Israel kana. 20Ado lnglungan Utux Tmninun we, pskere lhebun daha ma meyah mccebu dseediq Israel. Kiya ka phqilun daha kana ma, betaq wada phqilun ini daha glui. Mntena so tnugesa na Moseh ka Utux Tmninun.
21Ciida, meyah ka Yehosua we wada na paqun ka dseediq mneniq ddgiyaq, Xebron, Debir, Anab, kana ddgiyaq Yehudah ma dseediq Anaq gaga ddgiyaq Israel. Yehosua we wada na phqilun kana ka dheya ma kana lualang daha. 22Ckceka dxeral dseediq Israel we, uka ani 1 dseediq Anaq mnsngari na. Wano ba gaga meniq Ajah, Gat ma, Asdod nanak ka msngari. 23So kiya de, muyu kana kari Utux Tmninun rnengo na Moseh moda mangal kana dxeral hiya ka Yehosua. Kiya de spooda na txtaxa pnswayan rdrudan Israel saasu na dheya ka dxeral. Kiya de mtbale ka qlhangan ma uka ka mccebu da.
Currently Selected:
Yehosua 11: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
