Yoel 2
2
Smdaling ka Utun
1Yupi iyuk urung Sion hiya,
ttuki ttukan dgiyaq mrtaso mu hiya.
Mpkrkerang kana ka dseediq dxeral nii,
ado dehuk ka ali Utux Tmninun,
gisu smdaling da.
2Ali mnkuung ma knkuung ka kiya,
ali mplabu ma pnkmaanun plabu ka kiya.
Mpteme so lmedax mgrebu mubung bungu dgiyaq.
Niqan 1 qpuruh utun, paru ma mbeyax bale,
uka cbeyo ka so nii,
bobo na hiti uxe mpniqun uri.
3Berah daha we niqan puniq moda mekan,
bukuy daha we niqan rana puniq mosa pkuuka.
Mntena so qnbleyaq Eden tgberah ini eyah ka dheya,
bobo ndaan daha de, wada asi so tadus brenux nlaxan,
ini daha ba srhuqi mooda ka ani maanu.
4Mntena so dapa dmay qtaan ka dheya,
mntena so dapa dmay mpcceebu ka tmalang.
5Hrenang smblkagan daha bungu dgiyaq hiya we mntena ba so tnlaman rulu mccebu,
mntena so hrenang lmaung mdengu speriq,
mntena so supi niqan paru beyax gisu psramal mccebu.
6Mlluqah mnnarux meeniq berah na ka kana seediq ma,
mgsama ka dqeras daha.
7Mntena so mnpahung ba supi tmmalang,
mntena so supi mkaro pnharac qnalang alang,
mdungus ba elu nanak ddaun daha,
ini krudu ka ooda daha.
8Ini pkkiyux mqqheruy uri,
mooda nanak elu paru daha,
mooda tklihu qbrangan,
betaq ini ba sange ka dheya.
9Asi sboto mgkala bobo lualang,
staril bobo qnabil,
mgkala bobo dnamux,
mremux peeyah bnlingan, mntena so seediq mgeeguy.
10Meeniq berah daha we,
mplgelu ka karac ma dxeral,
mpkuung ka hido ma idas,
mpkuuka ledax ka pngerah uri.
11Posa hrenang berah supi na ka Utux Tmninun,
hbaro bale ka supi na,
muyu kari pnosa na de mbeyax bale.
Paru ba kcugun ka ali Utux Tmninun,
ima ka mpdehuk smterung ho?
Mlawa Kkpriyux Lnglungan Seediq
12Kiya de, saya we iya ekan, lingis ma, diras mlawa ka yamu,
pskingal ba lhebun namu mquri kenan.
Rnengo Utux Tmninun ka nii.
13Mpsgaliq namu lhebun namu,
uxe mpsgaliq lukus.
Pquri Utux Tmninun, Utux Baro namu,
ado niqah gnhuwe ma gnaalu ka heya,
ini mmhemuc mseang,
msngari ba ka gnaalu na,
kiya uri we tduwa kmpriyux lnglungan uri,
kiya de uxe mpeeyah pnkdira.
14Ima ka mpkeela mosa kmpriyux ka lnglungan na ma,
mpsrangi qbleqan,
kiya ka snapuh pnhgalang ma snapuh sino bbege Utux Tmninun, Utux Baro namu.
15Yupi iyuk urung dgiyaq Sion,
psnaki mrtaso ka ali mooda namu ini ekan,
dai smneru ka mooda namu psseli.
16Psseli mlawa ka dseediq, so maha psbgurah dheya nanak.
Psseli ka rdrudan,
psseli ka lqlaqi gaga nuhan berah bubu.
Platac peeyah sapah ka rseno hani mnsterung,
platac peeyah sapah ka weewa hani mnsterung.
17Dmsapuh mpqeepah Utux Baro,
lingis dmurun cenga spuhan ma sbesuk rhengun, rengo:
“Utux Tmninun! Braho su glaani ka seediq su,
iya psqai ka pusu dnoi su,
iya ngali pphlisun ckceka qqlhangan.
Maasu prngagun kari nii ka kana seediq:
Gaga inu ka Utux Baro daha ho?”
Pbleyaq Dungal ka Utux Baro
18Psbrinah mtutuy dungal ka lnglungan Utux Tmninun,
gmaalu seediq na.
19Cmiyuk rmengo seediq na ka Utux Tmninun:
“Qtai! Mbege ku uqun pnhuma, sino bgurah ma abura bgurah,
curung munan,
mpktengi namu mekan,
uxe maku psqaun dqlhangan ka yamu.
20Mplatac peeyah yamu ka supi pneeyah tgbaro,
lwaqun mu mquri dxeral nlaxan ka dheya:
Mmaha mremux rcilung nklaan hido ka supi tglaale,
mmaha mremux rcilung pryaxan hido ka smnegul na.
Meeyah baro ka skenux, mpskenux betaq karac.
Bale ba mnoda paru oda nii ka Utux Tmninun!”
21“Dxeral! Iya kiicu,
tqqaras mqaras,
ado mnoda paru oda ka Utux Tmninun.
22Cmcamac bbuyu! Iya knngungu,
ado gisu mdakil ka speriq tadus brenux,
mghei ka qhuni,
gisu mghei kana ka nunuh ma lipas.
23Dseediq Sion! Qqaras ka yamu,
ririh Utux Tmninun, Utux Baro namu qqaras.
Ado bnege mndungus ba quyux psqixan na yamu,
mpntena so cbeyo dungal pqyexun na ka mprbagan ma mpmisan.
24Pstngayun uqun ka sbetan,
maha mccuwaq criyu ka sino bgurah ma abura bgurah.
25Hbaro supi snkgulan mu mosa yamu hiya,
kiya ka utun, mduku, Yaa mnpiya knkawas wada ku smkagul qpuruh utun, kbabuy ma, utun msalak,
prihun maku ka wada uqun knkawas ciida.
26Mpstenge namu mekan,
mptndahu namu ngayan Utux Tmninun, Utux Baro namu,
qneepah sklwiun noda yamu ka heya.
Uxe mpqsiqa betaq ani knuwan ka seediq mu.
27Mpkeela namu gisu meeniq ckceka Israel,
mpkeela namu yaku ka Utux Tmninun, Utux Baro namu, uka da.
Uxe mpqsiqa betaq ani knuwan ka seediq mu.
Ali Utux Tmninun
28Bobo na, hrigun mu txtaxa heyi ka Bgihur Utux mu,
kiya ka kana niqan heyi ma dara.
Mprengo kari pgeela ka lqlaqi namu,
mpsepi so tuutux ka rdrudan namu,
mqita so utux ka rsriso namu uri.
29Ali ciida,
hrigun mu Bgihur mu ka tnqliyan mu rseno ma tnqliyan mu mqedil.
30Pqtaun mu karac baro ma bobo dxeral ka qneepah mu pnskraya, niqan dara, puniq ma, eruc bengux. 31Mpnkuung ka ledax hido, mntena so dara kntanah ka idas. Berah eeyah paru ba kcugun ali Utux Tmninun kana ka nii. 32Ali ciida, ani ima ka mlawa ngayan Utux Baro we, ida pkdusun kiya. Ado kari pnooda Utux Tmninun, ida maha niqan seediq qnduriq gaga meeniq dgiyaq Sion ma Yerusalem. Kana pnlawa Utux Tmninun we gaga hiya ka seediq mntngari uri.”
Currently Selected:
Yoel 2: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
