Yoel 3
3
Mpsgao Kana Qlhangan ka Utux Baro
1Qtai! Meeniq ali ciida, dehuk de, kiya ka mpbrinah ka dseediq Yehudah ma Yerusalem qnerac. 2Pssliun mu ka hbaro seediq, desun mu ayu Yehosapat, ma seediq mu meeniq hiya ka dheya. Ririh pusu dnoi mu Israel, mooda ku psgao kana seediq. Ado pnkrehak seediq mu ckceka qqlhangan ka dheya ma, wada maasu dxeral mu ka dheya. 3Ririh seediq mu mooda ku blebil qreti, pryuxun mu mqedil kbrexun ka rseno, ririh sino mbaruy ku weewa.
4Dseediq Cor, Cidon ma, Peliset! Maanu ba ka pnugluban ta ho? Mpciyuk namu kenan ka yamu ho? Nasi namu mciyuk kenan, asi eyah tunux namu nhari ka cniyuk mu. 5Wada namu gmeluk king ma ging mu, wada namu desun sapah tikung namu ka pusu dnoi mu. 6Kiya uri we wada namu sbaruy Hellenis ka seediq Yehudah ma Yerusalem, betaq mlatac peeyah dxeral daha nanak ka dheya. 7Qtai! Mptutui lnglungan mu, pltadun mu peeyah dxeral mnaruy dheya hiya ka dheya. Dungal we meeyah tunux namu ka cniyuk uri. 8Saun mu mbaruy baga seediq Yehudah ka weewa namu, gruun daha maruy seediq Seba theya bale ka lqlaqi namu. Rnengo Utux Tmninun ka nii.
9Grangi rmengo kana qlhangan:
Psrmali mccebu,
pstutui ka mnpahung supi,
peeyah berah kana ka dsupi.
10Smlei hlmadac ka ahuc,
smlei smbrangan ka kagur qburung.
Mprengo ka muuwic: Mnpahung ku supi ka yaku.
11Kana qlhangan ssiyo!
Eyah nhari,
psseli ta kana.
Utux Tmninun!
Braho su peeyah ka mnpahung supi su.
12Tutui kana ka dqlhangan,
eyah msseli ayu Yehosapat.
Ado mptleung ku hiya,
mooda ku psgao dqlhangan hiya.
13Peeyah ka kawil! Gisu mhada ka pnhgalang.
Eyah qmleqah! Ado gisu stenge ka asu qpean sino.
Gisu msngari mcuwaq ka sino,
ado paru bale ka qnquwan noda daha.
14Egu bale seediq ka gaga ayu Psgeegan hiya,
ado smdaling ayu Psgeegan ka ali Utux Tmninun.
15Mnkuung ka hido ma idas,
uxe mpkledax ka ppngerah.
Mpbleyaq Seediq Na ka Utux Baro
16Mdiras peeyah Sion ka Utux Tmninun,
mpbruwa rmengo peeyah Yerusalem,
betaq mpklgelu kana ka karac ma dxeral.
Kiya de Utux Tmninun we mptkwaxan dseediq na ka heya,
mpqlahang seediq Israel ka heya.
17Kiya ka mpkeela namu, yaku ka Utux Tmninun, Utux Baro namu,
meeniq ku Sion, dgiyaq mrtaso mu.
Mmaha mrtaso ka Yerusalem.
Uxe mnpusal mooda hiya ka seediq icil.
18Meeniq ali kiya, mccuwaq kana ddgiyaq paru ka sino mssibus,
hrean nunuh ka dgiyaq biciq,
meeyah qsiya kana ka yayung Yehudah.
Mpheru peeyah sapah thmkuwan Utux Tmninun pusu qsiya,
msheri ayu Sitim.
19Mpwalang qnada ka Micrayim,
mptadus brenux ka Edom,
ado kmnhemuc mooda quri Yehudah ka dheya,
dungal we mmhemuc psdara seediq ka dheya.
20Meeniq betaq ani knuwan ka Yehudah,
meeniq betaq mlutuc qqlhangan ka Yerusalem.
21Mpkangal ku qnquwan noda mnhemuc psdara seediq,
kiya ka ini pkngali tgberah,
meeniq Sion ka Utux Tmninun.
Currently Selected:
Yoel 3: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
