Dmpsgao 16
16
Simson ma Delilah
1Mosa betaq Ajah ka Simson. Qmita 1 mqedil kbrexun ma msuupu mtaqi heya. 2Meyah rmengo seediq Ajah ka duma seediq: “Gisu ita hini ka Simson da!” Kiya de asi eyah tmlibu ka dheya ma, pksrabi qmburang rhengun alang tmara heya. Pksrabi mthuwe mpprengo ka dheya: “Trao ta betaq lmedax, kiya de phqilo ta.” 3Mtaqi betaq ceka rabi ka Simson. Mtutuy ceka rabi ma dmoi neluk alang ma 2 lnihu rhengun ma, hrahi na ma spapa na ahing na betaq bobo dgiyaq sipo Xebron.
4Bobo na nii, Simson we smkuxul 1 mqedil gaga meniq ayu Soreq, ngayan na we Delilah. 5Mosa mqedil kiya ka dqbsuran mdudul Peliset. Rmengo heya: “Braho su, tlami tmraki smiling ka Simson, hmuwa ba so nii niqan paru beyax na ka heya. Kiya uri we huwa ta kesun mgkala heya ma, kiya ka tduwa ta bkeun. Kiya de tgtaxa miyan we mbege miyan pn10'00 ging sunan.” 6Rmengo Simson ka Delilah: “Braho su rngagi ku hiya. Ma su niqan so nii paru beyax? Huwa kesun mekuy ka isu ho?” 7Rmengo heya ka Simson: “Nasi sa ku bkeun 7 bgurah ba ini kdengu snuyuk we maha ku so seediq mpuuka beyax.” 8Kiya de dqbsuran mdudul Peliset we madis bgurah ba ini kdengu 7 snuyuk ma sbege daha heya. Kiya de heya we dmoi snuyuk nii mekui Simson. 9Ciida, gisu tmara sapah toma hiya ka dseediq gaga qmburang. Rmengo Simson ka heya: “Simson, nii meyah qmerac sunan ka seediq Peliset da!” Kiya de Simson we pstequn na ka snuyuk, mntena so ware nuqah gisu psqmaun puniq. So kiya de, ini daha klai pneeyah inu ka beyax na.
10Rmengo Simson ka Delilah: “Qtai! Tmraki su ma mberiq su kenan. Saya, braho su rngagi ku hiya. Huwa su mu kesun mekuy ka isu.” 11Rmengo heya ka Simson: “Nasi ku daha bkeun snuyuk bgurah mekui kenan, maha ku so seediq mpuuka beyax.” 12Kiya de Delilah we maangal bgurah ba snuyuk mekui heya. Rmengo heya: “Simson, nii meyah qmerac sunan ka seediq Peliset da!” Ciida, gisu tmara sapah toma hiya ka dseediq qmburang. Simson we wada na stequn ka snuyuk baga na, mntena so psetuq 1 ka snuyuk.
13Rmengo Simson ka Delilah: “Betaq saya, ida su nii tmraki ma mberiq su kenan. Braho su rngagi ku hiya. Huwa kesun mekuy ka isu.” Rmengo heya ka Simson: “Nasi su saangal ware spaawe su tminun mekuy ka 7 kndkelan snuunux mu de, tduwa da.” 14Kiya de Delilah we sdoi na xiluy spteetu na ka 7 kndekul snuunux na. Rmengo heya: “Simson, nii meyah qmerac sunan ka seediq Peliset da!” Mtutuy peeyah tnqiyan ka Simson ma wada na bbilun kana ka xiluy ma ware tinun.
15Rmengo Simson ka Delilah: “Ini su pntena lhebun mu ka isu we, huwa kesun rmengo ‘Gmaalu ku ba sunan’ ho? Mn3 su mberiq kenan ma ini saku tgsaani hmuwa ma su niqan so nii paru beyax.” 16Ali knteetu rmengo ma smiling ka Delilah. Kiya de smhngeras riyung ka lhebun na. 17Hiti ba de asi na tgsai Delilah ka lneing kana lhebun na. Rmengo heya ka Simson: “Uka ba ka seediq dmnoi tapan matak snuunux mu. Ado peeyah ku mntuting ma seediq Najir ka yaku. Nasi matak snuunux mu ka seediq de, asi latac peeyah heyi mu ka beyax. Kiya de maha su so seediq mpkuuka ku beyax.”
18Delilah ge, mkela gisu na srengo heya kana ka lneing lhebun na de, smkagul seediq mosa mlawa dqbsuran mdudul seediq Peliset ma rmengo: “Braho maku bale. Eyah texal dungal. Ado wada na srengo kana ka lneing lhebun da.” Kiya de madis ging ka baga dseediq dqbsuran mdudul ma mosa hiya. 19Delilah we qbriqun na ptaqi bobo bteriq na ka Simson. Kiya de mlawa seediq meyah matak 7 kndkelan snuunux Simson. Kiya de wada daha ini baka ka Simson. Beyax na we wada mlatac peeyah heya da. 20Rmengo ka Delilah: “Simson, nii meyah qmerac sunan ka seediq Peliset da!” Mtutuy ka Simson ma rmengo: “Pntnae mu so ndaan dungal, plhlaho mu ka heyi mu.” Kiya we ini na klai wada smtheya heya ka Utux Tmninun. 21Seediq Peliset we qrapun daha ka heya ma, gqriyan daha mangal ka 2 bbali doriq na. Desun daha betaq Ajah ma, pknemu daha ptnemu ruwan kulu hmekan hiya. 22Kiya de, bobo wada slapan ka snuunux Simson we mdakil dungal.
Hnqilan Simson
23Msseli ka dqbsuran mdudul Peliset we, mbbege paru ba snapuh Dagon utux daha. Kiya ma moda mqaras. Rmengo: “Utux ta we wada na sbege baga ta ka Simson pais ta!” 24Qmita Simson ka seediq de, mqaras utux daha ka dheya ma rmengo: “Utux ta we wada na sbege baga ta ka seediq smneeliq dxeral ta ma, pais pnhuqil hbaro ba ita.” 25Mqaras lhebun daha ciida de, rmengo: “Plaani hini ka Simson. Phlisi ta hini.” Kiya de desun daha peeyah sapah kung ka Simson ma phlisun daha meniq berah daha. Phyegun daha cenga 2 pusu eruc. 26Rmengo tnqliyan riso gaga mawak heya ka Simson: “Ptlengi ku eruc gisu plekuh sapah thmkuwan nii. Klaun mu so sdahar.” 27Sapah thmkuwan ciida we stngayan rseno ma mqedil. Kana dqbsuran mdudul seediq Peliset we gaga meeniq hiya kana uri. Wada ba 30'00 heyi seediq qmita ma mnhulis Simson mqaras bobo dnamux hiya.
28Dmurun Utux Tmninun ka Simson: “Utux Tmninun Bukung! Ani su ba rabang. Qtai ku ba bale! Utux Baro! Wano ba texal nii, biqi ku beyax, tai so cciyuk mu seediq Peliset wada qmrequr maangal 2 doriq mu.” 29Simson we dmoi 2 eruc gaga plekuh ckceka sapah thmkuwan ka baga na. Iril baga na we dmoi 1 ma, narac baga na we dmoi 1. 30Kiya de rmengo: “Pspui ku ptheyaq seediq Peliset mhuqil!” Nii beyax na cmikul ma, betaq mtakur ka sapah thmkuwan. Wada mirik dqbsuran mdudul ma kana dseediq mneniq ckceka hiya. So kiya de, mgkala muudus pnhuqil na mhuqil ciida ka Simson. 31Mtswai na ma kana tnsapah tama na we hmeruc mosa mangal bqerus na. Spheal daha mquri tgdaya ma, saan daha smeku cenga Carah ma Estaol, habung Manoax tama na. Simson we ma mpsgao Israel 20 knkawas.
Currently Selected:
Dmpsgao 16: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
