Dmpsgao 17
17
Tikung Mikayhu
1Meniq dgiyaq Eprayim hiya ka Mikayhu. 2Rmengo bubu na: “Wada su daha ngalan ka 11'00 demux ging, psdehu cmiyus noda nii ma, tgsai ku hiya uri. Qtai! Gaga hini ka ging nii ma, yaku ka mnangal na.” Rmengo ka bubu na: “Tai so sblequn Utux Tmninun ka laqi mu!” 3Spbrinah Mikayhu prrihan na mege bubu na ka 11'00 demux ging nii. Rmengo ka bubu na: “Gisu mu prtaso psaanak ka ging nii. Kmpooda baga mu bege mu Utux Tmninun. Mpsalu ku 1 tikung gnequr ma, 1 tikung xiluy snmalu pnsqama. Bege mu isu saya ka ging nii.” 4Mikayhu we spbrinah na mege bubu na ka ging ma, bubu na we sbege na mpsmalu ging ka 2'00 demux ging ssmalu na tikung gnequr ma tikung xiluy pnsqama. Kiya ka psaun daha truma sapah Mikayhu. 5Seediq Mikah nii we niqan sapah tikung na ma, smalu ipudi ma tikung sapah na uri. Dungal we pheyu laqi na ka msapuh. 6Ciida, uka qbsuran paru ka Israel. Txtaxa daha we spooda daha lnglungan malu ma naqah daha moda ka dheya.
7Betlexem Yehudah we niqan 1 riso, heya we pneeyah pnswayan rudan Yehudah. Seediq Lewiy ka heya ma, tnooda meniq hiya. 8Mlatac peeyah Betlexem Yehudah ka seediq nii ma, mosa migin nniqun na. Meyah betaq sapah Mikah dgiyaq Eprayim ka heya ma, mkmosa berah nana. 9Rmengo heya ka Mikah: “Pneyah su inu ho?” Cmiyuk ka heya: “Pneeyah ku Betlexem Yehudah. Seediq ku Lewiy ma, gisu ku migin nniqun mu.” 10Rmengo ka Mikah: “Asi eniq yaku hini da! Ngalun misu tama ma msapuh. Kiya uri we knkingal knkawas we mbege ku 10 demux ging, lukus ma, uuqun su.” Kiya de mosa hiya ka seediq Lewiy nii. 11Smruwa msuupu meniq seediq nii ka seediq Lewiy. Ngalan na laqi na nanak mita ka riso nii. 12Qqepah riso seediq Lewiy msapuh nii we bnege Mikah. Kiya de meniq sapah Mikah ka heya. 13Rmengo ka Mikah: “Klaun mu saya, maha smbleyaq kenan ka Utux Tmninun, ado niqan seediq Lewiy gisu mu ngalun msapuh.”
Currently Selected:
Dmpsgao 17: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
