Dmpsgao 15
15
Ini Baka Simson ka Seediq Peliset
1Bobo na ya wada piya ali, pkelu ktean mugi ciida, Simson we madis 1 wawa miric mosa qmita mqedil na. Rmengo: “Mosa ku toma tqiyan mqedil mu hiya.” Kiya de ini sruwa psteme hiya ka baki na. 2Rmengo ka baki na: “Lnglungan mu we ida su yaa riqu ba ka heya. Kiya ka wada su sbege dadal su. Uxe mgkala heya qnsdiqan ka mtswai na peni? Tduwan su ngalun ma rmirih heya!” 3Rmengo dheya ka Simson: “Texal nii, nasi ku phuqil seediq Peliset we, uxe qnnaqah mu ka nii da.” 4Kiya de mosa qmerac 3'00 huling bbuyu ka Simson. Prrulun na psterung mekuy ka 2 ngungu daha. Kiya ma gqiyan na tqilung ka ckceka ngungu. 5Psrdingan na psqama ka tqilung ma, psaun na qnpahan pnhgalang seediq Peliset ka huling bbuyu. Kiya de wada sqama kana ka gnutu daha drami, pnhgalang mnheyu, qnpahan lipas ma, curung. 6Rmengo ka seediq Peliset: “Ima ka noda nii?” Rmengo ka duma seediq: “Noda Simson ama seediq Timnah ka nii. Ado wada na sbege dadal na ka mqedil na.” Kiya de mosa tgbaro seediq Peliset hiya ka dheya ma, psqmai puniq ka mqedil ma tama na. 7Rmengo dheya ka Simson: “Wada so nii ka noda namu de, betaq ku mpciyuk yamu kiya ka mpsange ku.” 8Simson we knrwani na phuqil ka dheya. Spuun na smipaq kana ka papak ma hwinuk daha. Bobo na nii, hmeruc ka heya ma, mosa meniq lhengo btunux Eytam.
9Mosa tgdaya ka seediq Peliset ma pkobu Yehudah meyah mccebu Lixiy. 10Rmengo ka seediq Yehudah: “Ma namu meyah cmebu menan ho?” Cmiyuk ka dheya: “Meyah miyan qmerac Simson. Mpuyu miyan so noda na mpciyuk heya uri.” 11Kiya de, mosa hmeruc lhengo Eytam hiya ka 30'00 heyi seediq Yehudah. Rmengo heya: “Gisu qmlahang ita ka seediq Peliset we, ini su klai peni? Maanu ka noda su quri menan ho?” Cmiyuk ka Simson: “Maanu ka noda daha kenan we, maha so kiya cniyuk mu dheya uri.” 12Rmengo heya ka seediq Yehudah: “Meyah miyan mekuy sunan ka yami ma, bbege miyan baga seediq Peliset ka sunan.” Rmengo ka Simson: “Asi namu ka psdehu kenan. Iya phuqil kenan ka yamu nanak.” 13Rmengo ka dheya: “Uxe miyan phuqil sunan. Wano ba mekui sunan ma, bege miyan baga seediq Peliset.” Kiya de saangal daha 2 bgurah ba snuyuk, bkean daha ka Simson ma pltadun daha peeyah Eytam mosa tgbaro.
14Dehuk Lixiy ka Simson de, mquri heya mdiras mlawa ka seediq Peliset. Kiya de dseediq Peliset we tmalang meyah smterung heya ma pmbaro mddiras heya. Psteme riyung Simson ka Bgihur Utux Tmninun. Snuyuk bnekuy baga na we, so mntena ware nuqah gisu sqama. Asi tuting peeyah baga na ka snuyuk mnekui. 15Smdiyal 1 ini kdengu buuc bkeluy dapa roba. Ngalun na ma, sdoi na kiya wada phuqil 10'00 heyi seediq. 16Rmengo ka Simson:
“Sdoi mu buuc bkeluy dapa roba,
1 gnutu ma 1 gnutu dungal.
Sdoi mu buuc bkeluy dapa roba,
pnhuqil ku 10'00 heyi seediq.”
17Mnhedu rmengo kari nii de, sqada na peeyah baga na ka buuc bkeluy. Kiya de Ramat Lixiy kesun tmngayan ka dxeral kiya.
18Mhqeni riyung ka Simson. Kiya de meyah dmurun Utux Tmninun: “Spooda su baga tnqliyan su mnoda so nii paru ba dnoi su baga. Saya, gisu ku mhqeni riyung ma, bbege saku baga seediq uxe moda psalak da peni?” 19Utux Baro we pckaun na ka dxeral Lixiy de, asi msqbqbuq criyu ka qsiya. Bobo mnimah ka heya de mbeyax dungal. Kiya de In Eyn Haqore kesun tmngayan ka bulan qsiya kiya. Ida gaga meeniq Lixiy betaq saya. 20Qlhangan seediq Peliset ciida, Simson we 20 knkawas ma mpsgao Israel ka heya.
Currently Selected:
Dmpsgao 15: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
