Hosea 9
9
Pgkela Ppkdira Israel
1Israel! Iya qqaras,
mntena so mqaras kana seediq.
Ado mmhemuc msuupu ma, malix Utux Baro su ka isu,
smkuxul su pila nangal su pneeyah mmhemuc msuupu pssliyan hiya.
2Ini knttuku peekan dheya ka qnbrangan ma sino pnqepi,
Ida maha uka ka sino bgurah uri.
3Uxe meeniq dxeral Utux Tmninun ka dheya.
Kiya we mbrinah mosa Micrayim ka Eprayim,
mekan uqun mrutiq Asur hiya ka dheya.
4Uxe mbege snapuh sino Utux Tmninun ka dheya,
bnege daha we uxe qqrasun mangal uri.
Snapuh bnege daha we, mntena so uqun mnbasi,
kana mnekan we maha smrutiq dheya nanak.
Ado uqun daha we nbuyas daha nanak,
uxe mosa mremux sapah thmkuwan Utux Tmninun hiya kiya.
5Dehuk ali pssliyan, kiya ka smseman Utux Tmninun ciida,
maanu ka daun namu ho?
6Qtai! Mpqduriq peeyah mqraqil ka dheya.
Pssliun seediq Micrayim ka dheya,
reesun seediq Mop ka dheya.
Mptqiri qyqeya mkere brigun daha ka pako,
mosa pretun kbuyun pako ka kobu daha.
7Dehuk ka ali ppshugan da,
ali ccyukan we dehuk da.
Mpkeela ka Israel,
mngataq ka mpgeela kari,
tmdahu bale ka dseediq mnangal Bgihur,
ririh egu ba ka qneepah su naqah, kiya ka smeku paru ba qnnaqah qnrquwan.
8Rmirih Utux Baro mu qmlahang ka Eprayim.
So mpgeela kari we, ida niqan tlungan mqerac qbheni ka ndaan na,
ani meeniq sapah Utux Baro we, ida daha trqilun uri.
9Mpqnaqah bale ka dheya,
mntena so ali Gibeah hiya.
Utux Tmninun we mplmngelung qnquwan noda daha,
moda pkdira qnquwan noda daha ka heya.
Qnhdean Qnquwan Noda Israel
10Gisu mu klaun ka Israel,
mntena so lipas tadus brenux.
Qmnita ku rdrudan namu,
mntena so smdiyal heyi nunuh hani mghei.
Kiya de dehuk Baal Peor ka dheya,
meyah mege oda so snsiqa,
wada ma pqnqihun bale,
mntena ba so kuxul daha kana.
11Eprayim we, mntena qbheni wada skiya ka knledax daha,
uxe mptnlaqi, uxe pchedil ma, mpkuuka laqi.
12Ani wada na dngaun paru ka lqlaqi,
mphuqil ka laqi na ma, uxe mu rngiun ani 1.
Qmada ku dheya,
kiya ka niqan so smtali ka dheya da.
13Qntaan mu Eprayim we, mntena so Cor gaga pniqan malu ba dxeral.
Eprayim we desun na mlatac peeyah hiya ka lqlaqi na nanak,
saun na mege dseediq mphuqil.
14Utux Tmninun! Braho su prana mege dheya,
maanu ka prnaun su mege dheya ho?
Mpqluli ka cnhdilan daha laqi,
mpkdengu ka nunuh daha.
Psgao Israel ka Utux Tmninun
15Ririh ndaan daha kana qnnaqah oda meeniq Gilgal hiya,
mpqnriqu ku dheya meeniq hiya.
Ado qmneepah naqah ka dheya,
asi mu ka lwaqun peeyah sapah thmkuwan mu ka dheya,
uxe ku mpgaalu dheya.
Qbsuran mdudul daha we tbrinah kana.
16Maha mangal snbetan ka Eprayim,
mpdengu ka pusu ma, uxe mpgheyi,
ani tnlaqi we,
ida mu phqilun ka laqi sgaalu daha bale uri.
Rmengo Quri Israel ka Mpgeela Kari
17Utux Baro mu we mpaalix dheya,
ado ini qbahang heya ka dheya.
Ida mooda tnooda dqlhangan ka dheya.
Currently Selected:
Hosea 9: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
