Hosea 5
5
1Dmsapuh! Qbhangi ka kari nii!
Seediq Israel! Tlleus ba mbahang!
Tnsapah qbsuran paru! Peeyah birac namu mbahang!
Meeyah yamu ka mpsgao,
ado mntena posa namu tlenga meeniq Micpah,
mntena tlenga rmaguh meeniq namu dgiyaq Tabor hiya.
2Mmhemuc pphuqil seediq ka dseediq naqah nii,
mptiyu ku mseang dheya.
3Quri so yaku we, klaun mu ba ka Eprayim,
uxe tduwa mgleing kenan ka Israel.
Eprayim! Ma su nii moda mmhemuc msuupu,
betaq wada psqaun ka Israel.
Tqlahang Rmengo Seediq Tnhmuku Tikung ka Hosea
4Uxe mbrinah quri Utux Baro ka so nii ndaan daha,
ado gaga ckceka daha ka lhebun mmhemuc msuupu.
Ini kela Utux Tmninun ka dheya.
5Pnsparu Israel ka mpkuuka ledax dqeras Israel.
Mptakur qnquwan noda daha nanak ka Israel ma Eprayim,
mpsuupu mtakur dheya ka Yehudah uri.
6Mdudul dapa ma miric migin Utux Tmninun ka dheya,
kiya we uxe mpsdiyal.
Ado tena wada mlatac peeyah dheya ka heya.
7Ini kdrumuc Utux Tmninun ka dheya,
mmhemuc ptuting laqi pnsbhuran.
Saya, idas bgurah ka moda pkuuka dheya ma dxeral daha.
Mccebu ka Yehudah ma Israel
8Yupi urung Gibeah hiya ka yamu,
Yupi iyuk Ramah hiya,
posa hrenang mccebu Bet Awen hiya.
Binyamin! Qlahang ba bukuy su!
9Dehuk ali pkdraun, maha laxun ka Eprayim.
Meeniq ku ckceka pnswayan rdrudan Israel, mptgesa ku ooda daha beyo.
10Mntena hmeruy ayus dxeral ka qbsuran mdudul Yehudah,
paru seang mu we maha mubung heyi daha.
11Eprayim we smkuxul ba muyu pnosa kari uka dungus,
kiya ka pkdraun ma, qqahan psgao hiya.
12Mntena so kuyi ka ndaan mu Eprayim,
mntena so msburo ka ndaan mu Yehudah.
13Qmita niqan narux na ka Eprayim,
qmita niqan luqah na ka Yehudah,
kiya de mquri Asur ka Eprayim,
smkagul seediq mosa qmita qbsuran paru.
Kiya we uxe mpkmalu yamu ka heya,
uxe pkmalu luqah namu.
14Mptena ku rkelic rudu mquri Eprayim,
mptena ku giyas rkelic rudu cmilaq Yehudah.
Daun mu cmilaq de, mplatac ku mosa,
glekun mu, uka ka mdoi baga dheya.
15Mosa ku, mbrinah pnyahan mu,
mtara ku mkela qnquwan noda daha ma, migin dqeras mu ka dheya.
Moda mqraqil ciida ka dheya we, ida maha migin ba kenan ka dheya.
Currently Selected:
Hosea 5: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
