Hosea 4
4
Tmiyu Qnnaqah Israel ka Utux Tmninun
1Seediq Israel! Qbhangi ka kari Utux Tmninun.
Tmiyu qnnaqah dseediq hini ka Utux Tmninun,
ado uka bale stmaan ka dxeral hini,
uka huwe ma, uka ba ka seediq mkela Utux Baro.
2Wano mmhemuc smdehu, mberiq, pphuqil,
gmeeguy, mmhemuc msuupu, pqraqil,
psdara ma ini sange psdara.
3Kiya de dxeral nii we so sgaalu,
dseediq bobo na hiya, dcamac gaga nrao,
qbheni gaga skiya karac we, maha krinah mpkuuka,
kana qqcurux ckceka rcilung we mpkuuka uri.
Rmengo Qnnaqah Dmsapuh
4Kiya we, iya igin kari ka seediq ma, iya pttiyu baga kana.
Mntena bale ka seediq su ma dseediq tbrinah dmsapuh.
5Mptakur su diyan,
keeman we mpsuupu mtakur isu ka mpgeela kari uri.
Mphuqil ku bubu su ka yaku.
6Ririh uka gnkela mphuqil ka seediq mu.
Qmada su gnkela,
mpqada ku sunan ka yaku uri,
uxe su ngalun ma dmsapuh mu ka isu.
Wada su cmhungi gaya Utux Baro,
mpchungi ku lqlaqi mu ka isu uri.
7Mrana ka dmsapuh we, krinah mrana ka qnnaqah noda namu kenan uri.
Ngalun mu qnsiqa ka knledax daha.
8Wada rmequn mekan snapuh ssruwa qnquwan noda dseediq mu ka dheya,
smkuxul bale niqan qnquwan noda dseediq mu ka dheya.
9Ngngalun dseediq mu bukuy we,
ngngalun dmsapuh uri.
Mpuyu ku ndaan daha pkdira dheya,
mpuyu ku qneepah daha mciyuk dheya.
10Ani mekan ka dheya we, uxe mpktengi.
Mmhemuc msuupu we, uxe mpkrana.
Ado malix Utux Tmninun ka dheya,
11mmhemuc msuupu klaali ka dheya.
Wada gmeluk lhebun seediq ka sino ma sino bgurah.
Mseang Qnnaqah Thmuku Tikung
12Seediq mu we smiling qhuni,
ngalun daha mptduwa tmgesa dheya ka hukuc.
Wada psridil dheya ka lhebun mmhemuc msuupu,
kiya ka mmhemuc msuupu ma qmada Utux Baro daha.
13Bege snapuh bobo dgiyaq, smapuh skenux ddgiyaq,
meeniq toma qhuni raus, rbuqil ma, paru qhuni,
ado niqan malu ba saun tsaso qhuni ka hiya.
Kiya de, mmhemuc msuupu ka weewa namu,
mmhemuc msuupu ka ina namu uri.
14Ani mmhemuc msuupu ka weewa namu,
uxe uri we mmhemuc msuupu ka ina namu we, ini namu pkdira dheya.
Ado seediq we mbrinah mosa msuupu mtaqi mqedil kbrexun,
msuupu mqedil kbrexun mege snapuh.
Mptakur ka seediq uka tunux nii.
15Israel! Ani su mnoda mmhemuc msuupu,
Ida ini oda qnquwan noda ka Yehudah.
Iya pquri Gilgal,
iya osa Bet Awen,
iya tiyu Utux Tmninun muudus ani knuwan ka smdehu namu.
16Seediq Israel we mkkere bale,
mntena bubu dapa knkere.
Saya, mptduwa tmabu dheya ka Utux Tmninun,
mntena gisu tmabu wawa miric dxeral knuglahang ho?
17Smdaling tikung ka Eprayim,
pdai nanak lnglungan daha!
18Mnhedu mimah sino ka dheya,
krinah bale mmhemuc msuupu,
dqbsuran mdudul daha we smkuxul bale oda qnsiqa nii.
19Gisu yupan bgihur gtuun palic toma ka dheya,
mpqsiqa ndaan daha mege snapuh ka dheya.
Currently Selected:
Hosea 4: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
