Hosea 13
13
Qhdean Psgao Israel
1Cuxal, rmengo ka Eprayim we, pkrkerang kana ka seediq,
heya ka meeniq tgparu ba nniqan ckceka Israel.
Kiya de ririh Baal niqan qnquwan noda betaq wada mhuqil.
2Saya, prnaun na qnquwan noda dungal ka qnquwan noda daha,
qmrequr smmalu tikung daha nanak,
spooda daha knkela daha dmoi ging smmalu tikung,
kana nii we smnalu dseediq mpsmalu.
Quri so heya we, niqan ka kari:
Dseediq snapuh we mooda tmunguh wawa dapa kana.
3Maanu so kiya, mptena plabu mgrebu,
mptena dremus ini beyo uka ka dheya,
mptena lepi mugi nriqan wada yupan paru bgihur,
mptena so qrengul mtbengux.
4Peeyah su mnlatac Micrayim,
ida yaku ka Utux Tmninun, Utux Baro su.
Wano ba yaku ka Utux Baro, ini su kela ani ima,
uxe yaku de uka ka Bukung Mdoi Baga.
5Mneeniq ku tadus brenux,
kiya ka mnkela ku isu meeniq dxeral mddengu hiya.
6Qndalan ka dheya de, betaq mntengi.
Mntengi de, psparu ka lhebun daha,
kiya ka cmhungi kenan.
7Maanu so kiya, mpntena ku rkelic rudu mquri dheya,
mpntena ku rkelic qmburang yamu ssiyo elu.
1 8Mpntena ku bubu sume wada ngalan wawa kmremux dheya,
sgliqan mu berah ka dheya.
Mpntena ku bubu rkelic rudu rmequn mekan dheya,
mpntena ku camac bbuyu smgaliq rmere dheya.
9Israel! Gisu su migin pphuqil isu nanak da,
ado yaku ka bale ba mdayo sunan.
10Saya, gaga inu ka qbsuran paru namu?
Sai pdoi baga yamu meeniq lualang namu ka heya!
Rmnengo su “Phyegi miyan qbsuran paru ma dqbsuran mdudul”,
gaga inu ka mpqlahang yamu ho?
11Mseang ku mege qbsuran paru yamu,
dungal we tsseang ku malix qbsuran paru namu uri.
12Gisu lbuun ka qnquwan noda Eprayim,
gisu skuun ka qnquwan noda na.
13Ida meeyah heyi na ka hnlidan mqedil mptnlaqi.
Laqi uka knkela ka heya,
mntena so mptuting ma ida ini eyah ka laqi.
14Mpdoi ku baga dheya mlatac peeyah tuxan mnkuung,
mpdoi ku baga daha mlatac peeyah hhuqil.
Hhuqil! Gaga inu ka ppgedang su?
Tuxan mnkuung! Gaga inu ka pkkrusun su?
Mpkuuka moda berah doriq mu ka gnaalu.
15Ani yaa mrana bale meeniq ckceka mtswai na,
kiya we ida meeyah ka bgihur pneeyah nklaan hido,
kiya ka bgihur Utux Tmninun pneeyah tadus brenux.
Mpkdengu ka pusu hrean qsiya na,
mpkdengu ka kbbulan hghugan qsiya na,
bgihur nii we mooda gmeluk mangal kana pusu dnoi na.
16Mpheal qnquwan noda na ka Samareia,
ado tnbrinah Utux Baro na nanak ka heya.
Mptakur toma hlmadac,
laqi rabu we tgsebuc dxeral phuqil,
mqedil mchedil uri we byakun nbuyas.
Currently Selected:
Hosea 13: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
