Hiburu 9
9
Mrtaso Thmkuwan Bobo ma Dxeral
1Pnsdhegan plaale we niqan gaya tthmuku Utux Baro ma Mrtaso kobu bobo dxeral. 2Ado kobu pnsrmalan we tgtruma we mrtaso thmkuwan. Ckceka na hiya we niqan paga psmean, psaan spuhan ma, pang. 3Tg2 na ga bukuy pala de, niqan 1 pala dungal. Kiya ka kesun Pusu Mrtaso thmkuwan. 4Ckceka na hiya we niqan spuhan psknexan pqpahan king ma kulu pnsdhegan ga qhdeun pqapah king. Ga meniq ckceka kulu pnsdhegan ka rusuq king ngaba ga psaan mana, hukuc Aharon hmneru hruwan ma, daha btunux ga spatis gaya. 5Bobo kulu pnsdhegan we niqan kirubing lmedax mpqlahang tluungan Utux Baro. Quri so kana nii we uka mu kklaan rmengo kana saya.
6Mhedu psrmalan kana so nii de, ini sange mremux kobu tgkingal truma hiya ka msapuh ma qmeepah ooda thmuku. 7Quri tg2 truma we wano paru msapuh texal ba 1 knkawas mosa mremux hiya. Uka ka ini adis dara, ssapuh na heya ma, kana qnquwan noda uxe gnklaan seediq. 8Ptuura so nii ka Bgihur Utux. Ga meniq ka tgkingal toma ciida han we, ida ini truura ka elu mremux ta Pusu Mrtaso Thmkuwan. 9Tgkingal toma nii we gisu mnama ptuura knlangan bobo dxeral saya. Bnege na bbege ma snapuh we uxe mpttuku lhebun seediq ga thmuku na. 10Noda nii we wano quri uqun ma mahun, kiya we knkana gaya ttrima psbgurah. Gaya nii we quri heyi kiya. Beyax na we betaq ba meyah ka bgurah pnugaya ciida.
11Kiya de, gisu dehuk ka Kiristo, ma paru msapuh pttuku knmalu, mnoda kobu paru ma knttuku riyung. Kobu nii we uxe snmalu baga seediq, uxe nbobo dxeral nii uri. 12Ini adis dara miric ma dara dapa kntehuk, wano dara na nanak ka nadis na, mpexal bale mremux Mrtaso Thmkuwan de asi aangal ssruwa qnquwan noda betaq ani knuwan. 13Nasi mtduwa prtaso ma psbgurah heyi seediq ka dara miric ma dara dapa kntehuk, uxe uri we so qbulic bubu dapa srehak ka heyi seediq de, 14naka krinah mtduwa smino lhebun ta ma, pkuuka noda qnhuqil ta ka dara Kiristo pnooda na Bgihur Utux uka bale qnnaqah sbege na Utux Baro. So kiya de mtduwa ta meepah Utux Baro muudus ani knuwan.
15Maanu so kiya de, Kiristo we bgurah pnsdhegan meeniq ckceka Utux Baro ma ita ka Heya. Wada na spririh mali ka qnquwan noda meeniq pnstangan plaale. Kiya de so maha maangal sndhegan dnoi ani knuwan ka dseediq pnlawa. 16Ani ima niqan hniti kari we, asi ka pgklaun na plaale ka seediq wada mhuqil. 17Ado mhuqil ka seediq de, kiya hani niqan beyax ka kari hniti. Nasi ga muudus nana ka seediq we, uka beyax ka kari hniti nii. 18Maanu so kiya de, pnheyu dara ka pnsdhegan plaale nii. 19Ado Moseh we pnooda na gaya srengo na kana seediq ka pndakar kari Utux Baro. Kiya de maangal mtanah ubal miric ma sudu dapa, rbegun na dara wawa dapa ma dara miric, stheyaq na qsiya. Rcuhan na patis ma kana heyi seediq. 20Rmengo: “Dara nii we kiya ka pnskraya pnsdhegan namu Utux Baro.” 21Kiya uri we sricuh na kobu ma kana qyqeya dooyun thmuku ka dara nii. 22Spooda gaya we, so hari spnoda dara psbgurah ka kana ani maanu. Uka dara de, uka ka ssruwa qnquwan noda.
Pkuuka Qnquwan Snapuh ka Mhuqil Kiristo
23Maanu so kiya de, spooda ta tnugruwan baro ka ooda we asi ka muyu gaya nii ka psbgurah. Kana quri karac baro we, asi ka niqan knmalu riyung snapuh psbgurah. 24Ado Kiristo we ini teme Mrtaso Thmkuwan snmalu baga seediq, ado nii we saso bale ba Mrtaso Thmkuwan, Heya we wada karac baro. Saya de ririh ita ga meyah berah Utux Baro. 25Ani ini kmpusal mege Heya nanak, mntena so paru msapuh knkingal knkawas asi ka madis dara dapa ma miric mremux Mrtaso Thmkuwan. 26Nasi so kiya de, peeyah smnalu kana ani maanu ciida de, ida mnoda egu riyung mqraqil ka Heya. Kiya de saya de, truura Heya meeniq ali qnhdean bobo dxeral saya, texal bale sbege na spuhan ka heyi na nanak de, mtduwa smruwa qnquwan noda. 27Spquri ta kndesan seediq we, kana seediq asi ta ka mhuqil. Bobo hnqilan ta we mooda ppsgeegan Utux Baro. 28Mntena so nii uri, Kiristo we wada texal mege heyi snapuh de, wada mheal qnquwan noda hbaro seediq. Bobo mpusal meyah truura duri we, uka pnugluban qnquwan noda kiya. Meyah dmoi baga dseediq ga mdrumuc psmeyah Heya.
Currently Selected:
Hiburu 9: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
