Xabaquq 3
3
Dmurun ka Xabaquq
1Dmurun mpgeela kari Xabaquq ma thiqan na uyas tnooda.
2Utux Tmninun! Mbahang ku ngayan su.
Utux Tmninun! Miicu ku ndaan su.
Meeniq knkawas nii we, braho su pstutuy ka ndaan su qmeepah,
meeniq knkawas nii we, ptuura ka kiya.
Mseang su ciida, lnglungi ba ka gnaalu su.
3Pneeyah Teyman ka Utux Baro,
pneeyah dgiyaq Paran meeyah ka Mrtaso. (Sira)
Knledax na we mubung kana karac,
tndahu we stenge kana bobo dxeral.
4Mntena hido ka knledax na,
mpeeyah ledax ka baga na,
gaga Lmeing hiya ka beyax na.
5Gaga mnarux mpunu ka berah na,
gaga mnarux mttilux ka toma papak na.
6Mheyu ka heya de, pkrkerang ka dxeral,
qmita ka heya de, mlgelu ka dqlhangan.
Asi qcilaq mgeerung ka dgiyaq pneeyah cuuxal,
betaq mtakur ka dgiyaq paru betaq ani knuwan,
ndaan na we mntena cbeyo.
7Qtaan mu gisu naqah ka kobu Kusan,
betaq mlgelu ka pala dxeral Midyan.
8Utux Tmninun! Ma su mquri yayung mseang,
mquri su yayung mseang paru,
mquri su rcilung mseang paru ho?
Paapa su dapa dmay,
paapa su rulu mbeyax ka isu.
9Truura kana ka budi su,
kari pnsdhegan su we budi kiya. (Sira)
Pswae dxeral paru ka yayung su.
10Qmita isu ka ddgiyaq we, uka ka ini pkrkerang.
Betaq rnecux moda hiya ka qsiya paru,
peyah hrenang ka ebun truma,
mrmari ba ka bula rcilung.
11Ririh budi su ka nii lmedax ledax,
halung su ka gisu tqwilaq,
gisu msange nniqan daha ka hido ma idas.
12Mosa smebuc dxeral paru ka seang su,
moda smebuc dqlhangan ka seang paru su ma, mntena nii smebuc mugi.
13Meeyah su dmoi baga seediq su ka isu,
mdoi su baga cnuwaq abura.
Prequn su ka tunux tnsapah dseediq naqah,
ptuura su tgpusu na betaq nduyung. (Sira)
14Dmoi su smbrangan lmihu tunux supi.
Rmehak kenan mntena so paru bgihur ka dheya,
smkuxul tgleing rmequn dseediq mqraqil ka dheya.
15Paapa su dapa dmay qmleqah rcilung,
qmleqah su mrmari ba bula qsiya paru.
16Mbahang ku hrenang nii de, pkrkerang ka heyi mu,
pkrkerang ka quwaq mu,
msburo ka buuc,
betaq pkrkerang ka hnyegan mu uri.
Kiya de, mgmelux ku tmara,
meeyah dseediq meeyah kmremux ka ali pkdira kiya.
17Ani yaa ini ghei egu ka nunuh,
ani ini ghei ka lipas,
uka ngngalun ka curung uri,
ini ghei ka qnpahan,
uka miric ka tibu,
uka dapa ka qnalang.
18Ani so kiya, ririh Utux Tmninun ida ku mpqaras ka yaku,
ririh Utux Baro mpkuudus yaku ida ku mpqaras.
19Beyax mu ka Utux Tmninun Bukung,
pksaun ku na mntena draqul rqenux ka papak mu,
dungal we pksaun ku na bobo dgiyaq baro.
Sbege na mdudul mpuuyas, mdoi tubu mptubu ka uyas nii.
Currently Selected:
Xabaquq 3: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
