Xabaquq 2
2
Cmiyuk Xabaquq ka Utux Tmninun
1Mpheyu ku paga gmraka mu,
mpheyu ku paga alang mqita ku,
mqita ku teta huwa mesa rmengo kenan ka Utux Tmninun,
manu ka rrengo mu heya ka uka mu qnquwan.
2Cmiyuk kenan ka Utux Tmninun, rmengo:
Pslxani ba matis qrtinuh ka pnugkela mu nii,
so daha asi klai smepu.
3Ado pnugkela nii we ida niqan ali na,
gaga rmengo qnhdean we, ida uxe mpsrahuq.
Ani gaga sgcuqi we, asi namu ka tmara.
Ado ida meeyah ma, uxe tggila.
4Qtai! Psparu bale ma, ini sderux lhebun daha ka seediq naqah.
Wano seediq msderux ka mpkuudus peeyah snhiyan na.
Qnhdean Ini ksderux
5Heya we ririh sino mpqberiq,
psparu, uka stmaan.
Rmaguh gelu we, mntena tuxan mkuung,
mntena mnhuqil ini ba knttuku.
Heya we psseli kana qnlhangan,
pssliun na mpquri heya nanak ka kana seediq.
6Seediq nii we so hari nii rmengo uyas, kari rudan gisu mhulis rmengo heya:
Smtali namu bale! Pnrana su dnoi we uxe nisu,
pnooda namu mangal pila kusa mpbetaq knuwan ho?
7Uxe maha asi tutuy ka qmniyuc sunan,
uxe maha asi tutuy ka prrudu sunan,
uxe su daha ngalun qmerac madis ka isu ho?
8Ado gmneluk su egu qnlhangan,
psdara su seediq, mhumuc su moda smmeliq dxeral, lualang ma dseediq ka isu,
kiya ka mpgeluk sunan ka dseediq mntngari uri.
9Smtali namu bale! Dseediq gaga gmutu dnoi pneeyah uxe msderux,
gaga smalu sapah tgbaro ma, gisu tmara mpkuuka qnqihan!
10Lmngelung su smeqic egu klegan seediq ma, niqan qnquwan noda su,
betaq su pqsiqa isu nanak ma, smeeliq su knuudus su nanak.
11Mpdiras mlawa ka ckceka bbtunux qnalang alang,
mpsuupu cmiyuk hrenang ka gmbaruy sapah uri.
12Smtali namu bale! Dseediq dmoi dara pheyu alang,
dmoi qnquwan noda pheyu lualang!
13Qtai! Kana nii we uxe pneeyah Utux Tmninun Mdoi Kana Supi peni?
Sqmaun puniq ka mbqerus nangal kana seediq,
mbqerus pnheyu kana seediq we, maha mpkuuka kana.
14Mpkeela knledax Utux Tmninun ka kana dxeral,
mptena so qsiya gisu stenge rcilung.
15Smtali namu bale! Dseediq piimah sino ma posa hrulas ssiyo ma,
pbsukan seediq, qmqita hnyegan na tgtruma daha!
16Maangal su qnsiqa, uxe su mpkledax.
Mahi ka isu uri, ptuura uxe su ndaan ptgaya psalak!
Pngerah mahan gaga narac baga Utux Tmninun we maha isu hiya,
maha kmpryuxun siqa ka knpruwan su.
17Muubung sunan ka ndaan mqraqil Lebanon,
mpkiicu sunan ka ndaan pnhuqil cmcamac.
Ado psdara su seediq,
dxeral, lualang ma, mmhemuc su smeeliq kana seediq alang.
18Manu rrihan na ka tikung?
Qnequr dseediq msalu,
tikung nduhan, ma mberiq mptgesa
Msalu na we smtama tikung mngangah snmalu na nanak.
19Smtali namu bale! Dseediq rmengo qhuni: “Keyo”,
rmengo btunux mngangah: “Tutuy da”!
Huwa mesa tmgesa seediq ka tikung ho?
Qtai! Gisu lbuwan king ma ging we, uka hengak ka ckceka na.
20Wano ba Utux Tmninun gaga meeniq sapah thmkuwan,
kana dxeral we asi ta ka tgseesu berah na.
Currently Selected:
Xabaquq 2: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
