Yexejqel 3
3
1Rmengo kenan ka heya: “Laqi seediq! Uqi ka nangal su, uqi ka patis qniri nii. Bobo na de mosa su rmengo tnsapah Israel.” 2Kiya de mnngaha ku quwaq ma, speekan na kenan ka patis qniri nii. 3Rmengo kenan ka heya: “Laqi seediq! Asi su ka mekan patis qniri bnege mu sunan, pktengi bale nbuyas su.” Kiya de, wada mu uqun ka nii de, teyal knsibus ka quwaq mu mntena beyuq walu.
4Rmengo kenan ka heya: “Laqi seediq! Osa sapah su Israel, sai rmengo dheya ka kari mu. 5Uxe misu skgulun dseediq rmengo kari msriqu ma, dseediq ini klai kari hiya. Mpquri su sapah Israel. 6Uxe su mpquri dseediq mskari msriqu ma ini klai mbahang hiya. Kari daha we, uxe su klaun. Ani so kiya we, nasi ku mpskagul sunan mosa dheya hiya we, maha mbahang sunan ka dheya. 7Kiya de ini qbahang sunan ka kana sapah Israel. Ado ini sruwa mbahang kenan ka dheya. Kana sapah Israel we, dseediq mkere kduruk ma mkere lhebun daha. 8Qtai! Mpskere ku dqeras su, kiya de mpdehuk su smterung dqeras daha. Pskere ku kduruk su, kiya ka tduwa su smterung knkere kduruk daha. 9Pntnaun misu so dayamundu mgkala tasil knkrayan ka kduruk su. Ani yaa sapah tbrinah ka dheya, isu we, iya kcugi ka dheya. Iya kcugi ka dqeras daha uri.” 10Rmengo kenan dungal ka heya: “Laqi seediq! Kana kari rrengo mu sunan we, posa bale lhebun su ma, peeniq bale birac su. 11Mosa su dseediq qnerac ma, mosa su dseediq su nanak hiya. Ani yaa mbahang ma, ini qbahang we, asi su ka rngagun ka dheya. Tgsai bale, rnengo Utux Tmninun Bukung ka nii.”
12Ciida, ptutui kenan ka Bgihur. Kiya de mnbahang ku paru hrenang gaga mlgelu bukuy mu: “Knledax Utux Tmninun, peeyah nniqan na hiya we, asi ka tndhuun!” 13Niqan ka hrenang mttebuk palic muudus mllutuc ma, niqan dungal ka hrenang ribo gaga siyo muudus. Paru riyung ka hrenang nii. 14Stoyun ku na baro ka Bgihur ma, desun ku na mkkesa. Kiya de mosa ku ma, mnarux ku ba tunux ma, mttilux ba ka bgihur mu. Mbeyax ba dmoi heyi mu ka baga Utux Tmninun. 15Kiya de meyah ku dseediq qnerac gaga Tel Abib meniq ssiyo yayung Kebar hiya. Mosa ku nniqan daha hiya, mskluwi ku tleung mk7 ali meniq ckceka daha hiya ka yaku.
Ngalun Mpqlahang ka Yexejqel
(33:1-9)
16Bobo mk7 ali, meyah kenan ka kari Utux Tmninun. Rmengo, 17“Laqi seediq! Wada misu ngalan mpqlahang sapah Israel ka isu. Kiya de asi su ka mbahang kari pneeyah quwaq mu ma, pririh kenan pqlhangi pqbahang rmengo ka dheya. 18Nasi ku rmengo quri naqah seediq: ‘Mpphuqil ka heya’ mesa ku ciida. Nasi su ini osa mdakar heya ma, ini su sai rmengo uri so maha mlatac qnquwan noda na de, tduwa dmoi baga heya na de, maha mphuqil qnquwan noda na hiya ka seediq nii. Kiya we mpciyuk ku mesa peeyah baga su ka dara niya. 19Nasi su pdkaran ka naqah seediq, ini alix qnquwan noda daha we, maha nanak mhuqil ckceka qnquwan noda daha ka dheya. Kiya we maha su pkuudus knuudus su nanak kiya. 20Kiya we, nasi mlatac knsderux na mquri naqah ka seediq msderux noda de, psaun mu btunux mptakur ka berah daha. Heya we asi ka mphuqil. Ado ini su pdkari ka heya, kiya de mphuqil ckceka qnquwan noda na. Kiya we uxe lnglungun ka knsderux noda na. Kiya de we, mpciyuk ku mesa peeyah baga su ka dara na. 21Nasi su mdakar rmengo dseediq msderux noda, so uxe mooda qnquwan noda ka heya de, uxe mooda qnquwan noda ka heya. Mpkuudus peeyah mnangal pndakar ka heya, kiya de maha su dmoi baga kkuudus su uri.”
Mngangah ka Yexejqel Han
22Tmelung heyi mu ka baga Utux Tmninun meniq hiya. Rmengo kenan ka heya: “Tutuy, osa breenux, rngagun misu hiya.” 23Kiya de mtutuy ku ma, mosa ku breenux. Qtai! Gisu msange hiya ka knledax Utux Tmninun. Mntena so qnita mu meniq ssiyo yayung Kebar hiya. Kiya de asi ku tgtemaq dxeral ka dqeras mu. 24Meyah mremux heyi mu ka Bgihur ma, ptutui kenan. Rmengo kenan ka Utux Tmninun: “Osa mremux sapah su ma, lebi ka rhengun. 25Isu, laqi seediq, qtai! Tgdhegun su daha mekuy snuyuk ka isu ma, uxe su daha psaun ckceka daha hiya. 26Psdalan mu kurang ka hema su, pnungngahun misu ma uxe misu srwaun pdakar rmengo dheya. Ado sapah mptbrinah ka dheya. 27Kiya de rmengo ku sunan ciida we, rwahun mu ka quwaq su, kiya de asi su ka rmengo dheya: ‘So nii kari na ka Utux Tmninun Bukung.’ Mbahang na we, pqbhangi. Ini nak qbahang na we, iya pqbhangi kiya. Ado sapah mptbrinah ka dheya.”
Currently Selected:
Yexejqel 3: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
