Yexejqel 22
22
Qnnaqah Yerusalem
1Meyah kenan ka kari Utux Tmninun, rmengo, 2“Isu, laqi seediq! Mpsgao su, mpsgao su alang psdara seediq nii peni? Pklai kana pqnqihun noda daha. 3Rengo so nii, rmnengo so nii ka Utux Tmninun Bukung, alang gisu psdara seediq! Dehuk ka ali daha. Smnalu tikung psrutiq dheya nanak. 4Ado pnsdara su seediq, kiya ka niqan qnquwan noda su. Ado smnalu su tikung psrutiq sunan nanak. Kiya ka smdaling sunan ka ali su, knkawas su we gisu dehuk uri di. Manu so kiya mpaangal su tnsyaxan ma pnhlisan dqlhangan ka isu. 5Alang qnnaqah ngayan ma mrrudu riyung! Ida mphulis sunan ka dqlhangan gaga dheya ma gaga daling.
6Qtai! Gaga inu ka dqbsuran Israel, pqita riyung beyax daha gaga psdara seediq. 7Yamu hiya we niqan ka smbiciq qmita tama ma bubu. Yamu hiya we niqan tmraqil dseediq tnooda. Yamu hiya uri we niqan pkraki laqi mqrinuc ma mqedil mqrinuc. 8Smbiciq su qmita qyqeya mrtaso, tbrinah su ali sngayan mu. 9Yamu hiya we niqan ka mberiq migin phqilan seediq. Yamu hiya we niqan ka mekan snapuh tikung bobo dgiyaq ma, yamu hiya we niqan ka mmhemuc msuupu uri. 10Niqan ka ptuura pqita qyqeya tama na, niqan ka we theyaq mqedil uxe bgurah gaga yahan. 11Msuupu mqedil ssiyo na mooda ooda pqnqihun ka seediq nii. Seediq kiya we mnhemuc msuupu ma tmsiiyax ina na. Yamu hiya we niqan ka tmsiiyax mtswai mqedil na ma, weewa tama na. 12Yamu hiya we niqan ka mangal lnabu ma psdara seediq. Maangal su mnrana pnkbarux ma sgcuqi su prana. Trqilun su ka ssiyo su ma, gmeeluk su qyqeya daha. Betaq su cmhungi yaku ka isu. Rnengo Utux Tmninun Bukung ka nii.
13Qtai! Ririh qyqeya nangal su pneeyah uxe msderux ma, pnsdara su seediq ckceka namu de, tmapaq ku qapal baga. 14Ali pkdira ku sunan ciida, mpdehuk knremun ka lhebun su peni? Mpniqan beyax ka baga su ho? Yaku, Utux Tmninun we rmnengo kari so nii de, ida na daun. 15Mkrehak misu ckceka seediq qqlhangan ma klegan seediq ka isu. Asi mu ka ngalun ka qnrutiq ckceka namu. 16Ririh noda namu nanak tsyaxun meeniq berah doriq dqlhangan ka isu. Kiya de mpkela su ka isu, yaku ka Utux Tmninun.”
Paru Rqeda NuUtux Baro
17Meyah kenan ka kari Utux Tmninun, rmengo, 18“Laqi seediq! Sapah Israel we wada ma rutiq xiluy quri kenan. Dheya we rutiq xiluy ging, xiluy limuk, xiluy buur, xiluy, xiluy bbali ckceka rqeda ma wada ma sabak. 19Maanu so kiya, rnengo so nii ka Utux Tmninun Bukung, ado ma rutiq xiluy namu kana ka yamu de, qtai! Psliun maku ckceka Yerusalem ka yamu. 20Huwa mesa psseli posa toma rqeda ka ging, limuk, xiluy, xiluy bbali, xiluy hmuril ma yupan puniq psqsiya. Mntena so nii, psseli ku yamu meeniq ckceka seang mu ma tperuq seang mu uri. Psaun maku alang toma ma pqsiya yamu. 21Mpsseli ku yamu ma, mpiyuk heyi namu ka puniq paru seang mu. Kiya de mpqsiya namu ckceka hiya ka yamu. 22Hmuwa mesa psqsiya ckceka rqeda ka ging we, maha mntena mpqsiya ckceka toma alang ka yamu uri. Kiya de mpkela namu, yaku, Utux Tmninun ka hneri paru seang bobo heyi namu.”
Qnquwan Noda Dmpdudul Israel
23Meyah kenan ka kari Utux Tmninun, rmengo, 24“Laqi seediq! Rngage isu ka dxeral nii, dxeral su uxe pkrtsagun ka isu. Mpkuuka quyux bobo su meeniq ali kseengan mu ciida. 25Msuupu tbrinah ka dmpgeela kari hiya. Mntena so rkelic rudu tnugedux cmilaq qnerac na. Mekan knuudus seediq, gmeeluk qyqeya ma, prana mqedil mqrinuc dxeral hiya ka dheya. 26Dmsapuh ckceka hiya we, mnhemuc tmgesa gaya mu, smeeliq qyqeya mrtaso mu, ini na psnaki ka mrtaso ma doyun seediq, ini na psnaki ka bgurah ma uxe bgurah ma, betaq ini qlahang ali sngayan mu dungal. Meeniq ckceka namu, ani yaku wada namu psqaun uri. 27Ririh qyqeya nangal daha pnooda uxe msderux, dqbsuran ckceka hiya we mntena huling bbuyu cmilaq qnerac na, psdara seediq ma, phuqil knuudus seediq. 28Dmpgeela kari alang hiya we mntena rmicuh nemu btunux qnabil dheya. Qmita so uxe bale ba tuutux ma, mooda mberiq mpsbunul dheya, rmengo: ‘So nii kari na ka Utux Tmninun Bukung’. Bale ba we ini rengo ka Utux Tmninun. 29Seediq dxeral nii we mluhe mooda tmraqil ma gmeeluk maangal. Pkraki seediq mqraqil ma qrinuc ma, tmsiiyax dseediq tmnooda ma, uka ba ka ini psaanak. 30Mpgiing ku 1 seediq ckceka daha mooda pharac smalu alang. Meeniq berah mu, mpheyu pnreqan pnharac dxeral nii ka heya. Kiya ka uxe mpkuuka heya. Kiya de ini ku sdiyal. 31Kiya de sheruy mu heyi daha ka paru seang mu. Mpdoi ku paru seang mu psqama dheya ma, mpuyu ku noda daha cmiyuk bobo tunux daha. Rnengo Utux Tmninun Bukung ka nii.”
Currently Selected:
Yexejqel 22: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
