Yexejqel 21
21
Hlmadac Utux Baro
1So nii kari na kenan ka Utux Tmninun, rmengo, 2“Laqi seediq! Psquri Yerusalem ka dqeras su ma, rngagi ka sapah thmkuwan. Rngage kari pgeela ka dxeral Israel. 3Rngagi ka dxeral Israel, so nii kari na ka Utux Tmninun. Qtai! Yaku ma isu we mppais ta ma, mphgeluq ku hlmadac mpkuuka ku seediq msderux ma seediq naqah peeyah ckceka namu. 4Ado mpkuuka ku seediq msderux ma seediq naqah peeyah ckceka namu. Kiya ka hmgeluq ku hlmadac ma, mccebu ku kana niqan dara ma heyi peeyah toma betaq daya. 5Kana gaga niqan dara ma heyi we, mpkela kenan, yaku, Utux Tmninun hmnugeluq hlmadac di ma, uxe npsalun posa rudu ka hlmadac. 6Isu, laqi seediq! Asi su ka rmengac. Betaq mpgerung hwinuk su tnugedux rmengac berah daha. 7Nasi rmengo sunan ka duma seediq: ‘Ma su rmengac ho?’ Rengo ka isu: ‘Ado mneyah ka hrenang bgihur de mgeedang ka lnglungan seediq, mrunge ka baga, mgdema ka utux ma mntena qsiya knuuwic ka pungo. Qtai! Daling ka nii da ma, ida maha so kiya.’ Rnengo Utux Tmninun Bukung ka nii.”
8Meyah kenan ka kari Utux Tmninun, rmengo, 9“Laqi seediq! Rengo kari pgeela, so nii kari na ka Utux Tmninun, asi su ka rmengo,
niqan ka hlmadac, gaga lpaxun ka hlmadac.
Lmedax riyung.
10Pphuqil na seediq ka gaga slepax,
mntena so wilaq ka lnpaxan.
Qrasun ta ka so nii peni?
Smbiciq qmita hukuc beyax ma kana eruc qhuni laqi mu ka heya.
11Gaga na sbege seediq mooda smlepax, kiya ka tduwa ddooyun. Qqhedu lmepax ma lmedax ka hlmadac, tduwa phuqil seediq meeniq baga seediq. 12Laqi seediq! Tgdiras lingis ka isu, ado hlmadac nii we meeyah seediq mu ma, meeyah kana dqbsuran Israel ka nii. Msuupu seediq mu phqilun hlmadac ka dheya, maanu so kiya de beebu berah su ka isu. 13Ado pseung ka nii. Nasi namu smbiciq qmita hukuc beyax na, ini namu ngali so mnmanu de, mpmaanu namu ho? Rnengo Utux Tmninun Bukung ka nii.”
14“Laqi seediq! Tapaq baga su ma rmengo kari pgeela. Iya psngai peeyah ka hlmadac. Hlmadac phuqil seediq ka nii. Kiya ka mpqburang seediq ma, mphuqil seediq ka hlmadac nii. 15Pnheyu ku hlmadac smiicu nii. Mpceebu ku kana rhengun alang daha. So maha mgeedang ka lnglungan daha ma miicu riyung de, mpskripuc ka hbaro seediq. Ah! Snalu na we mntena so wilaq, mhungul riyung lnpaxun pphuqil seediq. 16Hlmadac! Psuupu ka ooda namu mquri narac ma mquri iril. Mpquri namu inu de, pquri hiya. 17Mptapaq ku baga mu uri, so maha mtbale ka seang mu. Rnengo mu yaku, Utux Tmninun ka nii.”
Hlmadac Qbsuran Paru Babirun
18Meyah kenan ka kari Utux Tmninun, rmengo, 19“Laqi seediq! Btasi 2 elu ka isu. So maha meeyah ka hlmadac Babirun. 2 elu nii we pyahani 1 dxeral. Smlei baga pskraya elu ka mquri osa alang. 20Psrmali 1 ka elu mmaha Rabah seediq Amon ma, betaq Yehudah osa Yerusalem alang mgdehu ba. 21Ado mpheyu swaye pnrdingan 2 elu ka qbsuran paru Babirun ma mpsbunul 2 elu nii. Mpgtuwic budi ka heya, slingun na ka tikung utux ma, qtaun na ka pahung. 22Mpsbunul Yerusalem ka narac baga na. Kiya ka klaun na poosa tuting hurah alang, pmbaro mdiras pphuqil, pmbaro mlawa mharac qbrangan, kmari tglingan ma, psramal tuting mhurah rhengun. 23Meeniq doriq dseediq Yehudah mnoda psdehu we, uxe bale ka mpsbunul nii. Kiya de mpdayo lmngelung qnquwan noda daha ka qbsuran paru Babirun, kiya ka qmerac dheya.”
24Maanu so kiya de so nii kari na ka Utux Tmninun Bukung: “Ado truura riyung ka qnnaqah noda namu, ini daha chngii ka qnquwan noda namu. Kiya de qnquwan noda namu we ptuura kana noda namu. Ini daha chngii ka yamu de, kiya ka qrapun namu baga daha. 25Qbsuran paru Israel smrutiq ma mooda naqah noda! Gisu ka qnhdean ali su pkdraun sunan di. 26Rnengo so nii ka Utux Tmninun Bukung, lhelah ka knledax bobo tunux, aangal ka bunuh lmedax. Ini so pntena cuuxal di. Psaun baro ka tgbiciq, ptingun toma ka tgbaro. 27Ptkurun mu ka qlhangan nii, ptkurun, ptkurun mu. Uxe meeniq ka qlhangan nii, asi ka meeyah ka seediq mkmaangal na de, bege mu heya ka qlhangan nii.”
Hlmadac ma Seediq Amon
28“Laqi seediq! Rengo kari pgeela ka isu. Asi su ka rmengo quri dseediq Amon ma ttmseyax dheya. Rmengo so nii ka Utux Tmninun Bukung, niqan hlmadac we, hgluqi ka hlmadac. Lnpaxan lmedax pphuqil na seediq. Knledax na we mntena wilaq, kiya ka mooda pphuqil ma meekan. 29Qmita mberiq tuutux yamu ka dheya ma, mberiq mpsbunul ka dheya. Kiya ka ptkurun namu na nduyung naqah seediq. Ali qnhdean pkdira dheya we gisu dehuk di. 30Posa rudu ka hlmadac! Yaku we mpkdira ku sunan snlmean misu hiya ma pnttingan su hiya. 31Heri mu heyi su ka seang mu, mpsquri sunan sqama ka puniq tperuq seang mu. Bege misu baga seediq so camac uka pnugaya phuqil seediq. 32Ngalun su daha qhuni pthuun ka isu, qlliun dxeral toma ka dara su. Uxe su daha lnglungun, ado rnengo yaku, Utux Tmninun ka nii.”
Currently Selected:
Yexejqel 21: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
