Yexejqel 23
23
Qnquwan Noda 2 Mtswai Mqedil
1Meyah kenan ka kari Utux Tmninun, rmengo, 2“Laqi seediq! Niqan ka 2 mtswai mqedil pneeyah 1 bubu daha. 3Mnhemuc msuupu meeniq Micrayim. Peeyah mbeyax ciida de prading mmhemuc msuupu. Thmkuwan daha berah meeniq hiya ma, tluungan daha ka nunuh weewa nii. 4Ngayan daha ge, tgqbsuran we Ahalah ma, tswai we Ahalibah. Dheya nii tnlaqi ma ida nnaku kana. Quri so ngayan daha we, Uhura we Samareia, Uhuriba we Yerusalem.
5Bobo nnaku ka Ahalah we, ida mmhemuc msuupu. Smkuxul seediq kuxul na, kiya ka seediq Asur to ba mkkere mbbeyax. 6Dheya nii we mlukus lukus mtgdiyuc, qbsuran mdudul, mdayo pusu qbsuran mdudul. Malu riyung sriso kana ma paapa dapa dmay. 7Mkmhemuc msuupu malu sriso dseediq Asur ka Uhura. Ado thmuku kana tikung ndseediq kuxul na ka heya ma, psrutiq heya nanak. 8Ini bale stheya knhemuc msuupu peeyah Micrayim ciida ka heya. Ado weewa ciida ka heya we, tena mnsuupu mtaqi heya ka seediq, rbuxan daha ka nunuh na ma, mbesu riyung mmhemuc msuupu heya. 9So kiya de, sbege mu baga dseediq smkuxul heya ka heya, kiya ka baga dseediq Asur kuxul na. 10Pbrasun daha ka toma na, qrapun daha ka lqlaqi na ma, sdoi daha hlmadac phuqil heya. Psgeegun daha ka heya ma, ngalan ngayan qnnaqah ckceka mmqedil.
11Ani qmnita ka Ahalibah mtswai na we, ida hmrinas qbsuran na mbesu ma mgkala qbsuran na mmhemuc msuupu. 12Smkuxul bale seediq Asur ka dheya, kiya ka qbsuran mdudul ma mdayo mdudul seediq. Dheya nii we seediq ba sriso mlukus lukus mccebu paapa dapa dmay kana. 13Qtaan mu wada tsyaxun ka heya, mntena noda daha ka mntswai nii. 14Krinah mmhemuc msuupu ka Uhuriba. Qtaan na gnqeran hnyegan ka qnabil hiya, kiya ka hnyegan dseediq Krdiya gnqeran qnabil ma rncuhan mtanah. 15Dheya nii we hmabik habik hwinuk ma, sduduy tqering na ka bnubung tunux daha. Mntena qbsuran mdudul kana niqan hnyegan so seediq Babirun. Krdiya ka dxeral pnttingan daha. 16Qmita ka Uhuriba de, asi skuxul dheya ma, smkagul seediq mosa Krdiya hiya. 17Meyah heya ka seediq Babirun, mosa bobo qlapo pnugluwan na ma, msuupu mtaqi heya ma tmsiiyax heya. Bobo tnsyaxan ka heya de, ida wada smtheya dheya ka lhebun na. 18So kiya de, betaq ptuura riyung knhemuc na msuupu ma truura toma na ka heya. Maha smtheya heya ka lhebun mu, mntena so smtheya ku qbsuran na tgberah. 19Heya we ida krinah prana knbesu na, lmngelung riyung ali knbesu na mneeniq Micrayim weewa ciida. 20Smkuxul riyung mkkere heyi ma mbeyax mntena heyi dapa roba ma dapa dmay. 21So kiya de, krwahun su lmngelung ka knbesu su sriso ciida. Ciida, thmkuwan su daha berah ma tnlungan su daha nunuh seediq Micrayim mbeyax su ciida.”
Pkdira Mtswai Mqedil ka Utux Baro
22Ahalibah! Rnengo so nii ka Utux Tmninun Bukung: “Qtai! Mptutui ku dseediq snkxelan su wada su laxan meyah cmebu sunan. Pyahun mu ka dheya, meyah tmlibu mccebu sunan. 23Niqan seediq Babirun, Krdiya, Peqod, Soa, Qoa ma Asur ka mtheyaq dheya. Dheya we to malu ba sriso. Dungal we kana seediq qbsuran mdudul, mdayo mdudul, qbsuran supi, niqan ngayan na ma, mpaapa dapa dmay kana. 24Maadis qyqeya mccebu, rulu mccebu, rulu ppaan qyqeya, mdudul hbaro supi meeyah mccebu sunan. Mdoi paru ma biciq qeerung ma, knbunuh bunuh mpeeyah ani inu mccebu sunan. Bege mu dheya ka ppsgao sunan ma, mpuyu so gaya daha psgao sunan. 25Mpquri ku sunan hmeruy ka snhuran mu. So maha mquri dyamu ka seang daha. Slapun na ka muhing ma birac su ma, phqilun na hlmadac ka msngari na. Qrapun daha ka lqlaqi su, tnngari na we sqmaun puniq kiya. 26Rhequn su na lukus, glekun na mangal ka malu qyqeya su. 27So kiya de, plaxun misu heya ka mkmhemuc msuupu su ma, knbesu su peeyah dxeral Micrayim. Kiya de uxe su mpstama Asur ma, uxe su mplngelung Micrayim. 28Rmnengo so nii ka Utux Tmninun Bukung, qtai! Bege mu baga dseediq tmraqil yamu, kiya ka baga dseediq wada su laxan. 29Mpqnriqu pkdira sunan ka dheya ma, mpgeluk kana bnqresan su ma, wano isu ka msrangi mbberas hiya. Mptuura ka kmbesu su toma, kana knhemuc su msuupu ma knbesu su. 30Mpquri sunan so nii ka dseediq. Ado mnhemuc su msuupu dseediq icil ma, dmoi su tikung daha psrutiq isu nanak. 31Mnoda su noda qbsuran su mqedil, kiya ka bege mu baga su ka pngerah mahan na.” 32Rmnengo so nii ka Utux Tmninun Bukung,
“Miimah su pngerah mahan nqbsuran su mqedil,
pngerah mahan kiya we mgtruma ba knuglahang,
egu ka tqriun,
hlisun su daha ka isu.
33Mpbsukan su paru,
stngayan su mqraqil.
Pngerah mahan Samareia qbsuran mqedil su,
kiya ka pngerah mahan nklwiun ma kkgedang,
34mimah su kiya ma, poxun su mimah.
Betaq su qtqitun ka ngapih pngerah,
smgaliq su nunuh su nanak.
Ado rmnengo ku.
Rnengo Utux Tmninun Bukung ka nii.”
35Rmnengo so nii ka Utux Tmninun Bukung: “Ririh wada su smhungi kenan, betaq su qmada bukuy kenan. Kiya ka mpheal su knbesu su ma knhmetan su.”
Pkdira 2 Mtswai Mqedil ka Utux Baro
36Rmengo kenan ka Utux Tmninun: “Laqi seediq! Mpsgao su Ahalah ma Ahalibah peni? Rngage dheya ka pqnqihun noda daha. 37Mkmhemuc msuupu ka dheya ma msdara pnhuqil seediq ka baga daha. Mkmhemuc msuupu tikung ka dheya, ani pntuting daha kenan ka lqlaqi daha we psqmaun daha puniq mege uqun tikung. 38Kiya we, so nii noda daha dungal, 1 bale ali betaq smrutiq sapah thmkuwan mu ma smrutiq ali sngayan. 39Phqilun daha ka lqlaqi daha ma ssapuh daha mege tikung. Ali ciida mremux sapah thmkuwan mu ma, smrutiq hiya. Qtai! So nii ka noda daha ckceka sapah mu hiya.
40Yamu 2 mtswai we smkagul namu seediq peeyah theya. Dehuk hiya ka snkgulan namu de, qtai! Meyah ka dheya. Ririh dheya, trima namu heyi, sricuh namu doriq ma, pdeping namu heyi namu. 41Tleung namu malu ba qlapo ma, pniqun namu berah namu ka psaan. Psaun namu bobo na hiya ka skenux mu ma abura mu. 42Niqan hrenang mqqaras dseediq ka hiya. Meeyah ka hbaro kmmhemuc seediq, dseediq busuk pneeyah tadus brenux. Psaun daha cuqi ka baga dmqedil nii ma, pkbnuhan daha bunuh lmedax ka tunux daha.
43Mprengo ku dmqedil mnoda bsiyaq kmmhemuc msuupu nii, mpsuupu mtaqi dheya ka seediq saya ma, mmhemuc msuupu dheya ka heya uri. 44Mosa mqedil kbrexun Ahalah ma Ahalibah hiya ka seediq, mntena so gisu theyaq mqedil kbrexun. 45Seediq msderux noda we mpooda gaya mqedil mmhemuc msuupu ma dmqedil psdara seediq mpsgao dheya. Ado dmqedil mmhemuc msuupu ka dheya, baga daha we niqan dara.”
46Rnengo so nii ka Utux Tmninun Bukung: “Meyah baro mccebu dheya ka supi, kiya de pkiicu ka dheya, qqrapun ka dheya. 47Dsupi we mcebu btunux phuqil dheya, dmoi hlmadac phuqil dheya, phuqil lqlaqi daha, mdoi puniq psqama sapah daha. 48Uxe maha niqan ka msmhemuc msuupu ka dxeral nii. Mpqlahang nanak ka kana mqedil ma, uxe mooda mmhemuc msuupu so noda namu. 49Ririh mmhemuc namu msuupu mpciyuk yamu ka dseediq. Mpheal namu qnquwan noda tnhmuku namu tikung. So kiya de, mpkela namu yaku we Utux Tmninun Bukung.”
Currently Selected:
Yexejqel 23: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
