Yexejqel 18
18
1So nii dungal kari na kenan ka Utux Tmninun, 2“Hmuwa ma so nii ka kari pnccugil dxeral Israel: ‘Mnekan lipas tgbasi ka tama de, tlqeluq mtgbasi ka rupun laqi’ ho?” 3Rmengo ka Utux Tmninun Bukung: “Mpsdehu ku knuudus mu ani knuwan. Uxe namu npsalun rmengo ka kari pnccugil Israel nii da. 4Qtai! Kana knuudus we nnaku. Knuudus tama we nnaku ma, mpkeso kiya knuudus laqi we nnaku uri. Kiya de, niqan qnquwan noda we, asi ka mphuqil kiya.
5Nasi msderux ma, mooda msderux noda ka seediq. 6Kiya ka uxe mnekan uqun snapuh tikung bobo dgiyaq, uxe ba mnoda pquri doriq qmita tikung tnsapah Israel. Ini kmmhemuc tmsiiyax mqedil ssiyo ma, ini suupu mqedil gaga hayan. 7Ini pkraki ani ima seediq ma, pbrinah mege hniti plabu. Ini kmmhemuc gmeeluk qyqeya seediq ma, mege uqun muure seediq, plukus lukus seediq mbberas. 8Ini sgcuqi maangal mnrana pnkbarux, ini pqeepah naqah baga, mnduwa psgao ckceka seediq. 9Mnduwa mooda pnugaya mu, muyu gaya ppsgao mu ma, bale ba mooda ooda. Seediq nii we kiya ka msderux noda, mpkuudus kiya. Rnengo Utux Tmninun Bukung ka nii.”
10-11“Nasi tnlaqi rseno ma, mosa mseediq mpgeluk ma mphuqil seediq de, ani ini oda qnquwan noda na ka tama we, ida mnoda qnnaqah mtswai gaga srengo baro nii ka heya. Mekan snapuh tikung bobo dgiyaq ma, mmhemuc tmsiiyax mqedil ssiyo. 12Pkraki seediq qrinuc ma, dmuure seediq. Gmeeluk maangal qyqeya seediq ma, ini pbrinah mege hniti daha plabu. Mquri tikung ka doriq daha ma, mooda pqnqihun ba ooda. 13Maangal mnrana pnkbarux ma sgcuqi pkeegu maangal mnrana we, mpdehuk muudus ka seediq nii peni? Uxe mpkuudus ka heya. Ado so nii pqnqihun ba noda na kana ka heya ma, ida asi ka mphuqil ma, dara na we maha heyi na nanak.
14Qtai! Nasi tnlaqi rseno ka heya, qmnita kana qnquwan noda tama na ka heya. Ani qmnita, ida ini puyu so nii mooda ka heya. 15Ini bale ekan snapuh tikung bobo dgiyaq, ini bale pquri doriq tikung sapah Israel ma, ini kmmhemuc tmsiiyax mqedil ssiyo. 16Ini bale pkraki ani ima ma, ini aangal hniti daha pnlabu. Ini geeluk maangal qyqeya seediq, rnahun na mege uqun na ka seediq muure ma, plukus lukus seediq mbberas. 17Ini pqraqil seediq mqraqil ka baga na ma, ini aangal mnrana pnkbarux ma ini pqsuqi pkere maangal mnrana, mnduwa mooda pnugaya mu, rnahun na muyu ka gaya bneku mu ma qmeepah kari pndakar mu. So kiya de, uxe mphuqil ririh qnnaqah tama na ka heya ma, ida mpkuudus. 18Quri so tama na we, ado pqraqil seediq ma, gmeeluk maangal qyqeya mtswai ma, naqah noda na ckceka seediq ka heya. Qtai! Asi ka mphuqil ckceka qnquwan noda na nanak ka heya.
19Rmnengo namu: ‘Ma ini paani laqi ka qnquwan noda tama ho?’ Nasi ini psaanak ma, msderux noda na ka laqi ma, muyu bale mooda kana kari pndakar mu de, mpkuudus ka heya. 20Wano ba niqan qnquwan noda we, asi ka mphuqil. Ini paani laqi ka qnquwan noda tama ma, ini paani tama ka qnquwan noda laqi uri. Gnheyi malu noda dseediq msderux we, maha heya nanak. Qnnaqah cniyuk qnnaqah seediq we, ida maha heya nanak uri.
21Nasi malix ani maanu qnquwan noda na ka naqah seediq, muyu kana kari pndakar mu, mooda ini psaanak ma msderux noda de, ida mpkuudus ka heya ma, uxe mphuqil. 22Uxe lnglungun ka kana qnquwan noda na. Ririh knsderux noda na de, mpkuudus ka heya. 23Mphuqil ka seediq naqah we, yaa mu so kuxul ka so nii peni? Uxe mbrinah malix noda na, betaq muudus ka heya we, kiya ka kuxul mu peni? Rnengo Utux Tmninun Bukung ka nii. 24Quri so seediq msderux, nasi malix peeyah msderux mquri noda qnnaqah ma, muyu kana pqnqihun noda dseediq naqah de, mpkuudus ka heya peni? Kana knsderux noda na we, uxe daha lnglungun. Ririh noda na qnnaqah ma qnquwan noda ka mphuqil heya.
25Mprengo namu so nii: ‘Ini pstena ka kari Bukung!’ Sapah Israel! Qbahang ka yamu. Kari mu we, ini pstena peni? Uxe kari namu ka ini pstena peni? 26Malix knsderux na qmeepah naqah ka seediq msderux we, ida mphuqil ckceka noda na qnnaqah ka heya. 27Nasi mbrinah malix qnnaqah noda na mquri meepah ini psaanak ma msderux noda ka seediq naqah we, mpdoi baga knuudus na nanak ka heya. 28Ado psbrinah lmngelung, malix peeyah kana qnquwan noda na. Kiya de ida mpkuudus ma uxe mphuqil ka heya. 29Rmnengo dungal ka sapah Israel: ‘Ini pntena ka kari Bukung!’ Sapah Israel! Bale ba ini pstena ka kari mu peni? Uxe kari namu ka ini pstena peni?
30Maanu so kiya de, sapah Israel! Mppuyu ku noda txtaxa namu cmiyuk. Asi brinah, brinah malix kana qnquwan noda namu. So uxe mpbtunux mptakur yamu ka qnquwan noda namu. Rnengo Utux Tmninun Bukung ka nii. 31Laxi kana ka qnquwan noda namu ma, smlei bgurah lhebun ma bgurah bgihur namu nanak. Sapah Israel! Ma namu migin mphuqil ho? 32Ini ku skuxul mhuqil ka seediq ani ima. Maanu so kiya de, asi brinah, asi ging kndesan! Rnengo Utux Tmninun Bukung ka nii.”
Currently Selected:
Yexejqel 18: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
